John[112] Reynwell. Rob't Arnold, haburdash'. A^{o}. v^{to}.
John Heigham, drap'.
[Footnote 112: "William" _in the Cotton MS._]
[Sidenote: The bysshop of Wynchestre was mad cardynall.]
[Sidenote: The cardynall haat.]
[Sidenote: Wille Wawe was hanged: the hedes of buttes of suete wyn
were smeton out [_in another hand_.]]
[Sidenote: How the hat was seet on his heed.]
This same yere aboughte Schroftyd the duke of Bedford wyth his lady
passed the see to Caleys: and a litel before passyd the see to Caleys
Herry bysshop of Wynchestre; and upon oure lady day the Annunciacion
anno d'n'i mill'mo cccc^{mo} xxvij, the bysshop of Wynchestre was made
cardynall in seynt Marye chirche of Caleys ful solempnely, where were
the same time the duke of Bedford regent of Fraunce and his duchesse;
and before or the masse was begonne whiche the bysshop schulde don,
the popes cosyn broughte the cardinall hat and with gret reverence
sette it upon the heyghe auter, and there it stood alle the masse
tyme; and whanne the bysshop hadde don the masse and was unreversed,
thanne was don on hym an abyte in manere of a freres cope of fyn
scarlet furred with pured; and thanne he there knelynge upon his knees
before the heighe auter the popes bulles were reed to hym; and the
firste bulle was his charge; and the seconde bulle was that he schulde
have and reioyssen alle the benefices sp'uelx ant temperellx that he
hath in Engelond; and whanne this was don the regent of Fraunce duke
of Bedford, wente up to the heighe auter and tok the cardinall haat
and sette it upon the bysshopes heed of Wynchestre, and bowed and
obbeyed to the bysshop and tok hym before hym.
John Gedeney, drap', Rob't Ottele, groc'. A^{o}. vj^{to}.
maior. Herr' Frowyk, m'c'.
[Sidenote: A gret reyn and a long duryng.]
This same yere[113] fro the begynnyng of April into Halwemasse was so
gret abundance of reyn, where thorugh nought only hey was distroied,
but also moche corn, for it reyned almost every other day more or
lasse.
[Footnote 113: _See note_ RR.]