_Responsio Venetorum_
Sanctissimo et beatissimo in Christo patri et domino domino Alexandro
digna Dei providentia Sacrosanctae ac Universalis Ecclasiae Summo
Pontifici Augustinus Barbadico Dux Venetiarum etc. pedum osculo
beatorum. Sacratissimum ac suavissimam aureae rosae munus quo
nos licet absentes donandos ornandosque censuit summa clementia
Beatitudinis Vestrae ea veneratione et observantia ea leticia et
iucunditate animi fuit a nobis reverenter susceptum ut vix affectus
eiusmodi nostros exprimi posse putemus, cum mittentis et missi
muneris excellentiam qualitatemque altius consideramus. Duo etenim
in auctore doni potissimum animadvertimus: supremam auctoritatem
maiestatemque Sanctitatis Vestrae et erga nos praecipuum studium
paternamque dilectionem. Alia item duo, ex parte delati muneris, fuimus
contemplati, literalem scilicet ipsius significationem et spirituale
eiusdem latens mysterium, a Sancta Romana Ecclesia institutum, et vere
ex omni parte religione refertum ac uberibus gaudii et consolationis,
ob humani generis de veteri captivitate liberationem praefiguratam.
Sed et alia duo accessere ad ornamentum tam praeclari doni, exacta
prudentia et rara quaedam gratia illud ferentis spectati viri
domini Jacobi de Cardona familiaris et nuncii Beatitudinis Vestrae.
Gratias igitur amplissimas habemus et agimus Vestrae Sanctitati,
et quia in referendis impares nos esse novimus et fatemur, hoc
saltem testatum volumus gratissimo et memori animo perspicuum hoc
documentum dilectionis et caritatis Vestrae Beatitudinis erga nos
esse conservaturos. — Data in nostro ducali palatio die ultimo Aprilis
MCCCCLXXXXV indictione XIII.