Le silence est une vertu telle que hors son temps n'est plus vertu. Les
desordres que j'avois veus en la nouvelle France, m'obligerent
puissamment d'en advertir Monseigneur le Duc de Montmorency Viceroy du
païs pour y apporter les remedes necessaires, car les Huguenots tenoient
par tout le dessus dans leurs vaisseaux faisans leurs prières, & nous
contraincts de tenir la proue en chantans les louanges de nostre Dieu,
qu'estoit proprement mettre le trompeur Baal au dessus du vray Dieu.
Et la cause de ce desordre procedoit de ce que les principaux de la
flotte avec la pluspart des officiers estoient de la religion prétendue
& reformée, lesquels avoient esté ozés jusques là, que de chanter de
nouveau leurs marottes, pendant qu'un de nos Frères disoit la saincte
Messe à la Traicte, pour l'interrompre ou le contrarier ce sembloit
tellement que ce n'estoit pas le moyen de planter la foy, où les chefs &
principaux estoient contraires à la mesme foy, mais plustost une
confusion de croyance aux Sauvages, qui s'appercevoient des-ja de nos
differentes manières de servir Dieu, disans que les uns faisoient le
signe de la Croix, & les autres non.
Je dressay donc des memoires lesquels je presentay à ce Seigneur Duc,
qui en desira la lecture & estre luy mesme le gardien de mes cayers pour
les presenter à son conseil, auquel il me pria d'assister, mais qui eut
tant de remise, qu'à la fin je ne m'y pû trouver pour quelque affaire
particulière qui me survint, & à mon deffaut le Pere Irenée y accompagna
nostre R. P. Provincial qui y receut contentement.
Neantmoins à peine l'ordre necessaire est il estably par ce Seigneur Duc
en son conseil, qu'il est mandé pour le service du Roy dans les
gouvernemens, c'est ce qui l'obligea, outre ses autres grandes &
serieuses charges, de se deffaire de la Vice-royanté du Canada, entre
les mains de Monseigneur le Duc de Vantadour son nepveu, lequel suivant
l'intention dudit Seigneur son oncle, nous fist l'honneur de nous
communiquer ses pieux desseins & la volonté qu'il avoit d'establir de
grandes colonies dans le païs, si le mal-heur par l'impuissance ne luy
eue empeché d'esclore ses divins projets.
Nous voyla donc dans de grandes esperances, & selon la grandeur des
choses qu'on nous despeignoit, nous jugeons avec le mesme Seigneur, que
pour entretenir tant de peuplades, continuer la conversion des Sauvages,
& establir des Séminaires par tout pour l'instruction de la jeunesse, il
nous estoit necessaire d'avoir le secours de quelques Religieux rentez,
qui puissent par leurs propre commoditez & moyens, fournir aux frais & à
la nourriture desdits enfans & nouveaux convertis, puis que la compagnie
des marchands s'excusoit sur son impuissance, & nous sur nostre Regle
qui nous deffend les revenus.
Entre tous les Religieux nous proposames les RR. PP. Jesuites, lesquels
comme personnes puissantes pouvoient beaucoup à ces peuples indigens, où
il faut necessairement avoir de quoy donner si on y veut advancer, car
plus on leur donne plus on les attire, & n'ayez pas dequoy les nourrir,
c'est à dire qu'ils vous admireront & peu vous pourront suivre. Ce n'est
pas comme dans les Indes où les habitans n'avoient à faire que du
secours spirituel simplement, là où ceux cy ont affaire de tous les
deux, spirituel & temporel & par ainsi je peux dire asseurement que la
pauvreté de S. François a fait un très grand fruict aux Indes, & que
nous avons eu raison d'appeller le secours des RR. PP. Jesuites au
Canada.
Je sçay bien que nos Pères establirent des Collèges & Séminaires par
toutes les deux Indes avant la venue, des RR. PP. Jesuites, ausquels ils
les cédèrent volontairement à leur arrivée, comme ayans d'ailleurs assez
d'autres occupations à prescher, convertir & confesser par tout où ils
estoient appellez. Mais le Roy d'Espagne y pourvoyoit tellement par la
main de ses officiers, avec d'autres personnes devotes, qu'ils n'y
avoient autre plus grand soin que de catechiser les enfans, les
instruire aux bonnes lettres, & les convertir à Jesus Christ, sans se
mesler des rentes que des personnes honnestes & vertueuses avoient en
maniement, mais icy, comme j'ay dit, il en va tout autrement, car
personne n'a pris soin de nous seconder que de parolle seulement, à la
reserve de quelqu'uns de nos amis.
Ce choix que nous fismes desdits Pere Jesuites pour le Canada, fut fort
contrarié par beaucoup de nos amis, qui taschoient de nous en dissuader,
nous asseurant qu'à la fin du compte ils nous mettroient hors de nostre
maison & du païs, mais il n'y avoit point d'apparence de croire ceste
mescognoissance de ces bons Peres; ils sont trop sages & vertueux pour
le vouloir faire, & quand bien un ou deux particuliers d'entr'eux en
auroient eu la volonté, une hyrondelle ne fait pas un Printemps, ny un
ou deux Religieux la communauté, & par ainsi c'eut esté crime de se
mesfier d'eux, non pas mesme en la pensée, car il paroist que par tout
ailleurs nous avons vescu en paix avec eux.
