Par ces parolles et par autres semblables fu le roy apaié; et manda à
Hues-le-Grant que il issist tantost de Normandie; et luy manda telles
parolles, que foie chose estoit de donner si grant povoir à aucuns sur la
gent dont il se peust aydier à son besoing et dont il peust user par droit
sans contredit. Moult fu Hues-le-Grant couroucié de ce mandement, mais
toutesfois s'en issi-il tantost de Normandie et commanda à sa gent qu'il se
tenissent de rapines. Après un pou, se parti le roy de Rouen et fist un
prévost en la cité, qui avoit nom Raoul et du seurnom la Torte, qui de par
luy receut les rentes et détermina les causes et les besoingnes. Si
mauvaisement se contint qu'il estoit plus cruel que les paiens. Tous les
moustiers et les églyses qui avoient esté arses au temps de persécucion
abattoit jusques aux fondemens et faisoit porter la pierre pour
rappareiller les murs de Rouen. Le moustier de Nostre-Dame de Jumèges
abatty, et l'eust tout abattu sé ne fust un clerc, Climent avoit nom, qui
en racheta deulx tours par déniers qu'il donna aux ouvriers. Les deux tours
demourèrent en estat jusques au temps l'archevesque Robert, qui celle
abbaye restora. Et quant le roy eut ainsi faite sa volenté si s'en retourna
à Loon.