TRATTENEMIENTO II De la Jornata IV.
_Marcuccio, e Parmiero Fratielle, uno ricco, e biziuso, n’autro
vertoluso, e pezzente, se vedono dapò varie fortune, lo povero
scacciato da lo ricco deventato Barone, e lo ricco caduto ’n
meseria connutto vicino a la forca, ma canosciuto ’nnozente, è da
lo frate recevuto a parte de le rrecchezze soje._
_Portaje lo caso de Minec’Aniello assaje sfazione a li Princepe,
e benedecettero mille vote li surece a ccausa, che lo poverommo
recoperasse la preta, e li Maghe recuperassero co na rotta de
cuollo lo chirchio de no dito. Ma essennose posta Cecca ’ncorzeta
de chiacchiarare, varrianno tutte co la stanga de lo selenzio la
porta de le pparole, essa accommenzaje a dicere de sta manera._
Non c’è cchiù gran parapietto contro l’assaute de la Fortuna, quanto
la vertù, la quale è contravenino de le ddesgrazie, pontella de le
rroine, puorto de li travaglie: la quale te caccia da lo ffuoco, te
sarva da le ttempeste, e te guarda da le mmale sciagure, te conforta
ne li desguste, te soccorre ne le nnecessetà, e te descrive nne la
morte, comme sentarrite da lo cunto, ch’aggio ’n ponta la lengua pe ve
contare.
Era na vota no Patre, che aveva duje Figlie Marcuccio, e Parmiero;
lo quale stanno pe sautare li cunte co la natura, e stracciare lo
quatierno de la vita, se le cchiammaje accanto lo lietto, e le disse:
Figlie mieje beneditte, già poco ponno tardare li sbirre de lo tiempo
a scassare la porta dell’anne mieje pe fare secozione contra le
ccostituzione de sto regno sopra li bene dotale de sta vita, pe chello
che devo a la terra; e perzò, amannove quanto le bisciole meje, non
devo partireme da vuje senza lassareve quarche buono allecuordo, azzò
pozzate correre co la Tramontana de lo buono conziglio per sto guorso
de travaglie, ed arrivare a ssecuro Puorto. Aprite addonca l’arecchie,
che si be pare niente, chello che ve dongo, aggiate da sapere, ch’è na
recchezza, che non ve sarrà arrobbata da Malantrine: na casa, che no
la scarruparanno terremote; na possessione, che no la conzumaranno li
verrucole. Ora ’n primmo, e antemonia, siate timoruse de lo Cielo; ogne
cosa vene da llà ’ncoppa, chi sgarra sta strata, ha fritto lo ffecato.
Non ve facite scannare da la potronaria, crescennove comm’a puorce a
lo Pontile: chi striglia lo cavallo sujo, non se po chiammare muzzo de
stalla; besogna ajutarese a ccauce, ed a mmuorze, chi ped’autro lavora,
pe se mannuca.
Sparagnate quanno nne avite: chi sparagna guadagna; a cavallo a cavallo
se fa lo tornese; chi stipa trova: chi ha de donne, bona foglia conne;
stipate, che pappe, e non fare, che sfaccie: ca buone so l’ammice, e li
pariente, trista la casa dove non c’è niente; chi ha denare fraveca,
e chi ha biento naveca, e chi n’ha denare è no paputo, e n’aseno,
che d’ogne ttiempo le piglia lo spasemo. E perzò ammico mio cortese,
comm’aje la ’ntrata, cossì fa le spese; culo quanto cuopre, terra
quant’uoseme: comme te siente, cossì mena li diente, la cucina picciola
fa la casa granne.
Non essere troppo chiacchiarone, ca la lengua non ave uosso, e rompe
lo duosso; aude, vide, e ttace, se vuoje vivere ’n pace; chello che tu
vide vide, chello che tu siente siente, poco magnare, poco parlare, ce
caudo de panne, maje fece danne; chi troppo parla, spisso falla.
