Rex omnibus fidelibus suis, et omnibus et Judæis et Anglis salutem.
Sciatis nos concessisse, et præsenti charta nostra confirmasse, Jacobo
Judæo de Londoniis Presbytero Judæorum, Presbyteratum omnium Judæorum
totius Angliae. Habendum et tenendum quamdiu vixerit, libere, et quiete
honorifice, et integre; ita quod nemo ei super hoc molestiam aliquam,
aut gravamen inferre præsumat. Quare volumus et firmiter præcipimus,
quod eidem Jacobo quoad vixerit, Presbyteratum Judæorum per totam
Angliam, garantetis, manuteneatis, et pacifice defendatis. Et si quis
ei super ea foris facere præsumpserit, id ei sine dilatione (salva
nobis emenda nostra de forisfactura nostra) emendare faciatis, tanquam
Dominico Judæo nostro, quem specialiter in servitio nostro retinuimus.
Prohibemus etiam ne de aliquo ad se pertinente ponatur in placitum, nisi
coram nobis, aut coram Capitali Justiciario nostro, sicut charta Regis
Richardi fratris nostri testatur.
Teste S. Bathoniens. Episcopo, &c. Dat. per manum Huberti Cantuariensis
Archiepiscopi, Cancellarii nostri, apud Rothomagum 12. die Julii an.
Reg. nostr. primo.