Madame, avant m'acheminer vers la Royne d'Angleterre, laquelle
j'espère trouver d'icy à trois jours à Amptonne, à LX mille d'icy,
j'ay bien vollu faire une dépesche à Voz Majestez sur l'occasion de
ces particullaritez, que Vostre Majesté verra en la lettre que
j'escriptz au Roy; oultre lesquelles je ne vous diray, Madame, sinon
touchant le faict de la Royne d'Escoce qu'il est heure que le Roy et
Vous, Madame, luy assistiez, ainsy que par le récit que j'ay donné
charge au Sr. de Sabran de vous en faire, et parce que j'en mande
meintennant en la dicte lettre du Roy, Vostre Majesté jugera que
oportunément et prudentment se devra faire; car le feu en est bien
allumé en ceste court, et semble, à la vérité, qu'il y va maintennant
du faict ou du failly. Je ne deffauldray de mon office en cest
endroict, ainsy que me l'avez commandé, pour servir en voz affaires et
à ceulx de la dicte Dame aultant qu'il me sera possible; et par ce
qu'ung de mes amys m'a dict avoir entendu de monsieur l'ambassadeur
d'Espaigne, qui est icy, que le duc d'Alve pourroit prandre jalouzie,
s'il entendoit qu'on vollût mettre aulcun secours de Françoys dans
Dombertran, je suplie Vostre Majesté juger si cella sera considérable.
Et, au reste, Madame, ayant miz peyne de m'enquérir des bagues que le
Sr. Du Doict a aportées pour engaiger par deçà, j'ay sceu qu'elles
sont celles cy, sçavoir:
De la Royne de Navarre, un collier estimé par les orfèvres de
France--cent soixante mil escuz;
Et ung quarquant--XL mil escuz;
De Mr. le Prince de Condé, bordeures, toretz, oreillettes et ung vaze
d'agathe--XXXV mil escuz;
De monsieur l'Admyral, ung vaze d'agathe--XV mil escuz;
Une couppe d'agathe--X mil escuz;
Une croix--quatre mil escuz;
Une oreillette--deux mil escuz;
Et de Mr. du Vijan ung ruby et une aultre bague--quatre mil escuz;
Mais les orfèvres de Londres ne les prisent tant; lesquelles bagues ne
sont encores engaigées. Sur ce, je bayse très humblement les mains de
Vostre Majesté, et prie Dieu qu'il vous doinct, etc.
De Londres ce Ve de septembre 1569.