point de neuf heures, issi li rois d'Engleterre de la navie qui estoit
à l'ancre devant l'Escluse, et li signeur d'Engleterre aussi; et
vinrent en la ville de l'Escluse, et là furent recheu à grant joie. Et
but et manga li rois un petit, et puis tout de piet il vint à
Ardenbourc veoir le ymage de Nostre Dame, en cause de devotion, et là
fu tout le jour. Et là le vinrent veoir li bourgois de Bruges qui lui
recordèrent des besongnes de Flandres, et conment Jaquemes d'Artevelle,
ses grans amis, estoit avoecques le conte de Hainnau et le duch de
Braibant et les Alemans, à bien soisante mille Flamens, à l'encontre
dou duch de Normendie logiés, et couroit renonmée que il i aueroit
bataille. Ces paroles entendi li rois d'Engleterre volentiers, pour
tant que d'Artevelle estoit si bien en la grasce des Flamens que il les
menoit où il voloit. Si mist tantos li dis rois clers en oeuvre et
messagiers, et escripsi au conte de Hainnau et à ces signeurs le duch
de Braibant, le duch de Guerles, le conte de Jullers et tous les
aultres, son estat et la manière de l'estat et victore que il avoit eu
sus mer à l'encontre des Normans. Et qant il ot fait ce pour quoi il
estoit venus à Nostre Dame d'Ardenbourch, ils et auquns signeurs
montèrent sus chevaus que on lor amena de Bruges, et cevauchièrent et
vinrent à Gant, et trouvèrent madame la roine Phelippe, qui
nouvellement estoit relevée d'un biau fil, liquels avait à non Jehans,
contre le duch Jehan de Braibant, et puis fu dus de Lancastre.
Li rois et la roine qui estoit logie l'abeie de Saint Pière se
conjoirent, ce fu raisons, ensi que gens qui s'entramoient grandement.
Si se tint là li rois et s'i rafresqi. Et aussi fissent li signeur
d'Engleterre et lors gens, et s'espardirent petit à petit parmi le pais
de Flandres, ens ès bonnes villes et aillours, et estoient par tout
conjoi et requelliet liement, car il paioient bien tout ce que il
prendoient.
Qant li signeur d'Alemagne, qui gisoient devant Thun l'Evesque, furent
segnefiiet dou roi d'Engleterre que il estoit à Gant, et que là les
atendoit, si en furent grandement resjoy, et orent là consel l'un par
l'autre que il se deslogeroient et iroient veoir le roi à Gant. Si se
deslogièrent et se departirent premierement tantos les communautés de
Flandres, de Hainnau et de Braibant, et retournèrent en lors villes.
Ensi se desrompi ceste grande assamblée. Et li dus de Normendie se
retraist en Cambrai, et donna grant fuisson de ses gens d'armes
congiet, et les envoia par garnisons, et par especial en Lille, en
Douai et en Tournai, sus les frontières de Flandres. Et pour ce que
renonmée couroit que li rois d'Engleterre et li aloiiet venroient
mettre le siège devant la chité de Tournai, on i envoia le conte de
Fois et le conte de Conminges, le visconte de Bruninqiel, le visconte
de Talar, le visconte de Villemur et le visconte de Nerbonne, à bien
cinq cens armeures de fier, de Bidaus et de Foisois. Et encores furent
envoiiet en Mortagne, seans sus l'Escaut, li sires de Biaujeu à tout
grant fuisson de Bourgignons et de Biaujolois. En la ville de Saint
Amant en Peule furent envoiiet biaucop de Bidaus à dardes et à pavais,
des quels mesires Pières de Carchasonne, uns moult jentils cevaliers,
estoit capitaine. Toutes les garnisons françoises de là environ furent
pourveues de ce que il lor besongnoit, pour atendre l'aventure et
passer la saison. Et se tint li dus de Normandie à Cambrai un lonch
temps, et li rois de France se tenoit à Pieronne en Vermendois, et
donnoient saudées à tous geneuois et prouvenchiaus arbalestriers; et
qant il estoient paiiet pour trois mois, on les envoioit oultre sus les
pas(s)ages et frontières, là où on supposoit que il besongnoient.