Contentateve de lo ppoco; meglio sò le ffave, che ddurano, che li
confiette, che fenisceno; meglio de lo poco gaudere, che de l’assaje
trivolare; chi non pò avere la carne, veva lo vruodo; chi autro non pò,
co la mogliere se corca; cot cot autem, arrepezzate comme meglio puoje;
chi non pò avere la porpa, s’attacca all’uosso.
Prattecate sempre co mmeglio de vuje, e ffacitele le spese: dimme con
chi vaje, ca ti dico chello che ffaje; chi pratteca co lo zuoppo,
’n capo dell’anno zoppeca: chi dorme co ccane, non se n’auza senza
pulece: a lo tristo dalle la rrobba toja, e lassannello ire, ca la mala
compagnia porta l’ommo a la forca.
Penzate, e po facite, ch’è mmala cosa chiudere la stalla quanno nne
sò sciute li Vuoje: quanno la votte è cchiena, appila appila; quanno
è bacante non aje ch’appilare; Mazzeca ’n primmo, e po gliutte, ca la
gatta pe la pressa fece li figlie cecate: chi cammina adaso, fa bona
jornata.
Fuite le ccostiune, e li verrille, non mettenno lo pede ad ogne
preta; ca chi sauta troppo pale, se nne ’mpizza quarcuno da dereto:
cavallo caucetaro, cchiù nne leva, ca nne dace; chi de graffio fere,
de cortellaccio more: tanto và la lancella a lo puzzo, pe nfi che nce
lassa la maneca; la Forca è fatta pe lo sbentorato.
Non ve facite ’nfomare da la superbia, nce vole autro che mmesale
janco a tavola. Vasciate, e acconciate: maje fu bona la casa, che ffece
fummo: lo buono Archemista passa lo destellato pe la cennere, azzò non
piglie de fummo, e l’ommo da bene deve passare pe la mammoria, c’ha da
tornare cennere, li penziere superbe, pe non restare affommecato da la
presonzione.
Non ve pigliaje lo penziero de lo russo, chi se ’mpaccia resta
’mpacciato, è ccosa da Ciantiello ire mettenno l’assisa a le ccetrole,
e lo ssale a le ppignate.
No ve ntricate co Ssegnure, e ghiate cchiù ppriesto a ttirare la
sciaveca, ch’a servire ’n Corte. Amore de Signure, vino de fiasco la
mattina è buono, la sera è gguasto, da li quale non puoje autro avere,
che bone parole, mmela fracete; dove te resceno li servizie sterele,
li designe fracete, le speranze sesete, sude senza compassione, curre
senza repuoso, duorme senza quiete, cache senza cannela, e mmagne senza
sapore.
Guardateve da ricco mpezzentuto, da villano resagliuto, da pezzente
desperato, da servetore ’mmeziato, da Prencepe ’gnorante, da jodece
’nteressato, da femmena gelosa, da ommo de craje, da esca de corte, da
ommo sbano, e ffemmena varvuta, da sciumme cojete, da cemmenere fumose,
da male vecine, da figliulo pecciuso, e da ommo ’nvediuso.
Sforzateve finalmente de sapere, ca chi ave arte, ha parte, e chillo
campa drinto a no Vosco, che ha sale ’n cocozza, e ha puosto la mola de
lo sinno, e mmutato le pprimme arecchie: ch’a buon cavallo no le manca
sella.
