I winna gang back to my mammy again,
I 'll never gae back to my mammy again;
I 've held by her apron these aught years an' ten,
But I 'll never gang back to my mammy again.
I 've held by her apron, &c.
Young Johnnie cam' down i' the gloamin' to woo,
Wi' plaidie sae bonny, an' bannet sae blue:
"O come awa, lassie, ne'er let mammy ken;"
An' I flew wi' my laddie o'er meadow an' glen.
"O come awa, lassie," &c.
He ca'd me his dawtie, his dearie, his doo,
An' press'd hame his words wi' a smack o' my mou';
While I fell on his bosom heart-flicher'd an' fain,
An' sigh'd out, "O Johnnie, I 'll aye be your ain!"
While I fell on his bosom, &c.
Some lasses will talk to their lads wi' their e'e,
Yet hanker to tell what their hearts really dree;
Wi' Johnnie I stood upon nae stapping-stane,
Sae I 'll never gae back to my mammy again.
Wi' Johnnie I stood, &c.
For many lang year sin' I play'd on the lea,
My mammy was kind as a mither could be;
I 've held by her apron these aught years an' ten,
But I 'll never gang back to my mammy again.
I 've held by her apron, &c.