eurent fait che pour quoi il estoient là venu, il se
departirent et passèrent la rivière et vinrent à Brainforde,
10 et toudis tenant leur oppinion d’abatre à destre et à
senestre devant eux hostels et mansions d’avocas et
de procureurs. Ne nul n’en deportoient, et copèrent
en venant à pluiseurs hommes les testes et cheminèrent
tant qu’il vinrent à quatre lieues de Londres, et se
15 logièrent sour une montaigne que on appelle ou païs
Blaquehède, c’est à dire en françois la Noire Bruière,
et dissoient en venant que il estoient au roi et au noble
commun d’Engletière.
Quant cil de Londres seurent que il estoient si priès
20 d’eux logiés, il fremèrent le porte dou pont de la
Tamise et i missent gardes; et ceste ordonnance fist
faire li maires de Londres, sire Jehans Walourde, et
pluiseurs rices bourgois de Londres qui n’estoient pas
de leur sexte, mais il en i avoit en Londres de menues
25 gens plus de trente mille.
Adont eurent avis chils peuples, qui estoit logiés sour
la montaigne de Blaquehède, que il envoieroient leur
chevalier devers le roi parler à li qui estoit en la Tour,
et li manderoient que il venist parler à eux, et que
30 tout ce que il faisoient, c’estoit pour li, car li roiaulmes
d’Engletière un[e] grant fuison d’ennées avoit esté mal
[103] gouvrenés à l’honneur dou roiaulme et au pourfit du
menu peuple, et par ses oncles et par son clergiet et
princhipaument par l’arcevesque de Cantorbie, son
cancelier, dont il voloient ravoir compte.
5 Li chevaliers n’osa dire ne faire dou contraire, que
il ne venist sus le Tamisse à l’encontre de la Tour, et
se fist naviier oultre l’aighe. Li rois et cil qui estoient
ou castiel de Londres, qui desiroient à oïr des nouvelles,
quant il veïrent le batelet venir fendant la
10 Tamisse, si dissent: «Vechi aucune ame qui nous
aporte nouvelles!» Et estoient, je vous di, en grant
doubtance là dedens. Evous venir au rivage le chevalier:
on li fist voie; on le mena devant le roi qui estoit
en une cambre, le princesse sa mère dallés li et ses
15 deus frères, messire Thumas le conte de Kemt, messire
Jehans de Hollandes, le conte de Sasebry, le conte de
Waruich, le conte d’Asquesuffort, l’archevesque de
Cantorbie, le grant prieux d’Engletière dou Temple,
messire Robert de Namur, le signeur de Vertaing, le
20 signeur de Gommegnies, messire Henri de Senselles,
le maire de Londres et aucuns bourgois notables de
Londres, qui tout se tenoient dalés le roi. Li chevaliers
messires Jehans Meuton, qui bien fu cogneus entre
iaulx, car il estoit officiers dou roi, se mist en genous
25 devant le roi, et li dist: «Mon très redoubté signeur,
ne voelliés mies prendre en desplaissance le mesage
que il me convient faire, car, chiers sires, c’est de
force que je sui venus si avant.»--«Nenil, dist li
rois, messire Jehan, dites che dont vous estes cargiés:
30 je vous tieng pour excusé.»--«Très redoubtés
sires, li communs de vostre roiaulme m’envoie
devers vous pour traitiier, et vous prient que vous
[104] voelliés venir parler à eux sus la montaigne de la
Blaquehède, car il ne desirent nullui à avoir que vous;
et n’aiés nulle doubtance de vostre personne, car il
ne vous feront ja mal, et vous tiennent et tenront tousjours
5 à roi; mais il vous monsteront, che dient, pluiseurs
coses qui vous sont necessaires à oïr, quant il
parleront à vous, desquels coses je ne sui pas cargiés
de vous dire. Mais, très chiers sires, voelliés moi donner
response telle qui les apaisse et que il sachent de
10 verité que j’aie esté [devers] vous, car il ont mes
enffans en ostages pour moi vers euls et les feroient
morir, se je ne retournoie.» Respondi li rois: «Vous
arés response, et tantos.»
