Den Gaang te a war gywt med _Lavs_
--aa jøsse, jøsse jammen!
da strented a med Gled mi Klaws,
mi Daa gik hen med Gammen.
For bejer Mand war ett end Lavs
--aa jøsse, jøsse jammen--
de skjønnest Ting a fæk tegavs,
og aalti holdt vi sammen.
Men sin saa bløw a gywt med _Klavs_
--aa jøsse, jøsse jammen--
mi Trow a føst haaj gin te Lavs
og no no ga--a hamen!
Men der fæk a sgi hwedt mi Saws!
--aa jøsse, jøsse jammen--
den Klavs det er det bare Snavs,
hwor aalt gaar ud paa Drammen.
Og mæler a en Muk mod Klavs
--aa jøsse, jøsse jammen--
saa brøler han: "Herut, haraus!"
saa rød som Kok i Kammen.
Og blywr æ Gywr ett ssat o Klavs
--aa jøsse, jøsse jammen--
saa skir æ sajtens jetiddavs,
a drowner mæ i Dammen.
17/8 1899.
[Footnote: _strented_, vand Garn; _Klaws_, Garnfed; _hwedt_, hvæsset;
_Gywr_, Gjordene; _jetiddavs_, engang.]