Qant li contes de Hainnau et li baron d'Alemagne et li dus de Braibant
se departirent de l'oost de devant Thun l'Evesque, il se traissent à ce
retour à Valenchiennes, et tout dis Jaquemart d'Artevelle en lor
compagnie, ne on ne faisoit riens sans lui, pour tant que toute
Flandres estoit en son obeissance, et tenoit un estat aussi estofé
conme li dus de Gerles, et plus grant. Et par especial li contes de
Hainnau et li dus de Braibant le tenoient grandement à amour, pour tant
que lor pais marcissent à Flandres: si en pooient estre aidié dou jour
à l'endemain. Li contes de Hainnau et la contesse sa fenme requelli ces
signeurs en Valenchiennes moult grandement, et lor fist des biaus
disners et soupers, cinq jours que il i furent. Et là preeca li dis
d'Artevelle enmi le marchiet, et estoit montés en la hale des signeurs,
là où ou anonce les bans, et fu volentiers oïs, car il avoit grant sens
et bielle parleure. Et remoustra quel droit li rois d'Engleterre avoit
au calenge de la couronne de France, et ausi quèle poissance li troi
pais avoient, Flandres, Hainnaus et Braibant, qant il estoient conjoint
ensamble et d'un acord et aliance. Chils Jaquemes d'Artevelle parla si
proprement à la plaisance dou peuple, qui là estoit asamblés pour oïr
ce que il voloit dire, que, qant il conclut son sermon, une vois
generaus et murmurations se eslevèrent en disant: «d'Artevelle a bien
parlé et par grande experiense, et est dignes de gouvrener et excerser
le pais de Flandres.»
Apriès toutes ces coses faites et dittes, li signeur, liquel estoient à
Valenchiennes, prissent congiet l'un à l'aultre, et eurent ordenance de
estre dedens siis jours apriès à Gant deviers le roi d'Engleterre, et i
furent. Et les rechut li rois d'Engleterre et la roine liement et
doucement, et là parlementèrent ensamble. Et fu là acordé que li rois
d'Engleterre venroit à Villevort, où autrefois avoit esté, et là
seroient li signeur tout chil qui presentement estoient à Gant, et
pluisseur aultre qui point n'estoient là. Donc se departirent dou roi
d'Engleterre et s'en retournèrent li dus de Braibant en son pais, et li
contes de Hainnau à Valenchiennes où la contesse sa fenme se tenoit.
Mais li signeur d'Alemagne demorèrent à Brouselles et à Malignes et à
Louvaing, pour estre plus apparilliet au jour de ce parlement; et li
dis Renauls de Gerles, serouges au roi d'Engleterre, demora à Gant, et
vint à Villevort avoecques le dit roi. Fos 62 vo et 63.
P. 41, l. 3: car.--_Mss. A 1 à 6, 11 à 14, 20 à 22_: il s'en doubtoit
plus que d'autres (_Mss. A 11 à 14_: d'autre ville qu'il eust) pour
cause des Flamens. Fo 63 vo.
P. 41, l. 5: Biaugeu.--_Mss. A 11 à 14_: le sires de la Baume. Fo 61
vo.--_Mss. A 2 à 6_: le sire de Wauvrins. Fo 63 vo.--_Mss. A 1, 18 à
23_: Beaurieu.
P. 41, l. 17: guerre.--_Mss. A 11 à 14_: pour obvier à l'effusion de
sang et à la grant destruction du peuple et de l'Eglise qui s'en
povoient ensuir. Fo 61 vo.
=§ 118.= P. 42, l. 5: oncles.--_Ms. d'Amiens_: et leurs conssaux, li
ducs.... Fo 45.
P. 42, l. 7: des Mons.--_Mss. A 11 à 14_: de Vaudemont. Fo 62.
P. 42, l. 8: Faukemont.--_Ms. d Amiens_: .... li comtes de Los. Fo 45.
P. 42, l. 9: d'Artevelle.--_Ms. de Rome_: conme souverains de Flandres.
Fo 63 vo.
P. 42, l. 12: deus ou quatre.--_Mss. A 8 à 10_: trois ou quatre. Fo 58
vo.--_Mss. A 11 à 14_: deus ou trois vaillans bourgois. Fo 62.
P. 42, l. 27: seelet.--_Ms. de Rome_: sus painne de encourir en
contredit de Ronme et sentense d'Empereur. Fo 63 vo.
P. 42, l. 30: monnoie.--_Ms. d'Amiens_: une monnoie sannable d'un
quind, d'un poix et d'une forge. Fo 45.
