En celle saison mesme arriva au port d'Acre un vaillant homme du royaume de
France bon crestien et de grant cuer, conte de Tholouse; Alphons avoit nom,
fils le bon conte Raymont qui fu si bon prince et fist de si grans euvres
au premier ost des barons quant il prisdrent Antioche et Jhérusalem. Moult
avoit-on cestui attendu longuement en la terre de Surie. Car il avoient
espérance qu'il leur deust tenir grant lieu contre les ennemis de la foy.
De soy estoit-il saige et de grant emprise; mais encore l'honnouroit-on
plus en la terre de Surie pour son père que pour luy. Grans biens eust fait
au pays, mais trop tost fu désavancié: car quant il vint d'Acre pour aller
en Jhérusalem pour véoir le sépulcre et les autres sains lieux, et vint en
la cité de Césaire qui siet en la marine, illecques un fils du déable, l'en
ne scet qui ce fu né pour quoy il le fist, mais il l'empoisonna de venin
qu'il mist en sa viande. Tantost fu mort le preudomme; grant deul en firent
riches et povres par toute Surie.