Herry Barton, skynn', John Abbot. A^{o}. vij^{o}.
maior. Thomas Dufhous.
[Sidenote: The erle of Sar', S^{r}. Th' Mountagu, at the sege of
Orlyons was sclayn with schot of a gonne.]
[Sidenote: The mordryng of a widewe be a fals Breton.]
[Sidenote: Here women maden an ende of the Breton.]
[Sidenote: The duke of Norfolk was in perille at London bregge.]
This same yere,[114] the iij day of Novembre, deyde the worshipfull
Sire Thomas de Mountagu erle of Salisbury before Orlyons, thorugh
schetyng of a gonne as he lay at the sege before the forseid cite; God
have mercy on his sowle. Forthermore duryng that sege, at the
begynnyng of Lenten neste folwynge, vii m^{l} of Frensshmen and mo
with many a Scot fel upon oure men as they wente thiderward with
vitailes be sydes a town that is called Yamvyll, where S^{r}. John
Styward and his brother with mo than vij^{c} Scottes that thei were
governours of, lighten a fote, and were sclayn every modir sone be
S^{r}. John Fastolf, S^{r}. Thomas Rempston, and othere capitayns of
oure syde, the whiche hadde nought passyng v^{c} fytynge men with them
at all withoughte chartres; but Charles of Burbon and the bastard of
Orlions, with alle the Frensshmen sittynge on horsbak seynge the
governaunce, trussed them and wente away. Also a lytel before
Witsonday nest folwynge, was the forsayd sege broken up be the duke of
Launson and his power; and alle oure lordes and capitayns of the same
sege disparpled, that is to say the erle of Suffolk and his brother,
the lord Talbot, and the lord Scales with many mo, the whiche sone
after were taken everych on at myschief. Furthermore, this same yere
betwen Estren and Witsontyd a fals Breton mordred a wydewe in here
bed, the whiche fond hym for almasse withoughte Algate in the
subbarbes of London, and bar awey alle that sche hadde, and afterward
he toke socour of Holy Chirche at seynt Georges in Suthwerk; but at
the laste he tok the crosse and forswore the kynges land; and as he
wente hys way it happyd hym to come be the same place where he had don
that cursed dede, and women of the same paryssh comen out with stones
and canell dong, and there maden an ende of hym in the hyghe strete,
so that he wente no ferthere notwithstondynge the constables and
othere men also, whiche hadde hym undir governaunce to conduyt hym
forward, for there was a gret companye of them, and hadde no mercy, no
pyte. Also this same yere, the viij day of Novembre, the duke of
Norfolk with many a gentilman squyer and yoman, tok his barge at seynt
Marye Overeye betwen iiij and v of the belle ayens nyght, and purposyd
to passe thorugh London bregge, where the forseid barge thorugh
mysgovernaunce of steeryng, fill upon the pyles and overwhelvyd, the
whiche was cause of spyllyng of many a gentilman and othere, the more
ruthe was, but as God wolde, the duke hymself and too or iij othere
gentylmen seenge that myschief, leped upon the pyles, and so were
saved thorugh helpe of them that weren above the brigge, with castyng
down of ropes.
[Footnote 114: _See note_ SS.]