Adont se consilla li rois, et demanda quel cose estoit
15 bonne à faire de ceste requeste. Li rois fu adont consilliés
que le matin le joedi il venissent aval sus la
rivière de Tamisse et que sans faute il iroit parler à
eulx. Quant messires Jehans Meuton eut celle response,
il ne demanda plus: il prist congiet au roi et as
20 barons et rentra en son batiel et rapassa la Tamisse,
et retourna sus la montaigne où il avoit plus de soissante
mille hommes, et leur donna response que à
l’endemain au matin il envoiaissent leur conseil sus la
Tamisse, que li rois venroit là parler à eux. Ceste
25 responsse leur plaissi grandement, et s’en contentèrent
tout, et passèrent le nuit au mieux qu’il peurent. Et
sachiés que les quatre pars d’eus junèrent par deffaute
de vivres, car il n’en avoient nuls, dont il estoient
tout courouchiet, et c’estoit raisons.
30 § 216. En che tamps estoit li contes de Bouquighem
en Galles, car il i tient bel hiretage et grant de par sa
[105] femme, qui fu fille au conte de Norhantonne et de
Herffort; mais la vois estoit tout commune aval Londres
que il estoit avoeques che peuple, et dissoient li aucun
pour certain que il l’i avoient veu, pour un Thomas,
5 qui trop bien le resambloit, de la conté de Kemt, qui
estoit entre eulx.
Li contes de Cambrage et li baron d’Engletière, qui
gissoient à Pleumonde et qui apparilloient leurs vaissaulx
pour aler en Portingal, estoient tout enfourmé
10 de ceste rebellion et dou peuple qui se commenchoit
à eslever: si se doubtèrent que leurs voiages n’en fust
rompus ou que li communs d’Engletierre, de Hantonne,
de Wincestre et de le conté d’Arondiel ne les
venist courir sus. Si desancrèrent leurs nefs et issirent
15 hors dou havene à grant painne et à vent contraire,
et se boutèrent en le mer, et là ancrèrent, atendant vent.
Li dus de Lancastre, qui estoit sus marce entre le
Mourlane, Rosebourc et [Miauros], et qui là parlementoit
as Escos, estoit ossi tous enfourmés de ceste rebellion
20 et de sa personne en grant doubte, car bien savoit
que il estoit petitement en le grace dou commun d’Engletière;
mais nonobstant toutes ces coses, [si] demenoit
il moult sagement ses traitiés envers les Escochois. Li
contes [de] Douglas, li contes de Mouret, li contes de
25 Surlant, messires Thumas de Verssi et chil Escot, qui
pour le roi et le païs d’Escoche faissoient et menoient ces
tretiés, savoient bien toute la rebellion d’Engletière et
comment li peuples se commenchoit de toutes pars à
rebeller contre les nobles; si dissoient: «Engletière
30 gist en grant branle et peril que de estre toute destruite.»
Et vous di que ens leurs traitiés il s’en tenoient
plus fort enviers le duc de Lancastre et son conseil.
[106] Or parl[er]ons dou commun d’Engletière, comment
il perseverèrent.
§ 217. Quant che vint le jour du Saint Sacrement
au matin, li rois Richars d’Engletière oï messe en la
5 Tour de Londres, et tout li signeur. Apriès messe, il
entra en sa barge, li contes de Sasleberi, li contes de
Waruich, li contes d’A[cque]sufort et aucun chevalier
en sa compaignie, et naviièrent à rimes pour venir
oultre la Tamisse sour le rivage, en alant vers le Rideride,
10 un manoir dou roi, où plus avoit plus de dis mille
bons hommes qui là estoient descendu de la montaigne,
pour veoir le roi et pour parler à lui. Quant il veïrent
la barge dou roi venir, il commenchièrent tout à huer
et à donner un si grant cri que che sambloit proprement
15 que tout li diable d’infer fussent venu en leur
compaignie. Et vous di que il avoient amené messire
Jehan Meuton, leur chevalier, avoecques euls, à le fin
que, se li rois ne fust venus et que il l’euissent trouvé
en bourde, il l’eussent devoret et detrenchiet pièce à
20 pièce. Tout che li avoient il proumis.