P. 43, l. 5: Tournay.--_Ms. d'Amiens_: car s'il avoient Tournai à leur
volloir, il iroient par toutte Franche jusquez à Compiègne et jusques à
Coisi à leur vollenté. Et li Flammencq assiegeroient legierement Lille
et Douay et prenderoient toudis leurs pourveanches à Tournay, que nulz
ne leur poroit destourner. Fo 45.
P. 43, l. 13: estat.--_Ms. de Rome_: Et li rois d'Engleterre et
Jaquemes d'Artevelle retournèrent à Gant. Trois jours apriès la revenue
dou roi d'Engleterre à Gant, s'acouça la fenme de ce d'Artevelle d'un
fil, et ot nom Phelippes contre la (roine) d'Engleterre, et le tinrent
à fons li rois d'Engleterre et la roine. Chils enfes, nonmés
Phelippes, fu depuis moult sages et bacelereus, et obtint tout le pais
de Flandres à l'encontre dou conte et des signeurs et dou roi de
France, ensi que vous orés recorder avant en l'istore. Fo 63 vo.
=§ 119.= P. 43, l. 14: Phelippes.--_Ms. de Rome_: qui se tenoit à
Pieronne en Vermendois et estoit tenus ou là environ, depuis que son
fil le duc de Normendie avoit fait sa cevauchie ens ou pais de Hainnau.
Fo 63 vo.
P. 43, l. 25: de Poitiers.--_Mss. A 11 à 14_: Aimemon de Pommiers. Fo
62 vo.
P. 43, l. 28: de Kaieus.--_Ms. d'Amiens_: .... monseigneur Godemar dou
Fay, le seigneur de Rainneval,... le seigneur de Merlo, monseigneur
d'Aufemont, monseigneur de Saint Venant, tout grant baron. Fo 45
vo.--_Le ms. B 6 ajoute_: le seigneur de Bresekes. Fo 154.
P. 43, l. 28: senescal.--_Mss. A 11 à 14_: mareschal. Fo 62 vo.
P. 43, l. 28: Poito.--_Ms. A 1_: Pontieu. Fo 61 vo.
P. 44, l. 9: regardèrent.--_Ms. B 6_: .... as portes, as murs, as
barbakennes, as bailles et à tout che que necessité leur estoit en la
ville. Fo 154.
P. 44, l. 10: artillerie.--_Ms. d'Amiens_: et as enghiens, as kanons et
as espringalles, et les missent bien à point. Et regardèrent as
pourveanches de le ville, comment elle estoit avitaillie. Si fissent
wuidier grant fuisson de menues gens qui n'estoient mies bien pourveu,
et y fissent venir vins, bléz, avoines et grant fuisson de char, tant
que la chité fu en point et en estat pour li tenir ung grant temps. Fo
45 vo.
P. 44, l. 11: besongnoit.--_Ms. B 6_: Et cheux qui bien n'estoient
pourveu pour atendre le siège, il les firent partir. Fo 155.
=§ 120.= P. 44, l. 18: li termes.--_Ms. B 6_: Quant le jour de la
Madelaine fut venus et que les blés estoient par les camps assés bons
pour les chevaulx et les avainnes. Fo 155.
P. 44, l. 21: meurir.--_Ms. de Rome_: Li bleds et les avainnes as camps
commençoient à meurer, et li fain estoient fené et les auquns à fener,
et c'est li temps que les gens d'armes demandent pour euls et pour lors
cevaus. Fo 63 vo.
P. 44, l. 21: englès.--_Ms. de Rome_: volt moustrer meute pour
esmouvoir tous les aultres, et avoit requelliet tous les Englois qui
espars estoient en Flandres, en Hainnau et en Braibant, et se departi
de Gant. Fo 63 vo.
P. 44, l. 22: sept.--_Ms. de Rome_: huit. Fo 63 vo.
P. 44, l. 23: deus.--_Édit. de Verard et de D. Sauvage_: huit. _Edit.
de Lyon_, 1559, p. 69.
P. 44, l. 23: deus cens.--_Ms. de Rome_: quatre cens. Fo 63 vo.
P. 44, l. 24: chevaliers.--_Ms. de Rome_: En ces quatre cens chevaliers
estoient vint et wit banerès, tous grans signeurs, et les contes
doubles banerès, et menoient casquns de ces signeurs grant arroi. Et
estoit mesires Robers d'Artois ou nombre de ces contes, car on le
nonmoit le conte de Ricemont; et pooit celle terre de Ricemont valoir
en revenue par an environ siis mille florins. Et li avoit li rois
donnée pour tenir son estat, car conment que messires Robers d'Artois
fust banis et escachiés de France, ensi que ichi desus est dit, il
estoit li uns des plus nobles de sanc et des gentils honmes des
Crestiiens, et issus de la droite generation dou roi saint Lois. Fo 63
vo.
