_Du mandement Loys à Charles son frère, et de la response. Et d'une
incidence. Des griefs et du dommage que les Sarrasins firent au roy Loys au
retour de Bonivent. Et puis de Rollant, archevesque d'Arle, et puis des
Normans, et de la mort la royne Hermantrude et du mandement l'apostoile à
Charles-le-Chauf._
De Mez se départit le roy et s'en ala à Floringues[20]: et quant il eut là
ordonné ce que bon luy sembla, il s'en ala chascier[21] en la forest
d'Ardennes. Entre ces choses advint que son frère Loys fit paix aux
Wandres[22], sous une condition dont l'histoire ne parle mie. Pour celle
paix confirmer y envoya ses fils et aucuns marchis de sa terre; car il
demoura malade en la cité de Ragenbourg[23]. Au roy Charles manda par ses
messages les convenances qui estoient entre eux deux et de sa partie du
royaume Lothaire, et le roy Charles luy remanda responses souffisans à ce
qu'il lui avoit mandé.
Note 20: _Floringues_, aujourd'hui _Floringhem_, dans le département
du Pas-de-Calais, arrondissement de Saint-Pol-sur-Ternoise, canton
d'Heuchin. Latinè: _Florinkengas_.