Quant li rois et li signeur veïrent che peuple qui
enssi se demenoit, il n’i ot si hardi que tout ne fuissent
effraé, et n’eut mies li rois conseil des barons qui là
estoient que il presist terre, mais commenchièrent à
25 wauler la barge amont et aval sus le rivière, et dont
dist li rois: «Signeur, que vollés vous? Dites le moi.
Je sui chi venus pour parler à vous.» Il li dirent de
une vois, chil qui l’entendirent: «Nous volons que
tu viegnes sus terre, et nous te monsterons et dirons
30 plus aissiement che qu’il nous fault.» Adont respondi
li contes de Sasleberi pour le roi, et dist: «Signeur,
[107] vous n’iestes mies en estat ne en arroi que li rois
doie maintenant parler à vous.» A ces mos, il n’i ot
plus riens dit. Li rois fu consilliés dou retourner, et
retourna ens ou castiel de Londres, dont il estoit
5 partis.
Quant ces gens veïrent que il n’en aroient autre
cose, si furent tout enflamé d’aïr et retournèrent en
la montaigne où li grans peuples estoit, et recordèrent
comment on leur avoit respondu et que li rois estoit
10 rallés en la Tour à Londres. Adont criièrent il tout
de une vois: «Alons tos à Londres!» Lors se missent
il au chemin, et s’avalèrent sus Londres, en fondeflant
et abatant manoirs d’abés, d’avocas et de gens de
court, et vinrent en es fourbous de Londres qui sont
15 grant et bel. Si i abatirent pluiseurs biaulx hostels,
et par especial il abatirent les prisons dou roi que
on dist les Mareschauchies, et furent delivret tout li
prisonnier qui dedens estoient; et fissent en ces fourbous
moult de desrois, et manechoient à l’entrée dou
20 pont ceulx de Londres pour tant que il avoient clos
les portes dou pont, et dissoient que il arderoient tous
leurs fourbours et conqueroient Londres par force, et
l’arderoient et destruiroient toute.
Li communs de Londres (moult en i avoit, qui
25 estoient de leur acord) se missent ensamble et demandèrent:
«Pour quoi ne laist on ces bonnes gens entrer
en la ville? Ce sont nos gens, et tout ce qu’il font, c’est
pour nous.» Adont de force il convint que les portes
fuissent ouvertes. Si entrèrent ens ces gens tous afamés,
30 et se boutèrent tantos par ces maisons bien
pourveues de pourveances, et s’ataquièrent au boire
et au mengier. On ne leur veoit riens, mais estoit on
[108] tout rebrachiet de faire bonne chière et de mettre avant
vivres et boires, pour iaulx apaissier.
Adont s’en alèrent les cappitainnes, Jehan Balle,
Jaque Strau et Vautre Tieullier, tout droit parmi
5 Londres, en leur compaignie plus de trente mille
hommes, à l’ostel de Savoie, ou chemin de Wesmoustier
le palais dou roi, un très bel ostel seant sus le
Tamisse et hostel au duc de Lancastre. Tantos il
entrèrent ens et tuèrent les gardes et l’ardirent en
10 feu et en flame. Quant il eurent fait cel outrage, il ne
se cessèrent mies atant, mais s’en alèrent à le maison
de l’Oppitalier de Rodes, que on dist Saint Jehan
de [Calerwille], et ardirent maison, hospital, moustier
et tout. Avoec tout ce, il allèrent de rue en rue, et
15 tuèrent che jour tous les Flamens que il trouvèrent en
eglises, en moustiers et en maisons partout, ne nuls
n’estoit deportés. Et efforchièrent pluiseurs maisons
de Lombars et prissent des biens, qui dedens estoient,
à leur vollenté, car nuls ne leur ossoit aler au devant.
