Romanis turpe erat atque ominosum suo nomine lotium illud appellare.
Inde multiplices circumlocutiones pro _urina_. Sic Seneca _humorem
obscenum_ dicit, _aquam immundam_, etc. Eadem de causa vas urinarium
nominare vitabant, digitorum crepitu poscentes.
Digiti crepantis signa novit eunuchus,
Et delicatae suscitator _urinae_
Domini bibentis ebrium regit penem.
—Mart. III, LXXXII, 15 sqq.
URTICA: Saepissime eodem sensu quod UREDO.
USURARIUS: Catamitus.
"Cupio aliquem emere puerum, qui _usurarius_ Nunc mihi quaeratur."
—Plaut. _Curcul._ III, I, 12 sq.
USURARIA: Quae viro non propria, sed tantum ad usum, et tanquam
mutuatitia.
"Nulla datur propria foemina (regi), sed per vicissitudines, in
quacumque commotus fuerit, _usurariam_ sumit."
—Solin. _de Hebudibus._
"In faciem vorsus Amphitruonis Juppiter, Dum bellum gereret cum
Telebois hostibus, Alcmenam uxorem cepit _usurariam_."
—Plaut. _Amphitr. argum._ 1 sqq.
USUS: Coitus.
At te, qui puerum donis corrumpere es ausus,
Rideat adsiduis uxor inulta dolis;
Et quum furtivo juvenem lassaverit _usu,_
Tecum interposita languida veste cubet.
—Tibull. I, IX, 53 sqq.
UVA IMMITIS: Immatura. Libro de praeceptis connubialibus, scripsit
Plutarchus, eos, qui prima virginum dissidia non ferunt, nihil differre
ab illis, qui quum in uvam forte acerbam inciderint, maturas aliis
relinquunt: ac vicissim, novas plerasque nuptas, quae primo congressu
sponsos non ferunt, idem pati quod illi, qui quum apis ictum jam
pertulere, favum aliis concedunt. Unde sententia, exspectandum esse
virginis maturitatem, et crudae indulgendum, dum jugo assueta mitescat.
...tolle cupidinem
_Immitis uvae:_ jam tibi lividos
Distinguit autumnus racemos
Purpureo varius colore.
—Hor. _Od._ II, V, 9 sqq.
UXORES: Pro meretricibus.
Conviva quisquis Zoili potest esse,
Summoenianas coenet inter _uxores_...
—Mart. III, LXXXII, 1 sq.
UXORCULA: In blanditiis.
"Corpusculum melliculum.—Mea _uxorcula_."
—Plaut. _Casin._ IV, IV, 19.
UXORIUS: Qui ignave _uxori_ suae subditus est. Rogatus Metellus, cur
Marci filiam praedivitem, forma nobilem et genere claram, ducere tamen
nollet: _Malo, ait, esse meus quam suus._
"Amanti argento filio auxiliarier Sub imperio vivens volt senex
_uxorio_."
—Plaut. _Asin. argum._ 1 sq.