Mill’autre cose io v’averria da dicere, ma commenza a benireme lo
campisso de la morte, e mme manca lo sciato. Cossì decenno appena appe
forza d’auzare la mano a benedirle, che calate le bele de la vita,
trasette a lo Puorto de tutte li guaje de sto munno. Partuto che fu lo
Patre, Marcuccio, che se scorpette le pparole soje ’n miezo lo core,
se deze a stodiare a la scola, a ghire pe le scademmie, a ffare accepe
cappiello co li studiante, a trascorrere de cose vertolose; tanto, che
in quatto pizzeche se fece lo primmo letterummeco de chillo Pajese;
ma perchè la Pezzentaria è na zecca fresa de la vertute, e dall’ommo
sedunto dell’uoglio de Minerva nne sciulia l’acqua de la bona Fortuna,
steva sto pover’ommo sempre spresato, sempre asciutto, sempre limpia
core, e cruda voglia, e se trovava lo cchiù de le bote sazio de votare
tieste, e goliuso de leccare tielle; stracco de studiare conziglie,
e pezzente d’ajuto, facenno fatica sopra l’indigeste, e trovannose
sempre dejuno. Dall’autra parte Parmiero datose a bivere a la carlona,
ed a la spertecata, da na parte joquava, da n’autra tavernejava,
crescennose luongo luongo, senza nulla vertù de lo munno; co ttutto
chesto de riffa, e de raffa, se mese bona paglia sotta, la quale cosa
vedenno Marcuccio, se chiammaje pentuto che pe cconziglio de lo patre
isso avesse sgarrata la strata; pocca lo Donato niente l’aveva donato
propio, che lo cuorno copia l’aveva puosto ’n tanta necessetate.
Bartolo no le faceva trasire niente a le bertole, a dove Parmiero co lo
trattenemiento dell’ossa faceva bona carne, e co dare spasso a la mano,
s’aveva chiena la vozza; all’utemo non potenno stare cchiù forte a lo
frosciamiento de l’abesuogno, jeze a ttrovare lo frate, pregannolo, già
che la fortuna lo faceva figlio de la gallina janca, s’allecordasse,
che isso era de lo sango sujo, e ca erano sciute tutte da no pertuso:
Parmiero, che nne li frusce de la recchezza era deventato stiteco, le
disse: tu, ch’aje voluto secotiare li studie pe cconziglio de patreto,
e m’aje sempre jettato a facce le scommerzaziune, e li juoche, và
roseca libre, e lassame stare co li malanne ca io non sarria pe te dare
manco sale, ca buono mme le stento sti poco picciole, che mme trovo: tu
aje età, e ghiodizio, chi non sà vivere, suo danno; ogni ommo pe se,
e Ddio pe ttutte. Si n’aje denare, tu jetta coppe. Aje famme, datte
a muorze a le ggamme; aje seta datte a muorze a le ddeta; e dittole
cheste ed autre pparole, le votaje le spalle. Marcuccio, che se vedde
usare tanta canetate da lo propio frate, venne ’ntanta desperazione,
che co n’armo resoluto de separare l’oro de l’arma da lo tterreno de
lo cuorpo, co l’acqua forte de la desperazione, s’abbiaje verzo na
montagna auta auta, che comm’a spione de la terra voleva vedere chello,
che se faceva ’ncoppa l’ajero, anze comm’a gran Turco de tutte li
munte, co no torbante de nuvole s’auzava a lo Cielo, pe mpizzarese la
Luna ’n fronte, dove sagliuto, ed arrampecatose comme meglio potette,
pe na strata stretta stretta, fra scarrupe, e contrapune, comme
fu arrivato a la cimma, da dove vedeva no gran precepizio, votanno
la chiave a la Fontana dell’uocchie, dapò luongo lamiento, se voze
vrocioliare de capo a bascio. Quanno na bella femmena vestuta verde co
na giorlanna de lauro ncoppa li capille de fila d’oro, afferrannolo pe
lo vraccio, le disse: Che faje poverommo? dove te lasse strascinare
da lo male cellevriello? tu si ommo vertoluso, ch’aje strutto tanto
uoglio, e pperduto tanto suonno pe studiare? tu si chillo, che pe
fare ire la famma toja comm’a Galera sparmata, sì stato tanto tiempo
sotto la sparmata, e mmo te pierde a lo mmeglio, e non te sierve
de chell’arme, ch’aje temperate a la Forgia de li studie, contra
la miseria, e la fortuna; Non saje tu, ca la Verità è n’Orvietano
contro lo ttuosseco de la povertà, no tabbacco contra li catarre de
la ’nvidia, na rezetta contra la ’nfermetà de lo tiempo; non saje tu,
che la vertù è Busciola pe rregolarese a li viente de la desgrazia;
è ntorcia e biento da cammenare pe lo bruoco de li desguste; e arco
gagliardo da resistere a terremote de li ttravaglie; torna, scuro tene,
torna ’n te stisso, e non votare le spalle a chi te pò dare armo nne
li pericole, forza nne li guaje, fremma nne le ddisperaziune; e ssacce
ca lo Cielo t’ha mannato a sta montagna così difficile a ssaglire,
dove abbeta la stessa Vertù, azzò essa medesema da te ’ncorpata a
gran tuorto, te levasse de pede de la mala ’ntenzione, che te cecava.