P. 44, l. 24: quatre mille.--_Ms. B 6_: six mille. Fo 155.
P. 44, l. 25: neuf mille.--_Ms. de Rome_: douse mille. Fo 63 vo.--_Ms.
B 6_: dix mille archiés et otant de Galois. Fo 155.
P. 44, l. 25: pietaille.--_Mss. A 11 à 14_: sanz les petaulx, tuffes et
guieliers. Fo 62 vo.
P. 45, l. 2: vingt mille.--_Ms. A 3_: dix mille.--_Ms. de Rome_: sans
chevaliers et esquiers, dont il ot plus de quatre cens. Fo 63 vo--_Ms.
B 6_: à tout quatre mille hommes, que chevaliers, que escuiiers, et
trente mille communiers. Fo 156.
P. 45, l. 5: terre.--_Ms. d'Amiens_: car là estoient de son pays tout
li gentils hommes et chil dez bonnes villes de Brouxelles, de Louvaing,
de Malines, d'Anwiers et de touttes les aultres. Fo 45 vo.
P. 45, l. 6: pont à Ries.--_Mss. A 11 à 14_: pont de mer. Fo 62 vo.
P. 45, l. 7: le Pire.--_Mss. A 1 à 6, 11 à 14_: les prés de la porte
Valenciennoise. Fos 64 vo et 65.--_Mss. A 7, 18 à 33_: les prés et la
porte Valenciennoise. Fo 59 vo.--_Mss. A 8 à 10, 15 à 17, B 3_:
l'Empire et la porte Valenciennoise. Fo 59.
P. 45, l. 9: Haynau.--_Ms. B 6_: En après vint le conte de Haynau, le
conte de Namur en sa compaignie, monseigneur Jehan de Haynau son
oncle, le seigneur d'Engien, le seigneur de Havrech, le seigneur de
Lingne, de Lens, le seigneur de Brabenchon, le senescal de Haynau, le
seigneur d'Antoing. Et avoit bien le dit conte deux mil lanches, tant
de Haynau comme de Hollande, et vingt mil Hollandois. Sy se loga le dit
conte au lés devers Explechin. Fo 155.
P. 45, l. 11 et 12: signeur.--_Ms. d'Amiens_: Et li roys d'Engleterre
et toutte sa gent estoient deviers le porte Saint Martin, sus le chemin
de Lille. Fo 45 vo.
P. 45, l. 14: soissante mille.--_Edit. de D. Sauvage_: quarante mille.
Lyon, 1559, p. 69.
P. 45, l. 21: aise.--_Ms. de Rome_: et chariier sans peril; et aussi li
Braibençon, liquel estoient logiet sus le Piré, ensi que li Escaus
entre en la chité de Tournai, avoient parellement fait un tel pont. Fo
64.
P. 45, l. 23: des Mons.--_Mss. A 11 à 14_: de Vaudemont. Fo 63.
P. 45, l. 24: Bakehen.--_Mss. d'Amiens et de Rome_: ... messires
Guillaumes de Duvort. Fo 45 vo.
P. 45, l. 25: devers.--_Ms. de Rome_: les Marvis, au lés deviers
Hainnau; et comprendoient lors logeis jusques à la porte de Sainte
Fontainne. Fo 64.
P. 45, l. 28: Tournay.--_Ms. de Rome_: qui est de grant cirquité. Fo
64.
P. 45, l. 30: fust.--_Ms. de Rome_: Li contes de Namur s'estoit esqusés
deviers le conte de Hainnau, de qui il relieuve sa terre et l'en doit
service, pour tant que il n'estoit pas chiés de la besongne, mais li
rois d'Engleterre; et ne se voloit pas armer li dis contes contre le
roiaulme de France. Fo 64.
P. 45, l. 32: fust.--_Ms. B 6_: Et les nombra on, et estoient bien deux
cens milles hommes. Et estoient logiet par telle manière que nul n'en
povoit entrer ne yssir en la ville qu'il ne fust veus. Et avoient ceulx
de Tournay, pour eulx mieulx forteffier, enterret sept de leur portes.
