_Coment le prince d'Antioche reçut le roy de France et ses gens en sa cité,
moult honnorablement, et puis le voult traïr._
[676]Raimons le prince d'Antioche oï la nouvelle que le roy Loys de France
estoit arrivé en sa terre et près de luy: grant joye en eut, car il avoit
moult désirée sa venue. Il prist avec luy des greigneurs barons de sa terre
et belle compaignie d'aultres gens et luy alla au devant: grant joye luy
fist et grant honneur, dedens la cité d'Antioche le mena luy et toute sa
gent. Le clergié et le peuple de la ville le receurent à procession moult
honnorablement et liement. Le prince se péna de faire quanqu'il cuida qui
deust plaire au roy. En France mesme quant il oï dire qu'il estoit croisié
luy avoit-il envoié grans présens et riches joyaulx pour ce qu'il avoit
espérance que par l'ayde des François il deust conquerre cités et chasteaux
sur ses ennemis et croistre bien en loing la puissance de la cité
d'Antioche, bien cuidoit estre seur que la royne de France Alienor luy
deust aydier et mettre son seigneur en telle volenté; cuar ele venoit en
celui pélerinage, et estoit niepce le prince, fille de son frère ainsné le
conte Guillaume de Poictiers. De tous les barons de France qui avec le roy
estoient venus n'en y eut oncques nul à qui le conte ne fist grant honneur;
et donna grans dons à chascun selon ce qu'il estoit. Par les hostels les
alloit veoir, de parolles s'acointa à chascun moult honnorablement et
débonnairement. Tant se fioit en l'ayde du roy qu'il luy fu jà advis que
les cités de Halape, Césaire et les autres forteresses aux Turs qui près de
luy estoient venissent légièrement en sa main. Sans faille ce peust bien
estre advenu qu'il pensoit, sé le roy eust eu volenté de ce enprendre, car
les Turs avoient grant paour de sa venue, si qu'il ne pensoient mie à tenir
contre luy leurs forteresses, ainsois avoient certain propos de tout
laissier et de fouyr s'il adressoit celle part.