"Quand Ulysses fut en la riche tente
Du compaignon, alors il diligente
De bien lier ses cheuaulx et les loge
Soigneusement dedans la même loge
Et au rang même ou la belle monture
Du fort Gregeois mangeoit pain et pasture
Quand aux habitz de Dolon, il les pose
Dedans la nef, sur la poupe et propose
En faire ung jour à Pallas sacrifice,
Et luy offrir à jamais son seruice
Bien tost après, ces deux Grecs de ualeur
Se cognoissant oppresséz de chaleur,
Et de sueur, dedans la mer entrèrent
Pour se lauer, et três bien so frotèrent
Le col, le dos, les jambes et les cuisses,
Ostant du corps toutes les immondices,
Estans ainsi refreichiz et bien netz,
Dedans des baingz souefs bien ordonnez,
S'en sont entréz, et quand leurs corps
Ont esté oinctz d'huyle par le dehors.
Puis sont allez manger prians Minerue
Qu'en tous leurs faictz les dirige et conserue
En respandant du uin à pleine tasse,
(pour sacrifice) au milieu de la place."