Fo 156.
=§ 121.= P. 46, l. 5: yawe.--_Ms. d'Amiens_: par le rivierre d'Escault.
Fo 45 vo.--_Ms. de Rome_: car il lor venoient de Flandres, de Hainnau
et de Braibant. Fo 64.
P. 46, l. 8: mention.--_Ms. de Rome_: Et plus en fissent li Hainnuiier
que nuls des aultres. Fo 64.
P. 46, l. 9: Haynau.--_Ms. B 6_: Le conte de Haynau.... ardy en poudre
la ville d'Orchies et plus de quarante villaiges ens ou pais. Et assaly
Saint Amant et de forche le prist; et furent tous mors cheulx qui
dedens estoient, et le senescal de Carcasone ossy qui cappitaine en
estoit, et ly abeie ars(e) et destruite. Et depuis revint le dit conte
devant le castiel de Mortaigne et le fist assaillir de deux costés par
trois jours. Mais le sire de Beaugeu, qui dedens estoit avoecques
foison de bonne gens d'armes, le garda et deffendy sy bien que point de
damaige il n'y eult ne cheulx de le fortrèche. Fo 157.
P. 46, l. 9 et 10: entreprendans.--_Ms. de Rome_: et messires Jehans de
Hainnau, son oncle, avoient si fort encargiet ceste guerre, et pris en
si grant desplaisance et despit la cevauchie que li dus de Normendie
avoit fait en Hainnau, que il ne le pooient ne voloient oubliier. Fo
64.
P. 46, l. 13: se parti.--_Ms. de Rome_: li dis contes et ses oncles. Fo
64.
P. 46, l. 15: Lille.--_Ms. de Rome_: et vinrent ardoir Habourdins et
Seclin, Ronchins et tous les villages de là environ, et la ville et
abbeie de Chisoing et Baissi et tous le pais jusques au pont à Raisse à
une lieue de Douai, et puis s'en retournèrent viers Landas et viers
Orchies et les ardirent. Fo 64.
P. 46, l. 24 et 25: contour.--_Ms. d'Amiens_: en le Peule, et le ville
de Marchiennes ossi et tout le pays costiant le rivière de Scarp
jusquez au castiau de Rieulay qui se tient de Haynnau. Et coururent si
coureur bien priès de Douay. Fo 45 vo.
P. 46, l. 27: Flamench.--_Ms. de Rome_: qui estoient logiet à la porte
Sainte Fontainne. Fo 64.
P. 47, l. 7: chevalier.--_Ms. d'Amiens_: Et vous di que li bon
chevalier que li roys de Franche y avoit envoiiéz, leur fisent grant
confort, et tint Tournay en honneur. Et fissent li Flammencq, entre les
autres assaux, un assaut très fort et très mervilleus et par especial
sour le rivierre d'Escault, et avoient nefs armées et grant fuisson de
bonnes gens dedens. Et aprochièrent ces nefs jusques à le barbakanne de
le porte couleiche de l'arche sus l'Escault, et volloient par là entrer
en le ville et hantoient Flamencq de haces, de pils et d'autres
instrummens ordonnés et aprestés pour rompre. Là estoient as gharittes
d'amont li comtes de Foix et si frère, messires Robiers Bertrans,
marescaux de France, messires Joffroys de Carni, li sires de Kaieus, et
servoient chiaux d'aval tellement qu'il n'y avoit si hardit qui ne
resongnaist. Encorres estoient dez barons de Franche en nefs sur
l'Eskault par dedens le ville, li senescaux de Poitau, messires Gerars
de Montfaucon, messires Mahieux de Trie, messires Godemars dou Fay, et
estoient à l'encontre des assallans et se deffendoient vaillamment. Fo
46.
P. 47, l. 9: appareilliés.--_Ms. de Rome_: et avoient en ces nefs
arbalestriers qui traioient à ceuls de dedens, les quels il convenoit
estre bien pavesciés, ou il euissent trop grandement perdu. Fo 64.
P. 47, l. 13: six vingt.--_Mss. A 11 à 14_: huit vingt. Fo 63 vo.
=§ 122.= P. 47, l. 15: Le siège.--_Ms. de Rome_: Le siège estant devant
Tournai, issirent hors de Saint Amant li saudoiier qui là estoient, et
vinrent à Hanon à une petite lieue de là, et passèrent les bos. Si
ardirent la ville et violèrent l'abeie, et le destruisirent et le
moustier aussi, et enportèrent et menèrent tout ce que de bon il i
trouvèrent; mais en devant ce, li abbes de Hanon et li monne avoient
amené lor fiètre et lors jeuiauls et les reliques à sauveté en la ville
de Valenchiennes.
