_Quhat douchty chiftanys of the Latyn land
That day Eneas kyllit with hys hand._
Ceculus, discendit of Wlcanus blude,
And Vmbro eyk, the stalwart chiftane rude,
That cum was fra the montanys Marsyane,
The bargane stuffis, relevand in agane.
Bot Eneas, discend from Dardanus, 5
Ganstandis thame, ful brym and furyus,
And onto ane, hecht Anxurus, in the feild
Of strak the left arm all dovn with the scheld;
Quhilk had maid sum gret vant, spekand prowdly,
Wenyng that in hys sawys by and by 10
Thar had bene gret effect, and hardyment,
As thocht he wald extoll in hys entent
Hys manhed to the hevyn and starnys hie,
And promys to hym self, for hys bonte,
Agit cannos hayr and lang proces of ȝeris: 15
Lo, now he lyggis law, for all hys feris!
Syne baldly with glaid curage, as I ges,
Agane Eneas can Tarquytus dres,
In schynand armour wonder prowd and gay,
Of Dryope born, the nymphe or schene may, 20
To Fawnus wonnyng in the woddis greyn;
And, to recontyr Ene inflambyt in teyn,
Kest hym selvyn: bot the tother, but feir,
Buyr at hym mychtyly with a lang speir
Throw owt hys scheild of pays and hawbrik fyne,
That to the grond gan dovn hys hed declyne;
All thocht he than full humylly hym besocht,
And schupe to say mekill, all was for nocht.
Hys pallat in the dust bedowyn stude, 5
And the body baithit in the hait blude
Ene ourweltis, sayand thir wordis withall,
With trublit breist and mynd inimicall:
Now ly thow thar, that wenyt the so wight
That thou was feirfull ontill euery wight. 10
Thy best belovyt mother sall the not haue
To erd, as custum is, nor delf in grave,
Na do thy bonys honour with sik cuyr
As thame to lay in fadyrris sepultur;
Bot salbe left to the wild bestis fuyd, 15
Or than the spait watir of this flude
Sal bair the in the deip, and thar on raw
With empty throtis sal thy banys gnaw
Thir sey monstreys in thar wod rage,
And lape thy blude thar hungar to asswage. 20
Syne, but delay, Antheus and Lycas,
Quhilkis that of Turnus first ward ledaris was,
Persewys he, and also Numa bold,
And Camerthes, brycht schynand all of gold,
Son of the manly Volscens capitan; 25
In all the fertill grond Ausonyane
The richast man, and kyng was this Volscens
Of Amyclys the cite of silens.
And lyke as Egeon, the kyng of gyandis,
Quhilk had, thai say, ane hundreth armys and handys. 30
And fyfty mowthys, of quham the fyre dyd schyne,
As he into the batale gigantyne
Incontrar Jovis thundir and fyre flaucht
With alsmony scharp drawyn swerdis fawght,
Clatterand in bargane with samony scheildis: 5
The sammyn wys, enragent throw the feildis
Went Eneas, as victor with ourhand,
Fra tyme that anys bedyit hys burnyst brand
And wet he had in hait Rutiliane blude.
So that alsso, in this ilk fury wod, 10
He draif at Nypheus amyd the breste bane,
Set in hys fourquhelit chariot allane:
Bot fra the hors on far dyd hym aspy
Sa grym of cheir stalkand sa bustuusly,
For feir thai start abak, and furth can swak 15
The duke Nypheus wyd oppyn on hys bak,
And brak away with the cart to the schor,
With stendis feill and mony bray and snor.
The self stound, amyd the pres fut hoyt
Lucagus entyris in hys chariote, 20
With quhyte hors drawyng wonder lustely,
Hys brother Lyger sittand neir hym by;
Thys Lyger led the renȝeis with hys hand,
Bot bald Lucagus swakkis a burnyst brand.
Eneas mycht nocht suffir nor sustene 25
Of thame sic fervour in thar felloun teyn,
Bot ruschit furth, and with a gret speir
Forganyst thame can into sycht appeir;
Quhamto this Liger carpys apon he:
Thou seys nocht Dyomedis stedis heir, said he, 30
Nor ȝit Achillis char persavis draw,
Thocht athir venquyst the in feild, we knaw;
Nor ȝit the Troiane planys behaldis thou:
The end of thyne age and of bargane now
Salbe maid in thir landis on this grond. 5
Sic wordis vayn and onsemly of sovnd
Furth warpys wyde this Lyger fulychly:
Bot the Troian barroun onabasitly
Na wordis pressis to rendir hym agane,
Bot at hys fa leyt fle a dart or flayn, 10
That hyt Lucagus; quhilk, fra he selt the dynt,
The schaft hyngand into hys scheild, but stynt
Bad dryf hys hors and char al fordwart strecht,
As he that hym addressit to the fecht,
And strekit furth hys left fut in hys char: 15
Bot sone Eneas speir was reddy thar,
Beneth hys schynand scheild reversyt law,
So that the grondyn hed the ilk thraw
At hys left flank or leisk persyt tyte,
Quhill clar owt our the charyot is he smyte, 20
And on the grond weltis in the ded thrawys.
Quham on this wys with sowr wordis and sawys
The petuus Eneas begouth to chyd:
Lucagus, said he, forsuyth as at this tyde
Na sla curs of thy horssys onweldy 25
Thy cart has rendryt to thyne ennemy,
Nor ȝit na vayn wrathys nor gaistis quent
Thi char constrenyt bakwart forto went,
And malgre thyne withdraw thi fays gryppys;
Bot lo now, of thy fre will, as thou skyppys 30
Owtour the quhelys of thy cart, God wait,
Levand the renys and hors all desolat.
Thys beand said, the horsis renys he hynt.
The tothir fey brother, or evyr he stynt,
Lap fra the cart, and kneland petuusly, 5
Vphevand hys bayr handis, thus dyd cry:
O Troiane prynce, I lawly the beseik,
Be thyne awyn vertues and thy thewys meyk,
And be thy parentis maist of renowne,
That sik a child engendryt hes as the, 10
Thow spair this wofull sylly sawle at lest,
Haue rewth of me, and admyt my request.
With wordis feill as he thus can requer,
Ene at last on this wys maid answer:
Syk sawys war langer furth of thy mynd. 15
Sterve the behuffis, les than thou war onkynd
As for to leif thy broder desolait
All hym allane, na follow the sam gait.
And tharwithall the hyrnys of hys gost
He rypyt with the swerd amyd hys cost, 20
So tyll hys hart stoundis the pryk of deth:
He weltis our, and ȝaldis vp the breth.
Thys Dardane prynce as victor thus in weir
Sa mony douchty corpsis brocht on beir,
Amyd the planys reddand large gait, 25
As doys a rowtand ryver red on spait;
That for hys dyntis wolx hys fays agast,
As for the feirfull drumly thundris blast.
Quhil fynaly Ascanyus the ȝyng page,
And the remanent of Troian barnage, 30
Quhilk war, as said is, besegyt invane,
Thar strenth hes left, and takyn hes the plane.