Perrò scetate, confortate, cagna penziero, e perchè bide ca la vertù
sempre è bona, sempre vale, sempre jova, te, pigliate sta cartoscella
de porvere, e battenne a lo Regno de Campo-largo, dove trovarraje la
figlia de lo Rrè, che stace a li confitemmene, e non trova remmedio
a lo mmale sujo, fancela pigliare drinto a n’uovo frisco, ca subeto
darraje na patente de desluoggio a la ’nfermetate, che comm’a ssordato
a descrezzione, le zuca la vita, e tu n’averraje tanto premmio, che
te levarraje la pezzentaria da cuollo, e starraje da paro tujo, senza
avere abbesuogno de chello d’autro. Marcuccio, che la canoscette a la
ponta de lo naso, jettatose a li piede suoje, le cercaje perdonanzia
de l’arrore, che boleva fare, decennole; io mo mme levo l’appannatora
dall’uocchie, e te canosco a la ’ncornatura ca si la Vertù da tutte
laudata, da poche secotata; la Vertù, che ssaje ngreccare li nciegne,
ngarzapellire le mmente, affinare li jodizie, abbracciare le ffatiche
nnorate, e mmettere l’ascelle pe bolare a le ssette celeste; io te
canosco, e mme chiammo pentuto d’avereme servuto male dell’arme, che
tu m’aje dato; e te prommetto da oje nne nante nciarmareme de manera
co lo contraveleno tujo, che no mme porrà manco lo truono de Marzo;
e bolennole vasare lo pede, le squagliaje da nnante ll’uocchie,
lassannolo tutto conzolato comm’a ppovero malato, che dapò passato
l’azzedente, l’è ddato la radeca co l’acqua fresca, e sciuliatosenne
pe la montagna, s’abbiaje verzo Campo-largo, ed arrivato a lo Palazzo
Rejale, fece subito ’ntennere a lo Rrè ca voleva rremmediare a la
nfermetate de la figlia, da lo quale pigliato co lo palio, fu pportato
drinto la Cammara de la Prencepessa, dove trovaje chella sbentorata
figliola a llietto perciato, accossì conzomata, ed arrecenuta, che non
aveva si no l’ossa, e la pella: l’uocchie erano trasute ’ndrinto, che
pe bedere le bisole ’nce voleva l’acchiaro de lo Galilejo; lo naso era
cossì affilato, che se poteva osorpare l’afficio de lo suppositorio
’nforma; le mmasche erano cossì rezucate, che pareva la morte de
Sorriento, lo lavro de sotta le cadeva ’ncoppa lo varvazzale; lo
pietto pareva de Pica, le braccia erano comm’a stenche de pecoriello
spollecate; ’n somma era cossì strasformata, che co lo becchiero de
la pietate, faceva brinnese a la compassione. A Marcuccio, che la
vedde a sto male passo, vennero le llagreme ’n ponta, conzideranno la
fiacchezza de la natura nostra soggetta a le ssasine de lo tiempo, a le
rrevote de le compressiune, ed a li male de la vita. Ma addemmannato
n’uovo frisco de gallina primarola, fattole pigliare appena n’afeta
de caudo, nce schiaffaje la porvera drinto, e ffattolo sorchiare pe
fforza a la Prencepessa, la commogliaje co quatto coperte. Ma non
aveva ancora pigliato puorto la notte, e ffatto tenna, quanno la malata
chiammaje le zitelle, che le mmutassero lo lietto, ch’era sperciato da
