Madame, aulx choses, que Vostre Majesté verra en la lettre du Roy, je
n'ay que adjouxter icy davantaige sinon l'instance, que les seigneurs
de ce conseil m'ont faicte, de leur bailler ung semblable escript de
ma main pour la seurté de la parolle et promesse de Voz Majestez sur
la mainlevée, au XXVe de ce moys, des biens des Anglois arrestez en
France, et sur la seurté et liberté de leur commerce par dellà, après
qu'elle sera faicte, comme ilz m'ont faict délivrer un acte de leur
conseil pour la restitution des prinses au proffict de voz subjectz et
pour le libre commerce d'iceulx par deçà, après le dict XXVe du
présent; ce que je leur ay ottroyé, et les Srs. Vimont et Cavellier,
depputez de Roan qui estoient icy, s'estantz très bien acquictez de
leur debvoir, et ayant emporté le dict acte de ce conseil, et obtenu,
avant partir, tout ce qui s'est peu faire par justice, sont desjà en
chemyn pour aller faire exécuter la dicte mainlevée à Callais et à
Roan; à quoy, Madame, j'estime que Voz Majestez auront desjà mandé de
n'y faire aulcune difficulté ainsy que je vous en ay cy devant
supliez; et parce que j'entendz que quelques ungs, sans rayson, s'y
veulent opposer, je vous suplie, Madame, en faire encores rafreschir
le commandement à Mr. de La Meilleraye et à Mr. de Gordan, affin de ne
donner à ceulx cy aulcune occasion de se plaindre.
Les protestantz publient que monsieur l'Admyral ayant joinct avecques
luy les troupes du comte de Montgommery et des Viscomtes, et ayant
confirmé ses aultres forces tant d'Allemans que Françoys, s'est remiz
en campaigne et qu'il s'achemine vers la Charité pour empescher qu'on
n'y mette le siège et pour aller, tout d'ung trait, recuillir les
trouppes du duc de Cazimir, affin de recommancer et continuer la
guerre plus forte que jamais; ce que je metz peyne de dissuader à
ceulx qui desirent icy l'advantaige de Voz Majestez, leur remonstrant
qu'il s'en fault tant que ceulx de la Rochelle n'entrepreignent, à
ceste heure, de tenir la campaigne qu'au contraire ilz craignent
grandement d'estre assiégez dans leur fort, ce que je vouldrois leur
pouvoir confirmer par lettres de Voz Majestez, mais il y a long temps
que je n'en ay receu aulcune.
Au surplus, Madame, je vous suplie considérer l'estat de la Royne
d'Escoce sur le contenu de ces petites lettres qu'elle vous escript,
et me donner quelque argument de la pouvoir aultant consoller en
vostre nom, comme, en vostre mesmes nom, je metz peyne de procurer
avec toute instance sa liberté, son bon trettement et sa restitution à
sa couronne. Et espérant qu'il vous aura pleu me renvoyer desjà
quelq'un des miens, qui sont par dellà, affin de vous en dépescher
incontinent ung aultre comme il est besoing, je n'adjouxteray icy,
pour le surplus, qu'une très dévotte prière à Dieu, etc.
De Londres ce XIIe de novembre 1569.
Aulcuns, naguières arrivez icy de la Rochelle, disent que la Royne de
Navarre, et madame la Princesse de Condé avec ses petitz enfans,
estoient en propos de s'embarquer pour passer en ce royaulme.