20 Et tuèrent un rice homme en la ville, que on appelloit
Richart Lion, auquel, dou tamps passé, en France,
Wautre Tieullier, ens es guerres, avoit esté varlès;
mais Richart Lion avoit une fois batu son varlet. Si
l’en souvint et i mena ses gens, et li fist coper la teste
25 devant li et mettre sus une glave et porter parmi les
rues de Londres. Enssi se demenoit cils mescheans
peuples comme gens foursenés et esragiés, et fissent
ce joedi moult de desrois parmi Londres.
§ 218. Quant che vint sus le soir, il s’en vinrent
30 tout logier et amaignagier en le place que on dist
Sainte Katerine, devant le Tour et le castiel de Londres,
[109] et dissent que jamais de là ne partiroient si aroient
eu le roi à leur vollenté, et leur aroit acordé tout che
que il demandoient; et dissoient oultre que il voloient
conter au cancelier d’Engletière et savoir que li grans
5 avoirs que on avoit levé parmi le roiaulme d’Engletière
puis cinc ans estoit devenus, et, se il n’en rendoit
boin compte et souffissant à leur plaissance, mal
pour lui. Sus cel estat, quant il eurent tout le jour fait
parmi Londres as estraingniers des mauls assés, se
10 logièrent il devant la Tour.
Si poés bien croire et savoir que ce estoit grans
hideurs pour le roi et pour ceuls qui là dedens avoec
lui estoient, car à le fois chils mescheans peuples
huoit si hault que il sambloit que tout li diable d’infer
15 fuissent entre iaulx. Sus le soir avoient eu en conseil
li rois d’Engletière, si frère et si baron qui en la Tour
estoient, parmi l’avis de sire Jehan Walourde, maieur
de Londres, et de aucuns bourgois notables de Londres,
que sus le mienuit on venroit tout armet par quatre
20 rues de Londres courir sus ces mescheans gens, qui
bien estoient soissante mille, entrues que il dormiroient,
car il seroient tout enivré, et en tueroit on
otant que de mousches, car, de vint, un il n’en i aroit
nul armet, et vous di que ces bonnes gens et rices
25 gens de Londres estoient bien aissiet de tout che faire,
car il avoient en leurs maissons repus secretement
leurs amis et leurs varlès, qui estoient tout armet. Et
ossi messires Robers Canolles estoit en son hostel et
gardoit son tresor à plus de sis vint compaignons tous
30 aprestés, qui tantos fuissent sailli avant, se il en
euissent esté manchevi; ossi fust messire Perducas de
Labret, qui pour che tamps estoit à Londres. Et se
[110] fuissent bien trouvet entre set et uit mille hommes
tous armés; mais il n’en fu riens fait, car on doubta
trop le demorant dou commun de Londres, et dissent
li sage au roi, li contes de Sasleberi et li autre: «Sire,
5 se vous les poés apaissier par belles parolles, c’est le
milleur et le plus pourfitable, et leur acordés tout ce
que il demandent liement, car, se nous commenchiens
cose que nous ne peuissiens achiever, il n’i aroit jamais
nul recouvrier que nous et nos hoirs ne fuissons desert
10 et Engletière toute deserte.» Cils consaulx fu tenus,
et contremandés li maires que il se tenist tous quois et
ne fesist nul samblant de esmeutin. Il obeï: che fu
raissons. En la ville de Londres avoecques le maieur
a douse eschevins; li noef estoient pour li et pour le
15 roi, sicom il le monstrèrent, et li troi de la sexte [de]
ce mescheant peuple, sicom il fu puisedi sceu et cogneu,
dont il [le] comparèrent moult chier[em]ent.