lo sodore, ed asciuttata che fu, e puostose ogne cosa de nuovo, cercaje
refrisco, cosa, che ’n sette anne de ’nfermetate, no l’era sciuta
maje da la vocca; de la quale cosa pigliato bona speranza, le dettero
no forzico, e guadagnanno ogn’ora vertù, ed avanzanno ogne ghiuorno
appetito, non passaje na semmana, che se refece ’n tutto e pe ttutto,
auzannose da lo lietto, pe la qual cosa lo Rrè notaje Marcuccio comm’a
Ddio de la Medecina, facennolo non sulo Barone de na grossa terra, ma
primmo Conzigliero de la Corte soja, nzorannolo co na Signora la cchiù
rricca de chillo pajese. Fra chisto miezo, Parmiero restaje scotolato
de quanto aveva, perchè denare de juoco, comme veneno, accossì se
ne vanno, e la fortuna de lo jocatore quanto saglie, tanto scenne; e
bedennose pezzente, e desgraziato, se resorvette de cammenare tanto,
o che ccagnanno luoco cagnasse ventura, o che sborrasse la chiazza
da lo rollo de la vita, e ttanto cammenaje, che dapò seje mise de
giravote arrivaje a Campo-largo cossì scodato, e stracco, che non se
rejeva ’n pede, e bedenno ca non trovava dove cadere muorto, e che
la famme le cresceva a mmesura, e li vestite le cadevano a ppetacce,
venne ’n tanta desperazione, che ttrovata na casa vecchia fore le mmura
de la Cetate, se levaje l’attaccaglie de le ccauzette, ch’erano de
vammace, e filato, ed annodecatole nsiemme, nce fece no bello chiappo,
lo quale attaccato a no travo, e ssagliuto ncoppa no monteciello de
prete, ch’isso stisso se fece, se dette vota. Ma voze la sciorte,
ch’essenno lo travo carolato, e ffraceto, a lo butto, che deze se
spezzaje pe mmiezo, e lo ’mpiso vivo schiaffaje de costate a cchella
preta, che se ne sentette pe na mano de juorne. Ora spezzannose lo
travo, cascaro ’n terra na mano de catene, cannacche, ed anelle d’oro;
ch’erano nforchiate drinto a lo cavotato de le ttavole, e fra l’aute
cose, na vorza de cordovana co na mano de scute drinto; pe la quale
cosa vedennose Parmiero co no sauto de ’mpiso sautato lo fuosso de la
povertà, se prima era ’mpiso pe la desperazione, mò era sospiso da
l’allegrezza, che non toccava pede ’n terra, e pigliatose sto duono
de la fortuna, se ne jette de carrera a la taverna pe tornarese lo
spireto, che l’era addesa mancato. Avevano duje juorne primma cierte
marranchine scervecchiate ste robbe a lo stisso tavernaro, dove jette
a mmangiare Parmiero, e l’erano jute a stipare drinto a chillo travo
canosciuto da lloro, pe ghirele sfragnenno, e spennenno a poco a poco,
pe la quale cosa avenno Parmiero chino buono lo stommaco, cacciaje
la vorza pe pagare, la quale canosciuta da lo tavernaro, chiammaje
certe tammare accunte de la taverna, e fattolo acciaffare co na bella
ceremonia fu pportato ’nnanze a lo Jodece, lo quale fattolo cercare,
e ttrovatole lo delitto sopra, e fatto l’affrunto, fu comme convitto,
connannato a ghioquare a lo trè, dove facesse molinielle co li piede.
