Coment le roy Charles six fu couronné.
L'an de grace mil trois cent quatre-vins devant dit, fu ledit roy
Charles nommé sixiesme couronné à Rains, le dimanche quatriesme jour de
novembre, en la fin de son douziesme an. Et le dimanche ensuivant,
onziesme jour dudit mois, il retourna et entra à Paris à grant
solempnité si comme il appartenoit. Et fu la ville encourtinée, et
furent joustes faites au palais, le lundi et le mardi, des chevaliers et
escuiers qui y estoient.
Le mercredi ensuivant quatorziesme jour dudit mois de novembre, les gens
d'églyse, nobles et des bonnes villes qui avoient esté mandés à Paris de
par le roy furent assemblés au palais en la chambre de parlement. Et là,
en la présence du roy, de ses quatre oncles ducs d'Anjou, de Berry, de
Bourgoigne et de Bourbon, et de pluseurs autres de son sanc, fu proposé
par l'evesque de Beauvais, lors chancelier de France, coment le roy
avoit nécessité d'avoir aide de son peuple, tant pour sa guerre comme
pour son estat maintenir; et leur fu requis que sur ce il eussent advis
et respondissent tant qu'il deust estre agréable au roy.
Et le jeudi ensuivant, par un esmouvement d'aucuns de Paris qui alèrent
au palais, là où le roy et lesdis ducs estoient, pour ce requérir,
furent abattus tous ces aydes qui avoient cours au païs et au royaume
pour le fait des guerres.
Audit mois de novembre, le conte de Flandres, qui estoit à siège devant
Gand, leva le siège et s'en ala demourer à Bruges.