A tres haut prince son tres cher seignior e neveu Philippe, par la
grace de dieu Roi de France, Challes par icelle meisme grace Roy de
Jerhusalem e de Sezile, Saluz e bone amour e soi appareillie a son
plaisir. Sire, nous vous feisons assavoir que lile de Sezile est
revelee contre nous; la quele chose nous porroit torner a grant damage,
se nous ni metions hastif conseil: e por ce, bieus nies, nous avons
tres grant besoign davoir avecques nous grant plante de bones genz
darmes. Et avons mande priant a nostre neveu Robert, Conte Dartois, que
il doie venir a nous avec quelques cinc cenz homes darmes. Dont nous
vous prions, bieus nies, e requirons que il vous plaise que li devant
diz cuenz nostre niez veigne a nous o tout les cinc cenz homes darmes;
e li facez prester tant de vostre monoie par quoi ou les devant diz vc
homes darmes puisse venir tantost a nous. E tout ce que vous nous farez
savoir par vos lectres que vous li alez fait prester, nous le vous
ferons rendre en France. E nous avons mande par noz letres a nostre
cher neveu le comte Dartois, que il doie venir a nous avecques les
devant diz vc homes, e que vous li farez delivre la monoie que mestier
sera pour lui e pour eaus. E sil avenoit, sire, que li devant diz cuenz
nostre nies eust ensoigne du cors, dont dieu le gare, par quoi il ne
peust venir. Nous vous prions, sire, que vous nous envoiessiez un bon
capitaine avecques les devant diz vc homes darmes. Donné a Naples, le
ix iour de may de la X Indiction (1282).
_Dagli Archivi del reame di Francia_, J. 513 e 49.