Sire, ma précédante dépesche est du Ve de ce moys par le Sr. d'Amour,
et despuys, s'estant espandu divers bruictz par deçà des choses de
France, j'ay toutjour attandu qu'il m'en vînt quelque confirmation par
lettres de Voz Majestez, mais voycy le XXXIIIIe jour que je n'en ay
receu aulcune, et n'ay layssé pourtant d'espérer et de faire espérer à
ceulx, qui vous sont icy bien affectionnez, beaulcoup mieulx de voz
affaires, sellon la victoire qu'il a pleu à Dieu vous donner,
qu'aulcuns principaulx protestantz de ce royaulme ne les publient.
Lesquelz usent de tout artiffice de nouvelles controuvées pour garder
que ceulx de leur party n'ayent la cause de ceulx de la Rochelle pour
si habandonnée qu'ilz n'essayent encores, par aulcun nouveau renfort
de reytres et par quelque contribution d'icy, de les secourir, dont
ceulx, qui aujourduy manyent seulz l'estat de ce royaulme, craignantz
que vostre victoire ayt esbranlé les fondemens de leur religion par la
chrestienté, vont faisant tout à descouvert de grandes dilligences
affin de les relever en France, de les confirmer en Allemaigne et les
asseurer icy; ayant, incontinent après les nouvelles de la dicte
victoire, faict dépescher la flotte des Anglois à la Rochelle pour ne
laysser d'y continuer leur traffic, et pour accommoder ceulx du lieu
de quelques deniers en change de leur vin et sel, et n'ozantz d'eulx
mesmes leur envoyer monitions ny vivres de ce royaulme, ilz ont
procuré que le Sr. Dolovyn et le bastard de Briderode leur en ayent
desparty largement du butin qu'ilz ont faict vers Olande et Frize; et
sont après à dépescher Quillegrey, avec l'homme du comte Pallatin, qui
est icy, pour aller encourager et anymer par grandes persuasions et
promesses les princes d'Allemaigne au secours de monsieur l'Admyral,
dont je crains qu'ilz hastent [le duc de] Cazimir de se mettre en
campaigne avant la fin de l'yver. Et dedans cestuy leur royaulme, qui
est le lieu où ilz se trouvent les plus empeschez, ilz ont envoyé
ordonnance et commissions par toutes les provinces pour réprimer les
catholiques et authoriser les protestans; et n'estimantz encores cella
suffizant, ont commandé ung guet et garde en armes en divers endroitz,
lequel a esté commancé de faire despuys quatre jours ez rues et
carrefours de ceste ville et le relèvent seulement à midy et à
minuict; et ont aussi envoyé, despuis huict jours, nouvelles
monitions et pouldres à leurs grandz navyres; et m'a l'on dict que
Haquens faict dilligence d'armer encores sept aultres bons vaysseaulx
de guerre, mais l'on me veult faire croyre que c'est pour ung nouveau
voyage qu'il entreprend aulx Indes, et que les plus grandz de ce
royaulme font les frays non sans opinion que ceste Royne mesmes y
contribue, parce que on prend les monitions de la Tour, mais nul de
ses propres vaysseaulx n'y va, affin de n'offancer le Roy d'Espaigne.
De ma part j'ay aulcunement suspect le dict apareil, et crains qu'il
se faict pour secourir ceulx de la Rochelle, estant le commun bruict
icy que vostre armée les va assaillir, et que mesmes vous avez pour
cella faict arrester aulcuns navyres anglois à Bourdeaulx en les
payant, affin de les assiéger par mer et par terre. Il est vray qu'il
n'y a encores rien d'ordonné touchant les hommes et les vivres pour le
dict armement de ceulx cy, sinon seulement quelques milliers de
biscuyt, et j'auray l'oeil à ce qui s'y ordonnera davantaige pour vous
en advertir incontinent.
Aulcuns ont miz grand peyne envers ceste princesse de luy faire avoir
suspect le traffic des aultres endroictz de vostre royaulme, sinon de
la Rochelle, pour avoir meilleure colleur d'y adresser toutjour les
flottes de ce royaulme, mais elle m'a néantmoins fort libérallement
accordé qu'après la mainlevée et restitution faicte de chacun costé,
au XXVe de ce moys, elle veult que le commerce mutuel d'entre voz deux
royaulmes soit ouvert, et aille libre comme auparavant. Par ainsy ne
fault doubter, quoy qu'advienne de ceulx de la Rochelle, que les
merchantz ne les délayssent d'eulx mesmes, quant cella sera faict,
pour ressortir ailleurs où bon vous semblera; dont adviserez, Sire,
comme il sera bon d'y procéder, car si Vostre Majesté veult que cella
se face par proclamation, je presseray ceulx de ce conseil d'envoyer
publier et notiffier, par leurs villes et portz et tout le long de
leur coste, la continuation et seurté du dict commerce avecques la
France, ce qui ne plairra guières à ceulx qui vous vouldroient desjà
veoir en guerre de ce costé.
Ceulx cy sentent qu'avec la division de la religion la cause de la
Royne d'Escosse va divisant et mettant en grand trouble tout leur
royaulme, dont, pour y cuyder remédier ilz font observer et garder de
fort prez la dicte Dame, laquelle s'en met en frayeur pour aulcunes
rigueurs et contrainctes qu'on luy use, de quoy je suys extrêmement
marry; mais il n'y a ordre que je puysse, pour ceste heure, obtenir
rien de plus gracieulx pour elle de ceste Royne, sa cousine, ny de
ceulx de son conseil, n'ayant toutesfoys layssé de dire et faire en
leur endroict tout ce qui convient pour protester ung grande revanche
contre ceulx qui seront cause ou de son mal ou de la perte de son
estat, et n'ay poinct cogneu, au parler de ceste princesse, ny des
dictz [seigneurs] de son conseil qu'on veuille rien attempter de
viollant ny d'indigne contre la personne de la dicte Dame, sinon
seulement de garder qu'elle ne puisse practiquer qu'avec ceulx qui
l'ont en garde. Néantmoins elle a trouvé moyen, nonobstant cella, de
me faire tenir quatre petites lettres, qui sont cy encloses, que je
croy qu'elle les a escriptes sans lumyère, desquelles je m'asseure que
Voz Majestez seront meues à compassion et seront convyées luy assister
et de secourir son chasteau de Dombertran.
Le duc de Norfolc est toutjour en la Tour, et les gardes luy ont esté
ces jours passez redoublés. Le comte d'Arondel et milord de Lomelley
sont encores en arrest, mais avec quelque liberté de s'aller promener
à cheval, accompaignez d'aulcuns gentishommes qui sont commiz à les
garder. Le comte de Pembrot, ayant avec grande démonstration de
malcontantement requis d'estre deschargé de la Grand Mestrize
d'Angleterre et de n'estre plus du conseil, pour se retirer chez luy,
a esté licencié d'aller en sa mayson prez de Londres, mais non
deschargé de ses estatz.
L'ambassadeur d'Espaigne s'en est retourné en cette ville, et le
marquis de Chetona est demeuré encores à Coulbronc, qui de rechef a
heu audience de ceste Royne, mais ne sçay encor ce qu'il y a négocié;
tant y a qu'ayant semblé une foys que tout son affaire fût interrompu,
l'on a despuys remandé les depputez pour faire encores ung
abouchement, affin de renouer les matières, et, dans peu de jours, se
verra ce qui s'en doibt espérer, aydant le Créateur auquel je prie,
etc.
De Londres ce XIIe de novembre 1569.