TRATTENEMIENTO III De la Jornata V.
_Betta recusa de volere marito: all’utemo se ne mpasta uno de mano
soja, ed essennole arrobbato da na Regina, dapò mille travaglie lo
trova, e co grann’arte recuperatolo, se lo reporta a la casa._
_Avenno scomputo lo cunto Cecca, che piacquette stremamente a
ttutte, Meneca, che steva a ccavalletto pe sparare lo sujo, visto
che stevano co l’aurecchie appezzute pe ssentire, accossì parlaje._
Fu sempre cchiù defficele all’ommo lo conservare l’acquistato, che
l’acquistare de nuovo, perchè nell’uno concorre la fortuna, che spisse
vote ajuta le ’njostizie, ma nell’autro nce vole sinno: perrò se vede
pe lo cchiù, perzona, che n’ha trascurzo, saglire dov’è lo bene. Ma pe
ccarestia de nciegno vrocciolarene a bascio, comme da lo cunto, che ve
dirraggio, si site comprennuoteche, porrite chiaramente vedere.
Era na vota no mercante, che aveva na figlia uneca, e ssola, la quale
desedderava grannemente de vedere mmaretata; ma pe quanto tastiava sto
liuto, la trovava ciento miglia lontano da le rrecercate soje, pocca
sta capo sbentata, comm’a scigna de le ffemmene, odiava la coda, e
comm’a tterretorio vennuto, e ccaccia reservata, negava lo commerzio
d’ogn’ommo, e boleva sempre feria a lo tribunale sujo, sempre vacanza
a le scole, sempre feste de Corte a lo Banco; tanto che lo patre ne
stava lo cchiù affritto, e desperato de lo Munno. Ed accorrenno de ire
a na fera, disse a la figlia, che se chiammava Betta, che desedderava,
che le portasse a lo retuorno? ed essa le decette: Tata mio, se me
vuoje bene, portame no miezo cantaro de zuccaro de Palermo, e mmiezo
d’ammennole ambrosine, co quatto, o seje fiasche d’acque d’addore, e
no poco de musco, e d’ambra, portannome porzì na quarantina de perne,
duje zaffire, no poco de granatelle, e rrubine, co no poco d’oro
filato, e sopra tutto na martora, e na rasola d’argiento. Lo patre se
maravigliaje de sta addemmanna stravagante, puro pe non contradire
a la Figlia, jette a la fera, e ttornaje, portannole puntualmente
quanto aveva cercato; la quale avuto cheste ccose, se nchiuse drinto
na cammara; e commenzaje a fare na gran quantetà de pasta d’ammennole,
e zuccaro mmescata co acqua rosa, e sproffummo, e commenzaje a fare no
bellissemo Giovene, a lo quale fece li capille de fila d’oro, l’uocchie
de zaffire, li diente de perne, le lavra de robine, e le dette tanta
grazia, che no le mancava se no la parola. La quale cosa fatto avenno
sentuto dicere, ca n’autra statua a li prieghe de no cierto Rrè di
Cipro deventaje viva, tanto pregaje la Dea d’ammore, che la statua
commenzaje ad aprire l’uocchie, e rrenforzanno le preghere, se mese a
sciatare, e dapò lo sciato scettero le pparole, e scioglienno all’utemo
tutte le miembre, commenzaje a ccammenare. Betta co n’allegrezza granne
cchiù, che s’avesse guadagnato no Regno, l’abbracciaje, e basaje, e
pigliatolo ne la mano lo portaje nnanze lo Patre, decennole: Tata gnore
mio, sempre avite ditto, che stivevo goliuse de vedereme mmaretata, e
io pe contentareve mme l’aggio sciveto secunno lo core mio. Lo patre,
che bedde scire da la cammara de la figlia sto bellissemo giovane, che
n’aveva visto trasire, remmase attoneto, e bedenno tanta bellezza,
che se poteva pagare no grano a ttesta a mmirarelo, se contentaje
che se facesse sto matremmonio, facennose na festa granne, dove fra
l’autre, che nce vennero, nce capitaje na gran Regina scanosciuta,
la quale visto la bellezza de Pinto-Smauto (che accossì le deze nomme
Betta) se ne ncrapicciaje d’autro, che de baja, e perchè Pinto-Smauto,
che n’aveva tre ora, che aveva apierto l’uocchie a le mmalizie de lo
munno, non sapeva ntrovolare l’acqua, accompagnaje pe fi a le scale le
Fforastiere, ch’erano venute a nnorare le nnozze, che accossì l’aveva
ditto la zita, e facenno lo stisso co chella Segnora, essa pigliatolo
pe la mano lo trasportaje chiano chiano fi a la carrozza a seje
cavalle, che tteneva a lo cortiglio, dove tiratolo drinto, fece toccare
a la vota de la Terra soja, dove lo nsemprece de Pinto-Smauto non
sapenno, che l’era socciesso, le deventaje marito. Betta aspettatolo no
