Monstrueuse guerre. Les autres agissent au dehors, ceste-cy encore
contre soy: se ronge et se defaict, par son propre venin. Elle est
de nature si maligne et ruineuse, qu’elle se ruine quand et quand le
reste: et se deschire et despece de rage. Nous la voyons plus souuent,
se dissoudre par elle mesme, que par disette d’aucune chose necessaire,
ou par la force ennemie. Toute discipline la fuït. Elle vient guerir
la sedition, et en est pleine. Veut chastier la desobeissance, et en
montre l’exemple: et employee à la deffence des loix, faict sa part
de rebellion à l’encontre des siennes propres. Où en sommes nous?
Nostre medecine porte infection.--En ces maladies populaires, on peut
distinguer sur le commencement, les sains des malades: mais quand
elles viennent à durer, comme la nostre, tout le corps s’en sent, et
la teste et les talons: aucune partie n’est exempte de corruption. Car
il n’est air, qui se hume si gouluement: qui s’espande et penetre,
comme faict la licence. Nos armees ne se lient et tiennent plus que par
simant estranger: des François on ne sçait plus faire vn corps d’armee,
constant et reglé. Quelle honte! Il n’y a qu’autant de discipline,
que nous en font voir des soldats empruntez. Quant à nous, nous nous
conduisons à discretion, et non pas du chef; chacun selon la sienne:
il a plus affaire au dedans qu’au dehors. C’est au commandement de
suiure, courtizer, et plier: à luy seul d’obeïr: tout le reste est
libre et dissolu. Il me plaist de voir, combien il y a de lascheté
et de pusillanimité en l’ambition: par combien d’abiection et de
seruitude, il luy faut arriuer à son but. Mais cecy me deplaist de
voir, des natures debonnaires et capables de iustice, se corrompre tous
les iours, au maniement et commandement de cette confusion. La longue
souffrance, engendre la coustume; la coustume, le consentement et
l’imitation. Nous auions assez d’ames mal nées, sans gaster les bonnes
et genereuses, =III=, 354.
Les guerres ciuiles ont cela de pire que les autres guerres, de
nous mettre chacun en echauguette en sa propre maison. C’est grande
extremité, d’estre pressé iusques dans son mesnage, et repos
domestique, =III=, 424.
En ces temps, on battisoit les vices publiques de mots nouueaux plus
doux pour leur excuse, abastardissant et amollissant leurs vrais
titres, =I=, 178.
Ce qui fait voir tant de cruautez inouies aux guerres populaires,
c’est que cette canaille de vulgaire s’aguerrit, et se gendarme, à
s’ensanglanter iusques aux coudes, et deschiqueter vn corps à ses
pieds, n’ayant resentiment d’autre vaillance. Comme les chiens coüards,
qui deschirent en la maison, et mordent les peaux des bestes sauuages,
qu’ils n’ont osé attaquer aux champs, =II=, 570.
La cause des loix, et defence de l’ancien estat, a tousiours cela, que
ceux mesmes qui pour leur dessein particulier le troublent, en excusent
les defenseurs, s’ils ne les honorent, =III=, 86.
Mais il ne faut pas appeler deuoir, vne aigreur et vne intestine
aspreté, qui naist de l’interest et passion priuee, ny courage,
vne conduitte traistresse et malitieuse. Ils nomment zele, leur
propension vers la malignité, et violence. Ce n’est pas la cause qui
les eschauffe, c’est leur interest. Ils attisent la guerre, non par ce
qu’elle est iuste: mais par ce que c’est guerre, =III=, 86.
Sur tout il se faut garder qui peut, de tomber entre les mains d’vn
Iuge ennemy, victorieux et armé, =I=, 88.
Confessons la verité, qui trieroit de l’armée mesme legitime, ceux
qui y marchent par le seul zele d’vne affection religieuse, et encore
ceux qui regardent seulement la protection des loix de leur pays, ou
seruice du Prince, il n’en sçauroit bastir vne compagnie de gens-darmes
complete. D’où vient cela, qu’il s’en trouue si peu, qui ayent maintenu
mesme volonté et mesme progrez en nos mouuemens publiques, et que
nous les voyons tantost n’aller que le pas, tantost y courir à bride
aualée? et mesmes hommes, tantost gaster nos affaires par leur violence
et aspreté, tantost par leur froideur, mollesse et pesanteur; si ce
n’est qu’ils y sont poussez par des considerations particulieres et
casuelles, selon la diuersité desquelles ils se remuent? =II=, 120.