Par devant le prevot de Paris Jehan Lesveillié, orfevre, à present
varlet du mestier des orfevres de la ville de Paris afferma... que
les maistres dud. mestier lui avoient... baillié en garde les joyaux
et choses cy après declairéz appartenans à la confrarie S. Eloy des
d. orfevres: 1º une grant croix d’argent dorée pesant dix-huit mars
cinq onces et demie; 2º le baston d’argent à tout le fust pesant dix
mars deux onces et demie; 3º deux chandeliers d’argent pesant cinq
mars et quinze esterlins; 4º deux bacins d’argent pesans quatre mars
une once et quinze esterlins; 5º une porte paix d’argent pesant cinq
onces et dix-sept esterlins; 6º une navete d’argent pesant neuf onces
et quinze esterlins; 7º un vaissel de cuyvre à porter Dieu à trois
escussiaux esmailléz; 8º un livre du service de S. Eloy; 9º un messel
que donna Guillaume Basin et Jehan de Clichy; 10º quatre orilliers à
parer autel; 11º trois draps de soye à parer autel; 12º deux chapes à
tenir cuer; 13º un poile à mettre sur le letrin à chanter; 14º trois
touailles d’autel; 15º trois revestemens de drap d’or tous fourniz;
16º deux paire de draps de soye à mettre l’ymage de S. Éloy; 17º un
poile noir à une croix vermeille pour grans corps; 18º trois aumuces
à prestre; 19º un grant poile viéz à oiseaux; 20º un petit viéz poile
à enfans; 21º un petit poile à un ymage de S. Eloy pour mettre sur
enfans; 22º Un autre petit poile viéz à enfans; 23º deux paremens de
drap d’or à aubes; 24º un poile de samin noir à une croix vermeille;
25º deux surpelis à prestres à une baniere de cendal armoyé des armes
dud. mestier; 26º une croix d’argent pesant treize mars à tout le fust;
27º le baston d’argent d’icelle croix à tout le fust pesant sept mars
six onces; 28º un mors d’argent à chape pesant un marc que donna Jehan
Talemel; 29º deux pommeaux d’argent à chape pesans trois onces et trois
esterlins; 30º un coffre à trois clefs pour mettre le luminaire; 31º
un mors d’argent à chape à un couronnement pesant dix onces; 32º deux
pommeaux d’argent pesans trois onces et demie; 33º deux estuiz pour
les deux croix dessus d.; 34º un poile de drap d’or pour enfans que
donna Jehan du Vivier, orfevre[1171]; 35º un reliquiaire d’argent doré
où est le doy S. Liefroi pesant un marc sanz l’entablement qui est
de cuyvre doré, tous lesquelz joyaux et choses dessus d. led. Jehan
Lesveillié promit garder bien et loyaument et... rendre... aux d.
maistres... _Item_ promist rendre... à ceulx qu’il appartendra et à la
volonté d’iceulx tout ce qui lui sera baillié pour recommander[1172].
Apres ce vindrent... pardevant nous Jehan Verdelet, Raoul le Drugie,
Jehan Bellebouche, Denisot Fautel et Guill. Goulet, tous orfevres...
lesquelx, à la priere et requeste dud. Jehan Lesveillié, se firent...
ses pleges et caucions envers les d. maistres d’icelui mestier
d’orfaverie et, ou cas que aucun d’iceulx joyaux et choses... seroient
perdues ou peries par la deffaulte et coulpe dud. Esveillié, les d.
plaiges gagerent... en nostre main chascun d’eulx pour le tout rendre
et paier... tout ce que d’iceulx joyaulx et autres choses qui aud.
Jehan Lesveillié auroient eté bailliés pour recommander... et tout ce
en quoy ycelui Jehan pourroit estre tenu par quelque maniere et ou d.
cas en firent leur debte desmaintenant. . . . . . . . . . . . . . . . .
. . . . . . . . . . . . . . . . . . . . . . . . . . . . . . . . . . . .
En tesmoing de ce nous avons mis à ces lettres le scel de la prevosté
de Paris l’an de grace mil CCCIIII{xx} et quatre, le mardi vint jours
de septembre. _Item_ le vendredi ensuivant revint... par devant nous
led. Esveillié qui obliga son corps à mettre... en prison fermée oultre
le guichet du Chastellet de Paris et partout ailleurs à ses cous pour
ces lettres acomplir.
(Arch. nat. K 1033-34.)