piezzo, nè bedennolo chiù comparere, mannaje a bascio a lo cortiglio,
si fosse a pparlare co quarche perzona; fece saglire all’astreco, si
nche fosse juto a ppigliare airo, s’affacciaje a lo necessario, si
fosse juto a dare lo primmo tributo a la necessetà de la vita, ma non
trovannolo, subeto se mmagenaje ca ped’essere tanto bello, l’era stato
arrobbato; e ffatto jettare li solite Banne, nè comparenno nesciuno
a rrevelarelo, facette resoluzione de irelo cercanno pe ttutto lo
Munno stravestuta da poverella, e puostose de sta manera a cammenare,
dapò quarche mese, arrivaje a la casa de na bona vecchia, che la
recettaje co granne ammore: e ntiso la desgrazia de Betta, e bedenno de
cchiù, ch’era prena, n’avette tanta compassione, che le mmezzaje tre
parole: La primma _tricche varlacche, ca la Casa chiove_. La seconna
_anola tranola pizze fontanola_. La terza _tafare, e ttammurro, pizze
ngongolo, e cemmino_. Decennole, che le ghiesse decenno a ttiempo de
lo chiù granne abbesuogno, ca ne cacciarria benefizio. Betta, si bè
restaje maravigliata de sto presiento de vrenna, puro decette fra se
stessa, chi te sputa ’n canna non te vò vedere muorto, e chi piglia
non secca: ogne picca jova; chi sà, che bona fortuna se nchiude drinto
a ste pparole: e accossì decenno, rengraziata la Vecchia, se mese a
cammenare; e dapò luongo viaggio arrivata a na bella Cetà chiammata
Monte Retunno, se ne jeze deritto a lo Palazzo Riale, dove cercaje pe
l’ammore de lo Cielo no poco de recietto a la Stalla ped’essere vecina
a lo partoro: la quale sentuta da le Ddammecelle de Corte, le fecero
dare na Cammarella ’n miezo le scale, dove stanno la negrecata, vedde
passare Pinto-Smauto, pe la quale cosa appe tanta allegrezza, che
fu ’n ponta ’n ponta a sciuliare da ll’arvolo de la vita. Ma perchè
se trovava a ttanta necessetate, voze fare prova de la primma parola
dettale da la Vecchia, e accossì decenno, _tricche varlacche, ca la
casa chiove_, se vedde comparere nnante no bello Carruocciolo d’oro
ncrastato tutto de Gioje, lo quale jeva da se stisso pe la Cammara,
ch’era no spanto a bedere: la quale cosa visto da le Dammecelle, lo
ddissero a la Regina, che senza perdere tiempo, corze a la Cammara de
Betta, e beduto sta bella cosa, le disse, si nce lo voleva vennere,
che l’averria dato quanto sapeva addemmannare; la quale respose, che
si bè era pezzente, stimava cchiù lo gusto sujo, che tutto l’oro de
lo Munno; e perrò se voleva lo carruocciolo, l’avesse fatta dormire
na notte co lo Marito. La Regina restaje maravigliata de la pazzia de
sta poverella, che ghieva tutta perogliosa, e pe no crapiccio voleva
dare tanta recchezza, fece preposito de zeppoliarene sto buono voccone,
ed addobbianno Pinto-Smauto, facesse la poverella contenta, e mmale
pagata. E benuta la notte, quanno erano a ffare mostra le Stelle de
lo Cielo, e le Lluciole de la Terra, la Regina dato l’adduobbio a
Pinto-Smauto, lo fece corcare a canto a Betta, lo quale tanto faceva,
quanto l’era ditto. Ne accossì priesto fu jettato ncoppa lo Matarazzo,
che se mese a ddormire, comme a no Gliro; Betta negrecata, che penzava
chella notte de scontare tutte l’affanne passate, vedenno ca non
c’era audienza ped essa, commenzaje a llamentarese fore pe mesura,
remproverannole tutto chello, che aveva fatto pe ccausa soja, e non
chiuse maje vocca l’addolorata, e n’aperze maje uocchie l’addormentato,
ficchè no scette lo Sole co l’acqua de spartire, a sseparare l’ombra
da la luce, quanno la Regina scese a bascio, e se pigliaje pe mano
Pinto-Smauto, decenno a Betta: Già si ccontenta. Tale contento puozze
avere tutto lo tiempo de la vita toja, respose sotto lengua Betta,
pocca aggio passato accossì mmala notte, che mme l’allecordarraggio
pe quarche ghiuorno. Ma non potenno resistere la negra, voze fare
la seconna prova de le sseconne parole, e decenno _anola tranola
pizze fontanola_, vedde comparire na Gajola d’Oro, co no bellissemo
Auciello fatto de prete preziose, e d’oro, che cantava a ffacce de no
Roscegnuolo, la quale cosa visto le Ddammecelle, e rreferutole a la
Regina, lo voze vedere, e fattole la stessa addemanna, che l’aveva