Pour revenir au sujet de cette proposition, le P. Irenée estant en
l'hostel dudit Seigneur Duc, y arriva fort à propos le R.P. Noirot
Jesuite, auquel ledit P. Irenée ayant fait ouverture de l'affaire, pria
ledit Seigneur de l'agreer comme il fist, aprés que ledit P. Noirot eut
accepté l'offre d'une affection nompareille, (car il estoit fort zelé)
protestant au nom de la compagnie, qu'ils nous en auroient une éternelle
obligation. Quelqu'uns d'eux ensuitte nous vindrent prier de leur faire
part de quelque mémoires de la langue Huronne que j'avois dressez pour
leur servir, lesquels je ne pû leur donner pour lors, n'estans pas
encores en estat.
Les choses estant en telle disposition, il fut question de faire passer
au conseil dudit Seigneur & de la compagnie des Marchands tout ce qui
estoit de cet accommodement, & devions nous y trouver ensemble avec eux,
mais n'ayans pas esté adverty du jour, lesdit Peres y assisterent sans
nous, & à mesme temps partirent pour Dieppe, où des-ja estoit arrivé
pour le mesme voyage le Pere Joseph de la Roche Daillon Recollect, avec
un jeune Sauvage Canadien, qui depuis cinq ans avoit esté envoyé en
France par nos Religieux de Kebec, lequel après avoir esté bien
instruict & endoctriné aux çhoses de la foy, fut baptizé & nommé par
deffunct Monsieur le Prince de Guimenée son parrain. Pierre Anthoine,
qu'il entretint aux estudes jusques après sa mort, que l'enfant fut
congru en la langue Latine, & si bon François, qu'estant de retour à
Kebec nos Religieux furent contraints le renvoyer pour quelque temps
entre ses païens, afin de reprendre les idées de la langue maternelle
qu'il avoit presque oubliée, dequoy il fit quelque difficulté au
commencement, car comme le P. Joseph le Caron Supérieur de Kebec, luy
eut proposé cette obedience, il le pria les larmes aux yeux de l'en
vouloir dispenser, disant: comment mon Pere vostre Reverence voudroit
elle bien me renvoyer entre les bestes qui ne cognoissent point Dieu,
mais le Pere luy repartit que c'estoit pour leur faire cognoistre, &
pour raprendre la langue maternelle qu'il l'y envoyoit, afin d'ayder à
sauver ses parens & tous ceux de sa Nation, après quoy il obéit & se
disposa pour partir, duëment instruit de la manière comme il se devoit
gouverner parmy ses gens, sans courir risque de son salut.
Dés le lendemain matin estant en ville, je rencontray fort à propos une
personne de qualité interessée dans le party, avec lequel m'abouchant il
m'advertit de tout le resultat du conseil, & comme les RR. PP. Jesuites
avoient obtenu la nourriture de deux de nos Religieux, de six que la
compagnie nous entretenoit de tout temps, & par ainsi réduit nostre
nombre de six à quatre, qui ne fut pas pris à bonne augure.
Cet advertissement donné, je fus trouver Monseigneur le Duc de
Vantadour, auquel je fis mes plaintes, & le priay d'y remedier, comme il
fist promptement, commandant au sieur Girard son Secrétaire d'en escrire
de sa part à Messieurs les Directeurs & Chefs de l'embarquement à
Dieppe, afin qu'ils advertissent les RR. PP. Jesuites, que l'intention
de compagnie n'estoit pas qu'ils prissent part à la nourriture de six
Recollects, que depuis plusieurs années en ça, les compagnies anciennes
& nouvelles, avoient entretenus dans le Canada, autrement qu'il leur
revoquoit son consentement, à quoy les Pères obéirent promptement, & se
submirent aux volontez dudit Seigneur Duc.
Cette petite action n'a neantmoins en rien altéré l'amour & le respect
que nous avons à ces grands hommes, je dis grands pour ce qu'ils le sont
en effect de prudence & de science, prudens & respectueux dans un point,
qui les maintiendra tousjours dans la vertu, & le bon odeur de ceux qui
sçavent qu'aux Religions, où la civilité & le respect réciproque manque,
la vertu manque aussi, il ne s'ensuit pas pour cela qu'il ne se puisse
glisser de petits manquemens dans les compagnies les mieux reglées & les
maisons les mieux policées. Les plus grands Saincts ont eu quelquefois
des débats, mais qui ont trouvé leur mort aussitost que leur naissance.
Toutes choses estant en bon ordre & l'equipage dans les vaisseaux, on se
mist sous voille aprés les prières accoustumées, mais si favorablement
qu'ils traverserent ce grand Ocean sans aucun peril, & si heureusement
qu'en un temps tres-court en comparaison de l'ordinaire, ils arriverent
avec contentement dans ce desiré port de Kebec, où ils furent receus des
hyvernans, (c'est ainsi qu'on appelle les habitans de Kebec) avec la
joye & la courtoisie qu'ils pouvoient esperer de ceux, qui esperoient
encore plus d'eux à cause de leur necessité.
