Des lettres qui furent aportées d'Angleterre.
Le mardi, quinziesme jour du moys de may, furent aportées à Paris
pluseurs lettres closes envoiées d'Angleterre, de pluseurs grans
seigneurs de France et d'autres, par lesquelles on escripvoit que la
paix avoit esté faite entre les roys de France et d'Angleterre le
huitiesme jour dudit moys, et que lesdis roys avoient mangié ensemble et
s'estoient entrebaisiés. Laquelle chose les uns ne créoient point, les
uns pour ce que il ne voulsissent pas, les autres pour ce que par
pluseurs fois avoit ainsi esté mandé et tousjours les Anglois y avoient
mis empeschement; et les autres qui en estoient forment joieux le
créoient.