§ 219. Quant che vint le venredi au matin, chils
peuples qui estoit logiés en la place de Sainte Cateline
20 devant le Tour se commenchièrent à aparillier et à
criier moult hault et à dire que, se li rois ne venoit
parler à eux, il assauroient le castiel et le prenderoient
de force et ociroient tous ceuls qui dedens estoient.
On doubta ces manaces et ces parolles, et eut li rois
25 conseil que il isteroit parler à euls, et leur envoia dire
que il se traïssissent tout au dehors de Londres en
une place que on dist le [Milinde], une moult belle
prée, [où] les gens vont esbattre en esté, et là leur
acorderoit li rois et [otroieroit] tout che que il
30 demanderoient. Li maires de Londres leur noncha tout cela
et fist le crit de par le roi que, qui voloit parler au roi,
[111] il alast en le place dessus dite, car li rois iroit sans
faute.
Adont se commenchièrent à departir ces gens les
communs des villages et iaus à traire et à aler celle
5 part, mais tout n’i alèrent mies, et n’estoient mies
tout de une condition, car il en i avoit pluiseurs qui
ne demandoient que le rihote et le destrution des
nobles et Londres estre toute courue et pillie. Che
estoit le principaulx matère pour quoi il avoient
10 commenchiet, et bien le monstroient, car, sitrestos que la
porte dou castiel fu ouverte et que li rois en fu issus
et si doi frère, li contes de Sasleberi, li contes de
Waruich, li contes d’Aquesufort, messires Robers de
Namur, li sires de Vertaing, li sires de Goumegnies
15 et pluiseur autre, Wautre Tieullier, Jaques Strau et
Jehan Balle et plus de quatre cent entrèrent ens ou
castiel et l’efforchièrent, et sallirent de cambre en
cambre et trouvèrent l’arcevesque de Cantorbie, que
on appeloit Simon, vaillant homme et preudomme
20 durement, cancelier d’Engletière, liquelx avoit tantos
fait le divin office et celebré messe devant le roi; il
fu pris de ces gloutons et là tantos decollés. Ossi fu li
grans prieus de Saint Jehan de l’Ospital et uns frères
meneurs, maistres en medechine, liquels estoit au duc
25 de Lancastre; et pour che fu il mors ou despit de son
maistre, et uns sergans d’armes dou roi, que on appelloit
Jehan Laige, et ces quatre testes missent il sus
longes glaves et les faissoient porter devant iaulx parmi
les rues de Londres; et, quant il eurent assés [joué],
30 il les missent sus le pont de Londres, comme il euissent
esté traïteur au roi et au roiaulme.
Encores entrèrent cil glouton en la cambre le princesse
[112] et despecièrent tout son lit, dont elle fu si eshidée
que elle s’en pasma, et fu de ses varlès et [camberières]
prise entre leurs bras et aportée bas en une
posterne sour le rivage et misse en un batiel, et de là
5 acouverte et amenée [par la rivière en la Riole, et puis
menée] en un hostel que on dist la Garde Robe la
Roïne; et là se tint tout le jour et toute la nuit, enssi
que une femme demi morte, tant que elle fu reconfortée
dou roi, son fil, sicom je vous dirai ensieuant.
10 § 220. En venant le roi en celle place que on dist
la Millinde au dehors de Londres, s’emblèrent de li,
pour le doutance de la mort, et se boutèrent hors de
sa route si doi frère, li contes de Kemt et messires
Jehans de Hollandes. Ossi fist li sires de Goumegnies,
15 et s’en ala avoecq eulx, et ne s’osèrent amonstrer au
peuple en celle place de la Milinde.