Qant li saudoiier de Saint Amant orent ce fait, il s'avalèrent parmi
les bois que on dist de Rainmes, et vinrent à l'abeie de Vicongue, et
ardirent l'ostel dou Pourcelet, et abatirent le conduit de une
fontainne qui là estoit, et vinrent à la porte de l'abeie de Vicongne,
et le conmenchièrent à asallir. Pour ces jours, il i avoit un abbet,
mout vaillant honme, qui se nonmoit Godefroi. Qant il considera le
peril de ces bidaus, il fist monter un varlet à ceval, et se parti de
l'abeie par derrière, et vint au ferir des esporons à Valenchiennes et
au sequours.
Pour ces jours, estoit prevos de Valenchiennes uns moult vaillans homs
qui se nonmoit Jehans de Baisci, qui entendi as requestes que dans
abbes de Vicongne faisoit, car moult l'amoit et l'abeie aussi. Si
ordonna tantos arbalestriers et honmes bien cinq cens à partir et à
aler à Vicongne, pour aidier à l'abeie. Chil qui furent esleu se
departirent tantos, et prissent le cemin de Rainmes. Et bien lor
besongna que il se delivrassent dou venir au seqours pour l'abeie, car
li saudoiier de Saint Amant avoient fait un gran feu devant la porte de
l'abeie, pour le ardoir et entrer dedens; mais li abbes desus nonmés,
qui bien se doubtoit de tout ce, avoit fait armer et vestir la porte
de quirs de vaces à tout le poil, par quoi li feus ne se peuist
legierement prendre, ne atachier à la porte.
De ces bidaus qui là estoient venu, en i avoit auquns qui en estoient
alé et parti de lor compagnons pour pillier à Rainmes. Chil de la ville
de Rainmes avoient relevé les fossés à deus costés deviers le bois, et
fait à deffense unes grandes bailles; et là ot grande escarmuce, et
tant que li arbalestrier de Valenchiennes aprocièrent. Chil bidau les
veirent venir sus la caucie et lor banière tout devant; et avoec ce il
oïrent dire ces gens de Rainmes qui là se deffendoient et
escarmuçoient: «Veci seqours qui nous vient; vechi les Valenciennois.»
Ces paroles oïes et les arbalestriers veus, chil bidau se missent
tantos au retour, et entrèrent ens ès bos de Saint Amant, et se
sauvèrent, et retournèrent en la ville.
Et li Valenchiennois vinrent jusques à Vicongne, et estindirent le feu
qui estoit devant la porte. Li abbes Godefrois les remercia grandement
de ce seqours, et fist tourner un tonniel de vin sus le fons et lor
fist boire, et puis retournèrent à Vallenchiennes. Et li abbes de
Vicongne fist tantos coper les bos tout autour de son abbeie et devant
aussi, par quoi on ne peuist chevauchier ne venir aisiement jusques à
là. Fo 64.
P. 48, l. 5: lui.--_Ms. d'Amiens_: environ quarante arbalestriers et
otant d'archiers à main. Fo 46.
P. 48, l. 5: Raimes.--_Ms. d'Amiens_: en ce petit bos qui regarde sus
le voie de le cauchie dou Pourcelet, liquelle chauchée estoit adonc
toutte semée de Franchois qui Vicongne volloient destruire. Fo 46.
P. 48, l. 10: bos.--_Ms. d'Amiens_: et à chiaux qui les traioient ne
pooient avenir, car il y avoit grandes rouillies et fort bos entr'iaux.
Fo 46.
P. 48, l. 11: retour.--_Ms. d'Amiens_: car il se doubtèrent qu'il n'y
ewist plus de gens qu'il n'y avoit. Fo 46.
P. 48, l. 12: mieulz.--_Ms. d'Amiens_: Et li arbalestriers de
Vallenchiennes, tout costiant lez bos, les reboutèrent si avant qu'il
en delivrèrent le chauchie. Et fu li abbeie deffendue, et li feulx
estains, qui devant le porte estoit. Et fist chils abbes copper grant
fuisson de bos par derierre, affin que on ne les pewist approchier; et
par devant, où point de bos n'avoit, il fist faire grans fossés et
parfons et larges. Fo 46.
