P. 21, l. 4: assés.--_Ms. A 17_: bien.
P. 21, l. 9: vivres.--_Le ms. A 15 ajoute_: en paiant leurs deniers.
§ =477=. Quant il furent.--_Ms. d’Amiens_: Quant il furent parvenu
jusques en l’ost dou roy Edouwart, li chevalier d’Engleterre qui
avoient esté à Paris, li racontèrent tantost le très grande honneur
et feste que on leur avoit fait à Paris, et li moustrèrent les nobles
jewiaux que on leur avoit donnés: de quoy li roys eut grant joie. Si
festia grandement ces seigneurs franchois qui là estoient venu pour
ses gens conduire, ensi que dit est. Si vint à l’endemain li roys
englès en le cité de Cartres, et alla en grant devotion à l’eglise
de Nostre Damme, et aucun des seigneurs d’Engleterre. Et y donna li
roys grans dons et biaux jeuiaux, et ossi fissent li seigneur; puis
s’en partirent et chevauchièrent leur chemin bellement et ordonneement
deviers Normendie et par deviers le Pont de l’Arche, pour passer là
endroit la rivierre de Sainne, si qu’il fissent. Et partout là où il
venoient, il trouvoient les bonnes villes ouvertes pour passer tout
oultre, et tout chou qu’il leur besongnoit à vendre pour marchiet
raisonnable. Si passoient bellement et courtoisement oultre, et se
logoient en villes campestres; car vous devés savoir que, sitost que li
pès fu parfaite et acordée, on le fist nunchier et criier par tout le
royaumme de Franche, les cités et les bonnes villes: par quoy chacun
pooit savoir qu’il devoit faire. Et li roys englès faisoit toudis ses
marescaux chevauchier derierre, pour garder que ses gens ne fesissent
forche, villonnie ne outraige à nullui, ne par nuit, ne par jour. Quant
li Englès furent parvenus jusques au Pont de l’Arce, ilz se logièrent
environ. L’endemain au matin, li roys se parti de ses gens et s’en
alla en petite compaignie par deviers un port de mer que on claimme
Harflues. Là trouva il de ses vaissiaux qui estoient nouvellement venu
d’Engleterre.
Li roys d’Engleterre monta en mer à Harflues, pour revenir arrierre
en Engleterre. Et ses gens passèrent le rivierre de Sainne au Pont à
l’Arche, et cheminèrent bellement et courtoisement parmy le pays, enssi
que dit est, tant qu’il vinrent à Pekegny. Si passèrent là endroit le
rivière de Somme et fissent tant, en cheminant, qu’il parvinrent à le
forte ville de Callaix. Adonc prissent li Franchois congiet d’iaux, qui
les avoient courtoisement conduis; et li Englez s’appareillièrent pour
passer oultre en Engleterre, chacuns enssi que mieux peult. Et ossi
chacuns des gens d’armes estranges s’en ralla en son pays, mès petit en
y avoit.
Et si trestost que li roys Edouwars fu venus à Londres à tel compaignie
qu’il avoit, et qu’il eut estés festiiés et conjoïs de madamme la
roynne d’Engleterre, sa femme, il s’en alla au plus tost qu’il peult,
là où li roys Jehans de Franche gisoit, et l’amena à son pallais à
Wesmoustier, à Londres, où il fu festiiés et honnourés grandement dou
roy d’Engleterre et de madamme le roinne, dou prinche de Gallez, qui
point ne le haioit, dou duc de Lancastre et de tous les seigneurs
enssuiwant d’Engleterre. Et estoit adonc li roys Jehans de Franche
logiés en l’ostel de Savoie, messires Phelippes, ses filz, avoecq lui,
messires Jaquemes de Bourbon, messires Jehans d’Artois, li comtez de
Dammartin, li comtes de Tamkarville, li comtes d’Auçoire et li autre
seigneur de Franche qui furent pris à le besoingne de Poitiers. Là
eult grans festez et grans reviaux entre le roy de France et le roy
d’Engleterre, et festioient de disners et de souppers si grandement
l’un l’autre c’à merveilles. Et durèrent ces festes quinze jours. Et
donnoient li doy roy les plus nobles mengiers à court ouverte que on
se pooit esmervillier où on prendoit chou que on y despendoit, car
chacuns s’efforchoit de sourpasser son compaignon. Quant chou fu passet
et on eult appareilliet le roy de Franche de si nobles atours que à tel
prince appartenoit, li roys englès et si enfans, li dus de Lancastre et
tout li autre grant seigneur le amenèrent jusques à Douvres sus le mer,
à très grant noblèce. Et envoya li roys englès le prinche de Galles
son fil, le duc de Lancastre, le comte de Warvich, monseigneur Regnart
de Gobehen, monseigneur Gautier de Mauny, le seigneur de Perssi et
grant fuisson de seigneurs avoecq le dit roy Jehan jusques à Callais,
enssi que couvenenchiet estoit, et li fissent toutte l’onneur, l’amour
et le compaignie que faire li peurent et si comme à lui appartenoit.
Et attendirent à Calais les seigneurs de Franche assés longement, qui
devoient aporter six fois cent mil florins et entrer en hostaige, ensi
que li pais faite et acordée entr’iaux portoit. Fº 124.
P. 21, l. 13: dignes.--_Ms. A 17_: nobles. Fº 281.
P. 21, l. 13: les dignes jeuiaus.--_Ms. A 8_: les dignitez et les
joyaulx. Fº 222.--_Ms. A 15_: les grans dignitez et joiaulx. Fº 242 vº.
P. 21, l. 19: traisissent.--_Ms. A 8_: retraissent.--_Mss. A 15 à 17_:
se retraissent arrière.
P. 21, l. 21: le Somme.--_Ms. A 8_: la rivière de Somme.