Quant li rois fu venus, et li baron dessus nommé
en sa compaignie, en la place de la Milinde, il trouva
plus de soissante mille homme[s] de divers lieux et
20 de divers villages des contrées d’Engletière. Il se mist
tout enmi eux et leur dist moult doucement: «Bonnes
gens, je sui vostres rois et vostres sires. Que vous
fault? Que vollés vous dire?» Adont respondirent cil
qui l’entendirent et dissent: «Nous volons que tu
25 nous afranchisses à tous les jours dou monde, nous,
nos hoirs et nos terres, et que jamais nous ne soions
tenu ne nommé serf.» Dist li rois: «Je le vous
acorde. Retraiiés vous bellement en vos lieux et en vos
maissons, enssi que vous estes chi venu par villages
30 et laissiés de par vous de cascun village deus ou trois
hommes, et je leur ferai escripre à pooir lettres et
[113] seeler de mon seel, que il en reporteront avoec euls
quitement, liegement et francement tout ce que vous
demandés. Et, afin que vous en soiés mieux conforté
et aseuré, je vous ferai par senescaudies, par casteleries
5 et par mairies delivrer mes banières.»
Ces parolles apaissièrent grandement ce menu
peuple, voire les simples et les novisses et les boines
gens qui là estoient venu, et ne savoient que il se
demandoient, et dissent tout hault: «C’est bien dit!
10 C’est bien dit! Nous ne demandons mieux.» Velà
che peuple apaissiet, et se commenchièrent à retraire
en Londres.
Encores leur dist li rois une parolle qui grandement
les comptenta: «Entre vous, boines gens de la conté
15 de Kemt, vous arés une de mes banières, et vous, cil
d’Exsexes, une, et cil de Sousexses, une autre, et cil
de Beteforde, une otant bien, et cil de Cambruge, une,
cil de Gernemue, une, cil de Stafort, une, cil de Line,
une; et vous pardonne tout ce que vous avés fait
20 jusques à ores, mais que vous sieuwés mes banières
et en rallés en vos lieux sour l’estat que j’ai dit.» Il
respondirent tout: «Oïl.»
Enssi se departi chils peuples et rentra en Londres,
et li rois ordonna plus de trente clers che venredi,
25 qui escripsoient lettres à pooir et seeloient et delivroient
à ces gens. Et puis se departoient cil qui ces
lettres avoient, et s’en ralloient en leurs nations, mais
li grans venins demoroit derière, Wautre Tieullier,
Jaque Strau et Jehan Balle, et disoient, quoique cils
30 peuples fust apaissiés, que il ne se partiroient pas
enssi; et en avoient de leur [acort] plus de trente
mille. Si demorèrent en Londres et ne pressoient point
[114] trop fort à avoir lettres ne seaulx dou roi, mais
metoient toute leur entente à bouter tel tourble en le
ville que li riche homme et li signeur fuissent mort
et leurs maisons fustées et pillies. Et bien s’en doubtoient
5 li Londriien: pour ce se tenoient il pourveu
dedens leurs hostels tout quoiement de leurs varlès et
de leurs amis, cascuns selonc sa poissance. Quant
cils peuples fu ce venredi apaissiés et retrais en
Londres, et que on leur delivroit lettres seellées à tous
10 lés, et que il se departoient sitretos que il les avoient
et en ralloient vers leurs villes, li rois Richars s’en
vint en le Riolle en la Garde Robe la Roïne, dist on,
où la princesse sa mère estoit retraite toute effraée.
Si le reconforta, enssi que bien le seut faire, et demora
15 avoecques li toute celle nuit.
Encores vous voel jou recorder de une aventure qui
avint, par ces maleoites gens, devant la chitté de Norduich
et par un cappitaine que il avoient, que on
appelloit Willaume Listier, liquels estoit de Stafort.
20 § 221. Che propre jour dou Sacrement, que ces
mescheans gens entrèrent en Londres et que il ardirent
l’ostel de Savoie et le moustier et le maison de l’Ospital
de Saint Jehan dou Temple, et que le prison dou
roi que on dist [Nieugate] fu par euls rompue et brisie
25 et tout li prisonnier delivret, et que il fissent tous ces
desrois que vous avés oï recorder, estoient cil des
contrées que je dirai premierement de Stafort, de Line,
de Cambruge, de Beteforde et de Gernemue tout
eslevé et assamblé, et s’en venoient à Londres devers
30 leurs compaignons, car enssi l’avoient il ordonné, et
estoit leurs cappitains uns garnemens qui s’appelloit
[115] Listier. En leur chemin, il s’arestèrent devant Norduich,
et en venant il en faissoient aler avoecq eux toutes
gens, ne nuls villains ne demoroit derière. La cause
pour quoi il s’arestèrent devant Norduich, je le vous
5 dirai.
