_Cómo non debe aprender física nin leyes ningunt religioso._
Física nin leyes non tovo por bien santa eglesia que [903] aprendiese
ningunt home despues que fuese de órden de religion: et esto les
defendió porque algunos hi habie que por tentacion del diablo habian
sabor de dexar sus monesterios et de andar por el mundo para facer mas
á su guisa, et encobriéndose con estas dos razones: los unos que iban
á aprender física por que podiesen mantener á los frades en salud,
et guarescerlos quando enfermasen en sus monesterios; et los otros
las leyes porque podiesen amparar las cosas de sus monesterios et de
sus mismos lugares. Onde porque ellos querien facer mal en semejanza
de bien, estableció santa eglesia que sus perlados les defiendan que
non aprendan ninguno destos saberes: et si les demandasen licencia
para ir á aprenderlos, que non gela den por ninguna manera. Et si
algunt religioso salier del monesterio con entencion de aprenderlos
despues que hobiese fecho profesion, solamiente por el fecho mismo
es descomulgado el que lo feciere, et el que fuere su mayoral débelo
facer saber al obispo en cuyo obispado fuere el monesterio quel faga
denunciar por atal: et eso mismo debe facer el obispo en cuyo obispado
fuere á estudiar, et ellos son tenudos de lo complir.