A tous ceulx qui ces lettres verront ou orront Guy Crestien, bailli de
Rouen et de Gisors salut. Savoir faisons que au jour d’uy pardevant
nous furent presens maistres Jehan Dusuillot et Pierre de Cracint,
maistres des œuvres de charpenterie et machonnerie du Roy nostre sire
en la viconté de Rouen, qui tesmoingnierent et afermerent par leurs
seremens que le tiers jour de ce present mois de may et es jours
ensuians, yceulx maistres, de nostre commandement à eulx fait à la
requeste de Jehan le dyacre, viconte d’Auge, s’estoient transportés
en chastel de Touque et à Darnestal en Auge, et illec en la presence
de Guieffroi de Craville et de Oisellet de Herouval, escuiers, lors
ayans la garde dud. chastel soubz monseigneur Le Bauduim de la Heuse,
chastellain dud. chastel et en la presence de plusieurs charpentiers,
machons, couvreurs, plastiers et autres ouvriers en ce congnoissans,
avoient fait lire de mot à mot les œuvrez contenuez et diviséez ou
roulle par my lequel ces presentes sont annexées montans par les
partiez contenuez en dit roulle à la somme de six cens soixante sept
liv. nuef s. et ycellez avoient veuez et visitéez et fait veoir et
visiter par les dessus dis le plus diligeaument qu’il avoient peu, et
avoient trouvé tant par eulx que par tous les dessus dis que toutez
ycelles œuvrez estoient faictes et parfaictes bien et loyaument au
prouffit du Roy nostre sire, jouxte ce qui contenu et divisé est en dit
roulle et que toutez les matieres de pierre, de tieulle, d’estende,
de clou, clefs, serreurez et autres choses contenuez en ycelui roulle
estoient bien et loyaument emploiéz, tant endit chastel comme en la
cohue dud. lieu de Darnestal au prouffit du Roy nostre dit seigneur, si
comme dessus est dit, et ces choses ont les dis maistres aferméez et
tesmoingnéez en leurs amez et consciencez. En tesmoing de ce nous avons
mis aus presentez le seel des dis bailliage le XIXe jour de may l’an
mil CCC LXXIX.
(Arch. nat. KK 1338, nº 29.)