Or comme c'est l'ordinaire que les choses sainctes sont tousjours
contrariées en leur commencement, & que de tant plus le diable en
prevoit de pertes, plus il se roidit contre icelles par toutes sortes de
voyes pour les empecher s'il pouvoit. Les RR. PP. Jesuites n'estoient
pas encores sorty des barques, qu'ils furent advertis qu'il n'y avoit
point d'ordre de les loger à Kebec ny au fort, & tellement esconduis
qu'on parloit des-ja de les repasser en France, ce fut un mauvais salut
pour eux, & une facheuse attaque, capable d'estonner des personnes moins
constantes. Mais nos Freres prenans part dans les interests de ces bons
Peres sçachans cette disgrace, leur offrirent charitablement, & les
mirent en possession cordiallement, de la juste moitié de nostre maison
(à leur choix) du jardin & tout nostre enclos, qui est de fort longue
esteudue fermé de bonnes pallissades & pièces de bois, qu'ils ont
occupez par l'espace de deux ans & demy.
De plus ils leur presterent une charpente toute disposée & preste à
mettre en oeuvre, pour un nouveau corps de logis, d'environ 40 pieds de
longueur, & 28 de large, & en l'an 1627 ils leur en presterent encore
une autre que nos Religieux avoient derechef fait dresser pour aggrandir
nostre Convent, lesquelles ils ont employées à leur bastiment commencé
au delà de la petite riviere sept ou 800 pas de nous, en un lieu que
l'on appelle communement le fort de Jacques Cartier.
Et pour vous monstrer comme en effet nos Religieux seuls sont cause
aprés Dieu que les dits RR. PP. Jesuites sont establis dans le Canada
(ce que nous avons fait pour estre assistés en la conversion des
Sauvages,) voicy ce que le R.P. Lallemant superieur de leurs Peres en
Canada, en escrivit au sieur de Champlain, par une lettre dattée du 23
Juillet 1625 & une autre du mesme jour & an, à nostre R.P. Provincial.
_MONSIEUR,_
_Nous voicy graces à Dieu dans le resort de vostre
Lieutenance où nous sommes heureusement arrivez, aprés avoir
eu une des belles traverses qu'on aye encor experimenté,
Monsieur le General aprés nous avoir déclaré qu'il lui
estoit impossible de nous loger ou dans l'habitation ou dans
le fort, & qu'il faudrait ou, repasser en France, ou nous
retirer chez, les Peres Recollects, nous a contraint
d'accepter ce dernier offre. Les Peres nous ont receus avec
tant de charité qu'il nous ont obligez, pour un jamais.
Nostre Seigneur sera leur recompence. Un de nos Pères estoit
allé à la traicte en intention de passer aux Hurons ou aux
Hiroquois, avec le Père Recollect qui est venu de France
selon qu'ils adviseroient avec le Père Nicolas, qui se
devoit treuver à la traicte & conferer avec eux, mais il est
arrivé que le pauvre Pere Nicolas au dernier saut s'est
noyé, ce qui a esté cause qu'ils sont retournez, n'ayans ny
cognoissance, ny langue, ny information: nous attendons donc
vostre venue pour resoudre ce qui sera à propos de faire.
Vous sçaurez, tout ce que vous pourrez desirer de ce pays du
P. Joseph, c'est pourquoy je me contente de vous asseurer
que je suis, Monsieur, Vostre très-affectionné serviteur,
Charles Lalemant. De Kebec ce 28 Juillet 1625._
Mon Reverend Pere,
_Pax Christi._
_Ce seroit estre par trop mescognoissant de ne point escrire
à vostre Reverence, pour la remercier tant des lettres qui
furent dernièrement escrites en nostre faveur aux Pères qui
sont ici en la nouvelle France, comme de la charité que nous
avons receues desdits Peres, qui nous ont obligez pour un
jamais, je supplie nostre bon Dieu qu'il soit la grande
recompence & des uns & des autres, pour mon particulier
j'escris à nos Superieurs, que j'en ay un tel ressentiment
que l'occasion ne se presentera point que je ne le fasse
paroistre, & les supplie quoy que d'ailleurs bien
affectionné de tesmoigner à tout vostre sainct Ordre le
mesme ressentiment. Le P. Joseph dira à vostre Reverence le
sujet de son voyage pour le bon succez duquel, nous ne
cesserons d'offrir & prieres & sacrifices à Dieu, il faut
ceste fois advancer à bon escient les affaires de nostre
Maistre, & ne rien obmettre de ce qu'on pourra s'adviser
estre necessaire, j'en ay escrit à tous ceux que j'ay creu y
pouvoir contribuer que je m'asseure s'y emploieront si les
affaires de France le permettent, je ne doute point que
vostre Reverence ne s'y porte avec affection & ainsi,_
virtus unita _fera beaucoup d'effet, en attendant le succez
je me recommande aux saincts Sacrifices de vostre Reverence,
de laquelle je suis._