Lo nigro che se vedde a sti fiscole, sentenno, ch’a la vegilia de
n’attaccaglia, deveva secotare la festa de na funa, e a lo ’nzajo de no
travo fraceto, fare no torneo a na sbarra de na forca nova, commenzaje
a sbattere, ed a strillare ca era ’nnocente, e che s’appellava de sta
settenza, e mmentre jeva gridanno, ed alluccanno pe la strata, ca non
c’era jostizia, ca li poverielle non erano ’ntise, e ca li decrete
se facevano a spacca-strommola, e perchè non aveva ontato la mano a
lo Jodece, abboccato lo Scrivano, dato lo maniucco a lo Mastrodatto,
refuso a lo Procuratore, era mannato a llavorare punte ’n ajero a la
Majestra vedola; se ’ncontraje a ccaso co lo frate, lo quale essenno
Conzigliero, e Ccapo de la Rota, fece fermare la jostizia pe ’ntennere
le rragiune soje, lo quale contato tutto lo socciesso, le respose
Marcuccio: Stà zitto, ca non canusce la sciorte toja, perchè senza
dubbio tu, ch’a la prima prova aje trovato na catenella de tre parme,
nne trovarraje a sta seconna quarch’autra de tre ppasse. Và puro
allegramente, ca le fforche te songo sore carnale, e dove l’autre nce
devacano la vita, tu nce inchie la vorza. Parmiero, che sentette dare
la quatra, le disse: Io vengo pe ghiostizia, non pe d’essere coffiato,
e ssacce ca sta cosa che m’hanno ’mposta, io n’aggio le mmano nette,
ca so ommo nnorato, si bè mme vide accossì straccione, e brenzoluso,
ca l’abeto non fa monaco. Ma pe no avere ntiso a Marchionno patremo,
e a Marcuccio fratemo, io passo pe la trafila, e sto ’n pizzo pe
ccantare no matrecale a tre sotto a li piede de lo Boja. Marcuccio, che
’ntese mentovare lo nomme de lo Patre, e lo sujo, se sentette scetare
lo sango, e mmeranno fitto a Parmiero, le parze de lo canoscere,
ed all’utemo scopiertolo pe lo frate, se trovaje commattuto da la
vregogna, e da l’affezione, da la carne, e da lo nore, da la jostizia,
e da la pietate; se vergognava de scoprirese frate a na facce de mpiso;
se frejeva de vedere a chillo termene lo sango sujo, e la carne lo
tirava co na vorpara a rremmediare a sto fatto, lo nnore lo reterava pe
non se sbregognare co lo Rrè de no frate nquesito de menatione ancini,
la jostizia voleva, che se desse sfazione a la parte offesa, la pietate
cercava, che procorasse la salute de lo proprio frate. Ma stanno ’n
belanzo co lo cellevriello, ed a ppartito co la chiricoccola, ecco
no Portiero de lo Jodece co no parmo de lengua da fore correnno, che
gridava; ferma, ferma la jostizia; sta, sta, adaso, aspetta: che cosa
è, disse lo Conzigliero; e chillo respose, è soccessa na cosa granne,
pe bona fortuna de sto giovene, pocca essenno jute duje mariuole pe
pigliare cierte denare, ed oro, che avevano nascuosto drinto no travo
de na casa vecchia, e non avennole trovate, penzanno ognuno de lloro,
che lo compagno avesse fatto la caliata, so benute a le mmano, e se
sò fferute a mmorte; dove arrivato lo Jodece, hanno confessato subeto
lo fatto; pe la quale cosa canosciuta la ’nnocenzia de sto poverommo,
mme manna a ’mpedire la jostizia pe lliberare chisto, che non ce ha
corpa. Sentuto sta cosa Parmiero, crescette no parmo, dove aveva paura
d’allongarese no vraccio. E Marcuccio, che bedde tornare la famma a lo
frate, levatose la mascara, se dette a ccanoscere, decenno a Parmiero:
Frate mio, s’aje canosciuto da li vizie, e da lo juoco le rroine
toje, canusce autro tanto da la vertù lo gusto, e lo bene. Viene puro
liberamente a la casa mia, dove gauderraje nziemme co mmico li frutte
de la vertù, che ttanto aviste ’n savuorrio, ch’io scordato de li
dispriezze, che mme faciste, te tenerraggio drinto a ste bisole. Cossì
decenno, ed abbracciannolo, lo carriaje a la casa soja, vestennolo da
la capo a lo pede, facennolo canoscere a ttutte prove, ca ogne cosa è
biento,
_E bertù sola fa beato l’ommo._