_ De Heræo (Junonis templo) prope Mycenas — monte Eubœa et Asterione
fluvio — ornamentis Heræi et signis ante illud — Junonis et Hebes
signis in illo — Chryseide sacerdote Junonis. _
Ad lævam Mycenarum stadia quindecim abest Junonis templum. Præter viam
aqua fluit, quæ dicitur Eleutheria. Ea ad expiationes et arcana
sacrificia utuntur templi et sacrorum antistitæ. Templum ipsum in
planiore Eubœæ parte situm est. Eubœan vero montem appellant. Asterionis
etenim amnis filias, Eubœan, Prosymnam, et Acræam, Junonis nutrices
fuisse dictitant: (2) et ab earum una Acrææ montem appellatum, qui ex
adverso Junonis est: ab Eubœa eum montem, in quo templum est: Prosymnam
vero vocatam aream, quæ Junonis templo subjacet. Asterion ipse supra
Junonis templum fluit, ac deinde in specum demersus absconditur. Ad ejus
ripas herba nascitur, quam Asterionem nominant: eam herbam Junoni quum
integram offerunt, tum e foliis coronamenta contexunt. (3) Fani
architectum Argivum Eupolemum produnt. Quæ supra columnas opera sunt, ea
partim ad Jovis natales, partim ad Gigantum cum diis pugnam, partim
etiam ad Trojanum bellum et Ilii eversionem pertinent. Statuæ pro
vestibulo stant, quum feminarum, quæ sacerdotio Junonis functæ fuerint,
tum heroum tam aliorum quam Orestis. Nam quæ nomine Augusti Imperatoris
inscripta est, Orestem illum fuisse asserunt. In pronao sive templi
parte antica ad lævam Gratiarum prisci operis signa exstant: ad dexteram
Junonis lectus. Ibi etiam dedicatum scutum illud, quod Euphorbo quondam
Menelaus in bello Trojano eripuit. (4) Deæ signum in solio sedet eximia
magnitudine, auro et ebore fabricatum, Polycleti opus. Corona capiti
imposita, quæ Gratias et Horas egregie factas habet. Dea manu altera
Punicum malum, altera vero sceptrum tenet. Quæ de malo Punico arcanis
referuntur sacris, silentio prætereo. Cuculum vero avem idcirco sceptro
aiunt impositum, quod virginis Junonis amore captus Juppiter in eam se
avem verterit, quam puella tamquam ludicrum captarit. Hæc ego, et quæ
his sunt similia de diis vulgata, etsi vera neutiquam existimo, non
putavi tamen negligenda. (5) Adstitisse etiam tradunt Junoni Hebes
(_Juventatis_) signum Naucydis arte factum, ipsum etiam ex auro et
ebore. Prope eam est super columna vetus Junonis signum: omnium vero
vetustissimum, e piro silvestri factum: quod quum Pirasus Argi filius
Tirynthem asportasset, Argivi oppido everso in Junonis reportarunt. Ipse
illud vidi sedentis forma, et modica magnitudine. (6) Dona quidem digna
quæ historiæ mandentur, in eo templo sunt: primum ara, in qua cælatæ
Herculis et Hebes nuptiæ, argentea omnia. Deinde pavo ex auro et
fulgidis lapidibus, quem dedicavit Adrianus Imperator. Ea enim Junoni
sacra avis habetur. Aurea deinde corona est, et purpurea palla, Neronis
dona. (7) Sunt autem supra templum hoc antiquioris templi fundamenta, et
si quid aliud reliquum flamma fecit. Crematum illud quidem est, quum
somnus Chrysidem Junonis sacerdotem oppressisset, incensis proximæ
lucernæ lumine coronamentis. Ipsa quidem Chrysis Tegeam ad Aleæ Minervæ
aram supplex confugit: neque tamen ea calamitas Argivos usque eo
commovit, ut ejus statuam dejiciendam putarent. Manet ea adhuc in priore
parte ejus templi, quod conflagrasse diximus.