Coment le viconte de Rohan et pluseurs autres nobles du païs de
Bretaigne remandèrent messire Jehan de Montfort qui estoit en
Angleterre.
En celuy temps, le viconte de Rohan et pluseurs autres nobles et autres
du païs de Bretaigne remandèrent messire Jehan en Angleterre, pour le
faire venir en Bretaigne. Et pristrent et occupèrent de fait pluseurs
forteresses qui estoient tenues de par le roy, en venant contre leur
foy, loyauté et seremens; et par espécial, ledit viconte de Rohan, qui
solempnelment avoit juré en la présence du roy et de son conseil à
Paris, comme dessus est dit. Si envoya le roy, tantost que il fust à sa
cognoissance, sur les marches de Bretaigne le duc d'Anjou son frère,
accompaignié de grant foison de gens d'armes. Et aussi estoient sur
lesdites marches pour le roy le connestable d'un costé et le sire de
Cliçon d'un autre. Et tantost que ledit duc d'Anjou fu sur lesdites
marches, ledit viconte de Rohan et les autres qui tenoient la partie
dudit Montfort commencièrent à traictier avec le duc d'Anjou et les gens
du roy. Et ce faisoient-il, si comme pluseurs cuidoient, en attendant la
venue dudit Montfort qui encore n'estoit venu en Bretaigne. Et tantost
pot assez bien apparoir; car celuy traictié ne vint à nulle bonne
conclusion; et par delais fu mené et par continuacion tant que ledit
Montfort fu venu au païs de Bretaigne. Et furent des journées prises
grant foison depuis sa venue, tant au païs de Bretaigne comme ailleurs.
Et de toute celle saison ne fu accordé aucun appointement, jasoit ce que
le roy leur voulsist faire de grace plus que il n'avoient deservi.