"En Calydon règnoit
Oenéus, ung bon Roy qui donnoit
De ses beaulx Fruictz chascun an les Primices
Aux Immortelz, leur faisant Sacrifices.
Or il aduint (ou bien par son uouloir,
Ou par oubly) qu'il meit à nonchalloir
Diane chaste, et ne luy feit offrande,
Dont elle print Indignation grande
Encontre luy, et pour bien le punir
Feit ung Sanglier dedans ses Champs uenir
Horrible et fier qui luy feit grand dommage
Tuant les Gens et gastant le Fruictage.
Maintz beaulx Pomiers, maintz Arbres reuestuz
De Fleur et Fruict, en furent abattuz,
Et de la Dent aguisée et poinctue,
Le Bléd gasté et la Vigne tortue.
Méléager, le Filz de ce bon Roy,
Voyant ainsi le piteux Désarroy
De son Pays et de sa Gent troublée
Proposa lors de faire une Assemblée
De bons Veneurs et Leutiers pour chasser
L'horrible Beste et sa Mort pourchasser.
Ce qui fut faict. Maintes Gens l'y trouvèrent
Qui contre luy ses Forces éprouvèrent;
Mais à la fin le Sanglier inhumain
Receut la Mort de sa Royale Main.
Estant occis, deux grandes Nations
Pour la Dépouille eurent Contentions
Les Curetois disoient la mériter,
Ceulx d'Etolie en uouloient hériter."
_Iliade_ (Livre X). Salel.