_Vocabulum _Dæmonialitatis_ primo inventum reperio a Jo. Caramuele in
sua _Theologia fundamentali_, nec ante illum inveni Auctorem, qui de hoc
crimine tanquam distincto a _Bestialitate_ locutus sit. Omnes enim
Theologi Morales, secuti D. Thomam, 2.2., q. 154. _in corp._, sub
specie _Bestialitatis_ recensent _omnem concubitum cum re non ejusdem
speciei_, ut ibi loquitur D. Thomas, et proinde Cajetanus, in
Commentario illius quæstionis et articuli, 2.2., q. 154., ad 3. dub.,
coitum cum Dæmone ponit in specie Bestialitatis; et Cajetanum sequitur
Silvester, vº _Luxuria_, Bonacina, _de Matrim._, q. 4., et alii._