Coment le cardinal de Limoges vint à Paris de par le pape Clément, pour
signifier, monstrer et déclarer tout ce qui avoit esté fait de la
nominacion de Berthélemi dont dessus est faite mention; et aussi de
l'esleccion du pape Clément.
Item, en quaresme ensuivant, le cardinal de Limoges vint à Paris, envoié
de par le pape Clément, tant comme messaige, pour signifier, monstrer et
déclarer tout ce qui avoit esté fait de la nominacion de Berthélemi dont
dessus est faite mencion; et aussi de l'esleccion du pape Clément.
Lequel le roy receut à grant honneur et révérence pour l'honneur de
l'église, et aussi pour ce que le roy l'amoit. Et après ce qu'il ot dit
au roy les causes de sa légacion, le roy luy assigna certaine journée en
son chastel du Louvre, pour le oïr publiquement de tout ce qu'il
vouldroit dire. A laquelle journée fu le roy en la grant chambre du
Louvre emprès la sale, assis en sa chaere, et ledit cardinal en une
autre d'encoste luy; et là furent présens pluseurs princes, prélas,
barons, maistres en théologie et docteurs en autres sciences, tant de
l'Université de Paris comme autres; en la présence desquels ledit
cardinal de Limoges relata tout ce qui avoit esté fait à Rome, et la
nominacion en pape qui avoit esté faite dudit Berthélemi, et coment et
par quelle manière et tout le procès, en la manière que contenu est en
la déclaracion dessus escripte. Et tout ce qui estoit contenu en ladite
déclaracion afferma et maintint estre vray, en sa conscience, et sur le
péril de l'ame de luy; et savoit ces choses estre vraies, car il avoit
esté présent et veu et sceu toutes lesdites choses contenues en ladite
déclaracion. Par laquelle affirmacion, s'il y avoit aucun qui eust aucun
scrupule de conscience au contraire, il doit avoir sa conscience toute
appaisiée; car il n'est pas vraisemblable que un homme de telle autorité
et de telle science tesmoignié d'estre preud'homme de tous ceux qui le
cognoissent, se fust voulu dampner, pour amour né pour haine d'homme
vivant.