fatto de lo Carruocciolo, e respuostole Betta lo stisso, ch’aveva
respuosto la primma vota, la Regina ch’aveva allommato, e annasato la
corriva, prommese de farela dormire co lo marito; e ppigliatose la
gajola co l’auciello, e benuto la notte, dette lo soleto adduobio a
Pinto-Smauto, e lo mannaje a ddormire co Betta a la stessa cammera,
dove aveva fatto armare no bello lietto, la quale vedenno che dormeva
comm’a scannato, commenzaje a ffare lo stisso lamiento, decenno cose,
che averria muoppeto a compassione na preta selece, e llamentannose,
e chiagnenno, e sciccannose tutta, passaje n’autra notte mmottonata de
tormiento, e comme fu ghiuorno scese la Regina a pigliarese lo Marito,
e llassaje la negrecata Betta fredda, e ghielata, che se magnaje le
mmano a diente de la burla, che l’era stata fatta. Ma scenno la mattina
Pinto-Smauto pe ghire a cogliere quatto fico a no giardino fore la
porta de la Cetate, se l’accostaje no scarpe-vecchie, che steva a
mmuro a mmuro co la cammara de Betta, lo quale n’aveva perduto parola
de quanto essa aveva ditto, e referette de punto ’n punto lo trivolo,
lo sciabbacco, e le lamentaziune de la sfortunata pezzente, la quale
cosa sentuto lo Rrè, che già commenzava a mmettere sinno, se ’mmagenaje
comme potesse passare sto negozio, e penzaje, che si n’autra vota le
venesse fatto d’essere mannato a dormire co la poverella, non s’averria
vevuto chello, che le faceva dare la Regina. Ora volenno Betta fare
la terza prova, e decenno le tterze parole; _Tafaro, e tammurro, pizze
ngongola, e cemmine_, ne scettero na mano de panne de Seta, e d’Oro, e
de fasce ragamate co na concola d’Oro, che la Regina stessa n’averria
potuto mettere ’nsiemme accossì belle galantarie; le quale cose
allommate da le Ddammecelle, ne fecero avisata la Patrona, la quale
trattaje d’averele comm’avea fatto dell’autre, e avuto la medesima
resposta da Betta, che si le boleva, avesse fatto dormire lo Marito
cod’essa, la Regina decenno fra se stessa, che nce perdo a ccontentare
sta pacchiana pe ccarriarele da sotta ste belle cose, e pigliatose
tutte ste ricchezze, che l’afferze Betta, comme la notte comparze de
sera essennole liquidato lo strommiento pe lo debeto contratto co
lo suonno, e lo repuoso, dette l’adduobbio a Pinto-Smauto, ed isso
tenennolo ’n vocca, e fatto fenta de ire a scarrecare la vessica, lo
ghiettaje drinto a na Cammara, e ghiutose a ccorcare a canto a Betta,
essa commenzaje a fare la stessa Canzone: decenno comme l’avea mpastato
co le mmano soje de zuccaro, e ammennole, comme l’avea fatto li capille
d’oro, e l’uocchie, e la vocca de perne, e prete preziose, e comme
l’era debetore de la vita datale da li Deje pe le ppreghere soje, e
utemamente comme l’era stato arrobbato, e essa grossa prena ll’era
juta cercanno co ttanta stiente, che lo Cielo nne guarde ogne carne
vattiata, e de chiù comme avea dormuto duje autre notte cod’isso, e
dato ncagno duje tresore, e n’aveva potuto avere na parola schitto,
tale, che chesta era l’utema notte de le speranze soje, e ll’utemo
termene de la vita. Pinto-Smauto, che steva scetato, sentuto ste
pparole, e allecordatose comme no suonno de chello ch’era passato,
l’abbracciaje, e perchè la notte era sciuta co la mascara negra a
pportare lo ballo de le Stelle, s’auzaje chiano chiano, e trasuto
drinto la cammara de la Regina, che steva sprofonnata nne lo suonno,
se pigliaje tutte le cose che n’avea zeppoliato a Betta, e tutte le
gioje, e ttornise ch’erano drinto lo Screttorio, pe ssodesfarese de li
travaglie passate, e tornato a la Mogliere, se nne partettero all’ora
stessa, e ttanto camminaro, ficche scettero da li confine de chillo
Regno, dove se reposaje tanto a no buono alloggiamiento, che Betta
scette a lluce co no bello mascolo, e llevata che fu da lo lietto,
s’abbiaro a la vota de la casa de lo Patre, dove lo trovaro sano, e
bivo, ch’a lo gusto de revedere la Figlia, deventaje comme figliulo de
quinnece anne, e la Regina non trovanno nè lo marito, nè la pezzente,
nè le gioje, se sciccaje tutta, a pilo mmierzo, a la quale non mancaje
chi disse,
_Chi gabba, non se doglia, s’è gabbato._