L'an mille trois cens quatre-vingt et quatre, les trefves qui avoient
esté pourparlées entre les ducs de Berry et de Lenclastre à Calais,
furent derechef publiées et par terre et par mer, et assez
conpetemment gardées.
Et délibéra le duc de Berry d'aller visiter le pape en Avignon. Et en
y allant, il vint nouvelles audit duc que les païsans, laboureurs, et
gens mécaniques en Auvergne, Poictou et Limosin, se mettoient sus, et
tenoient les champs, et faisoient maux innumérables, et firent un
capitaine nommé Pierre de Bruyères. Et quand ils trouvoient nobles
gens, ou bourgeois, ils mettoient tout à mort, et les tuoient. Ils
rencontrèrent un bien vaillant homme d'armes et noble d'Escosse, et
luy mirent un bacinet tout ardent sur la teste, et piteusement le
firent mourir. Ils prindrent un prestre, et luy coupèrent les doigts
de la main, luy escorchèrent la couronne, et puis le boutèrent en un
feu, et le bruslèrent. Ils trouvèrent un Hospitalier, et le prindrent,
et pendirent à un arbre par les aisselles, et le transpercèrent de
glaives, viretons et sagettes, et ainsi mourut. Et ne sçauroit-on
songer, dire, ni penser maux qu'ils ne fissent, et les plus grandes
cruautés et inhumanités que oncques furent faites. Et pour ce le duc
de Berry assembla des nobles et des gens de guerre, dont il fina[120]
assez aisément, et sceut où lesdites communes estoient. Et à un matin
frappa sur eux, et ne firent guères de résistance, et légèrement
furent desconfits, et grande foison en y eut de tués sur le champ, et
de prins, lesquels furent tous pendus. Et les autres se mirent en
fuite, et retournèrent à leurs maisons labourer, comme ils faisoient
paravant, et furent délaissés, et leur fut tout pardonné. Et de cet
exploit fut le duc de Berry moult loué et recommandé, et s'en alla
outre vers le pape. Lequel quand il sceut sa venue, il envoya des gens
de son palais et serviteurs, et si envoyèrent tous les cardinaux, et
fut grandement et honorablement receu par le pape, lequel le festoya,
et fit festoyer en plusieurs et diverses manières.
[120] Trouva.