Il i avoit un chevalier cappitaine de la ville, qui
s’appelloit messires Robers Salle. Point gentils homs
n’estoit, mais il avoit la grace, le fait et le renommée
de estre sages et vaillans homs as armes, et l’avoit
10 fait pour sa vaillance li rois Edouwars chevalier, et
estoit de membres li mieux tournés et li plus fors
homs de toute Engletière. Listiers et ses routes s’avissèrent
que il enmenroient che chevalier avoec eux et
en feroient leur souverain cappitainne: si en seroient
15 plus cremu et miex amé. [Si] li envoiièrent dire que il
venist as camps parler à euls, ou il asauroient la citté et
l’arderoient. Li chevaliers regarda que il valoit mieux
que il alast parler à eulx, que il fesissent cel outrage; si
monta sus son cheval et issi tous seuls hors de la ville,
20 et vint parler à euls. Quant il le virent, il li fissent très
grant chière et l’onnourèrent moult, et lui prièrent
que il vosist deschendre de son cheval et parler à
eulx. Il descendi, dont il fist folie. Quant il fu descendus,
il l’environnèrent, et puis commenchièrent à traitier
25 moult bellement, et li dissent: «Robers, vous
estes chevaliers et uns homs de grant creance en ce
païs et de renommée, moult vaillans homs, et, quoique
vous soiiés tels, nous vous connissons bien. Vous
n’estes mies gentils homs, mais fils d’un villain et
30 d’un machon, sicom nous sommes. Venés ent avoecques
nous, vous serés nos maistres, et nous vous
ferons si grant signeur que li quars d’Engletière sera
[116] en vostre obeïssance.» Quant li chevaliers les oï parler,
[si] li vint à grant contraire, car jamais n’euist
fait ce marchiet; et respondi, en iaulx regardant moult
fellement: «Arière, mescans gens, faus et mauvais
5 traïteur que vous estes! Volés [vous] que je relenquisse
mon naturel signeur pour telle merdaille que
vous estes, et que je me deshonneure? J’aroie plus
chier que vous fuissiés tout pendut, enssi que vous
serés, car vous n’arés autre fin.» A ces cops il quida
10 remonter sur son cheval, mais il fali de l’estrier, et
li chevaulx s’effrea. Adont huèrent il à lui et criièrent:
«A le mort!» Quant il oï ces mos, il laissa aler son
cheval et traïst une belle longhe espée de Bourdiaux
que il portoit, et vous commenche à estoriier et à faire
15 place autour de li, que ce estoit grans biautés dou
veoir, ne nuls ne l’ossoit aprochier. Aucun l’aprochoient,
mais, de cascun cop qu’il jettoit sur euls, il
leur coppoit ou piet ou teste ou brach ou gambe, ne
il n’i avoit si hardit qui ne le resongnast; et fist là cils
20 messires Robers tant d’armes que merveilles. Mais
ces mescans gens estoient plus de quarante mille: si
jettoient, traioient et lanchoient sur li, et il estoit tous
desarmés, et, au voir dire, se il eust esté de fier ou
d’achier, [si] convenist il que il fust demorés; mais il
25 en tua tous mors douse, sans ceuls que il mehaigna et
afolla. Finablement il fu aterrés, et li decoppèrent les
jambes et les bras, et le detrenchièrent pièce à pièce.
Enssi fina messires Robers Salle, dont che fu damages,
et en furent depuis en Engletière courouchiet tout li
30 chevalier et escuier, quant il en seurent les nouvelles.