P. 48, l. 13 et 14: Gascongne.--_Ms. d'Amiens_: Si comme je vous
recorde, che siège durant devant Tournay, avinrent pluisseurs avenues
et grans fès d'armes, tant en France comme en Gascoingne et en Escoche,
qui ne font mies à oubliier, car ainssi l'ai je proummis à messires et
mestres ou coummenchement de mon livre, que tous les biaux fès d'armes
dont j'ay le memore et le juste infourmation, je les remeteray avant,
jà soit ce que messires Jehans li Biaux en ses cronikes n'en fait mies
de tous mention. Mès ungs homs ne puet mies tout savoir, car ces
guerres estoient si grandes et si dures et si enrachinées de tous
costés que on y a tantost oubliiet quelque cose, qui n'y prent
songneusement garde.
Et pour ce voeil revenir ung petit au comte de Laille qui, comme roys
de Franche, se tenoit en Gascoingne, et faisoit de celle saison grant
guerre contre les Gascons qui pour le roy d'Engleterre se tenoient. Et
estoit avoecq lui li comtes de Comminges, li comtes de Pieregorth, li
viscomtes de Villemur, le viscontes de Talar, li comtes de Bruniqiel,
li viscontes de Carmaing, li viscontes de Murendon, et pluisseur autre
baron et chevalier. Et estoient bien six mille à cheval et dix mil à
piet, et avoient jà reconcquis pluisseurs bonnes villes et castiaux,
tant que Bregerach, Condon, Sainte Basille, Penne, Lango, Prudaire,
Zebillach. Et avoient partout mis gens et garnisons pour deffendre et
tenir ces castiaux, et seoient devant le Riole, une bonne ville et fort
castiel. Si en estoit adonc capitaine ungs chevaliers englès qui
s'appielloit messires Jehans li Boutilliers, qui longement et
vassaument le tint contre les François. Mès finablement il fu si menés
et si appressés par assaulx d'enghiens et d'autres besoingnes, et si
veoit ossi que nuls comfors ne li appairoit, car il n'avoit homme en
Gascoingne adonc, seigneur de Labreth ne autre, qui se meuist ne
resistast as Franchois de riens, mès gardoient chacuns leurs fortrèches
au mieux qu'il pooient. Si traita li cappittainne de le Riole, par le
consseil et acord de chiaux de le ville, à le rendre au comte de Laille
parmy tant qu'il s'en devoit partir, et chil qui partir s'en volloient,
sans dammaige; mès il, ne chil qui avoecq lui se partiroient, ne se
pooient armer toutte l'année contre yaus ens ès marches et frontierres
de Gascoingne. Chilz marchiés fu tenus, et li ville et li castiaux de
le Riolle rendus. Et y entrèrent li Franchois baudement, et prisent le
feaulté et le serment de chiaux de le ville, et y misent ung chevalier
gascon que on appelloit messire Raimmon Segni.
Apriès le prise de le Riole et le chevalier dessus noummet ens
laissiet, et le ville pourvue et rafreschie de touttes coses qui
appertenans y estoient, li comtes de Laille eut consseil qu'il yroit
devant Auberoche et l'asegeroit et ne s'en partiroit jusques à tant
qu'il l'aroit. Si se parti appertement de le Riolle et fist arouter
tout son charoy et ses pourveances, et esploita tant qu'il vint devant
le bonne ville de Auberoche et le assiega de tous poins environneement,
et y fist faire et livrer pluisseurs assaux grans et mervilleux, mès
chil de dedens se deffendoient bien et vaillamment. Et en estoit adonc
souverains et gardiiens de par le roy d'Engleterre messires Helies de
Pummiers, frères au seigneur de Pummiers, liquelx avoit avoecq lui
bonne bachelerie et apperte, qui moult songneux estoient de garder le
ville et de enhorter les bourgois de le ville qu'il fuissent loyal et
preudomme enviers leur seigneur le roy Edouwart d'Engleterre. Enssi se
portoit li affaire; on gerrioit de tous lés. Li roys englès seoit
devant Tournai et ardoit et exilloit le pays d'environ. Et li comtes de
Laille et li autre comte et baron li ardoient et assegoient son pays en
Gascoingne. Ossi li Escot li faisoient une très forte gerre par de delà
au costet deviers Escoche, si comme vous orés chy apriès. Fo 46 vo.