Sire, ayant, le XIIIe du présent, receu les lettres de Voz Majestez du
dernier du passé, j'ay estimé vous en debvoir donner adviz, et vous
dire par mesme moyen, Sire, qu'encor que ceulx cy ayent, du
commancement, quant ilz sont tumbez en ceste grande souspeçon et
deffiance du duc de Norfolc, exécuté plusieurs choses assés
violentement, ilz se sont néantmoins despuys ung peu modérez, de sorte
que les pacquetz se conduysent assés seurement. Et ceulx de ce conseil
monstrent, à ceste heure que le dict duc est dans la Tour, procéder
par quelque ordre et forme de justice à luy faire son procès, et
semble qu'on n'a encores trouvé sur les comtes d'Arondel, de Pembrot,
ny sur millord de Lomelley, de quoy les envoyer à la dicte Tour; tant
y a qu'on les tient soubz estroicte garde, et a l'on envoyé le dict
[millord] de Lomelley en une mayson forte prez de Vuyndesor, et miz le
dict comte d'Arondel dans le colliège du dict Vuyndesor, et icelluy
[comte] de Pembrot, pour estre vieulx et impotant, demeure resserré en
son logis; et d'abondant l'on a arresté prisonniers le Sr. de
Trokmarthon et le Sr. Roberto Ridolfy; et se dict qu'on a mandé le
comte de Sussex comme souspeçonné de ces affaires et pareillement le
millord Scrup, beau frère et inthime amy du dict duc, et plusieurs
aultres seigneurs du quartier du Nort; mais l'on ne sçait encores
s'ilz viendront.
Les commissaires à faire ce procès sont:--le millord Quiper, garde des
sceaux, le marquis de Norampton, le comte de Betfort, mestre
Quenolles, ser Raf Sadeler, ser Vuater Mildmey et le secrétaire
Cecille,--lesquelz, parce qu'ilz sont toutz personnaiges triez et
choysiz protestans, et fort affectionnez à ceulx de la Rochelle, je
crains leur présente authorité, mesmement que ceulx là ny sont plus,
qui sembloient tenir la main à l'entretennement de la paix entre ces
deux royaulmes.--Le comte de Lestre n'assiste plus à leur procédure,
ains sort du conseil aussi tost qu'on vient à toucher le faict de ces
seigneurs.
Il y a quelque aparance que la Royne d'Escoce sera encores remuée en
ung aultre lieu, et pense l'on que ce sera à Quilingourt, qui est ung
chasteau du comte de Lestre. Elle se monstre magnanime et d'ung cueur
grand et vertueulx en ceste sienne tant malle et adversaire fortune;
en quoy nous luy assistons d'icy à luy donner toute la consolation par
lettres que nous pouvons, et à procurer l'expédition de ses affaires
comme il vous a pleu me le commander.
Ceste nouvelle, qui a desjà couru jusques par deçà, d'une grand
victoire[18] que Monsieur, frère de Vostre Majesté, vous a aquise
contre ceulx de la Rochelle la resjouyra grandement, ainsy que
plusieurs icy très affectionnez à Vostre Majesté s'en rejouyssent
oultre mesure, et attandent en grand dévotion que j'en aye la
confirmation par voz lettres, avec les particullaritez de ce qui y
aura succédé. Dieu veuille que le tout soit sellon le bien et honneur
de vostre coronne, et au proffict et repos de voz bons subjectz.
[18] Bataille de Moncontour, livrée le 3 octobre 1569.
J'ay envoyé aussi resjouyr la dicte Royne d'Escoce du contenu au
postille de voz dictes dernières, parce que la dicte Dame en estoit en
grand soucy et le besoing s'en monstroit si pressé qu'il ne s'y
pouvoit plus souffrir aulcun temporisement.
Le Sr. Chapin Vitel et aultres commissaires de Flandres sont desjà
arrivez à Callais, et monsieur l'ambassadeur d'Espaigne est après pour
avoir une nouvelle et plus ample permission pour leur passaige de
deçà. Sur ce, etc.
De Londres ce XVIIIe d'octobre 1569.
L'on me vient d'advertyr que ceulx de la nouvelle religion, qui sont
icy, parlent d'une entreprinse sur le Croysic en Bretaigne. Il sera
bon, Sire, qu'en faciez donner adviz à Mr. de Martigues ou à Mr. de
Bouillé affin d'y prendre garde.