_Coment l'empereur d'Alemaigne s'en parti de Constantinoble, li et son ost
qui remés li fu, et ala parfaire son pélerinage en la sainte cité de
Jherusalem._
[678]Conrat l'empereur d'Allemaigne avoit séjourné tout l'iver en la cité
de Constantinoble et l'empereur Manuel luy avoit assez fait mains
compaignies et mains honneurs, si comme il afferoit à si haut homme. Quant
le nouveau tems fu venu, l'empereur Conrat eut volenté de parfaire son
pellerinage et d'aller en Jhérusalem. L'empereur Manuel luy fist
appareiller la navie telle comme elle avoit mestier à luy et à ses gens;
grant plenté de riches dons luy envoya au départir. Il entra en mer et les
barons avec luy qui demourés estoient. Si eurent bon vent si que il ne
demoura guères qu'il arrivèrent au port d'Acre. En la ville séjournèrent un
peu, et puis montèrent ès chevaux et vindrent en Jhérusalem. Le roy
Baudouin et le patriarche Foucher luy vindrent au devant à grant compaignie
de chevaliers, de barons et de bourgeois. Les clercs furent revestus et le
menèrent à procession dedens la cité, le peuple le receut à grant joye.