Le samedi, quatorziesme jour de janvier ensuivant, ledit monseigneur le
duc de Normendie, ainsné fils du roy de France, retourna à Paris de
devers son oncle l'empereur, devers lequel il avoit esté en ladite ville
de Mès, et entra en ladite ville de Paris ledit samedi, environ heure de
vespres. Et en sa compaignie estoit ledit chancelier, nouvel cardinal.
Et leur alèrent à l'encontre jusques oultre saint Anthoine le prévost
des marchans et grant foison des bourgois de ladite ville de Paris. Et
pour la révérence dudit cardinal nouvel, pluseurs des ordres et collèges
de ladite ville luy alèrent à l'encontre à procession jusques au dehors
de Paris.