Hic CORONAEUS, cum Octavium ad responsionem paratum prospiceret ac
diutius de rebus gravissimis protracta disputatio fuisset, coetum
solvens: Post coenam caetera, inquit, ne Octavium de possessione
loquendi dejecisse videamur; tum illud disseretur, si placet, an viro
bono de religione aliter sentire liceat, quam publice profiteatur? Ita,
salutati vicissim, cum summa spe futurae disputationis discesserunt.