Preserve us a'! what shall we do,
Thir dark, unhallow'd times;
We 're surely dreeing penance now,
For some most awfu' crimes.
Sedition daurna now appear,
In reality or joke;
For ilka chiel maun mourn wi' me,
O' a hinging, toom meal pock,
And sing, Oh waes me!
When lasses braw gaed out at e'en,
For sport and pastime free;
I seem'd like ane in paradise,
The moments quick did flee.
Like Venuses they all appear'd,
Weel pouther'd were their locks;
'Twas easy dune, when at their hame,
Wi' the shaking o' their pocks.
And sing, Oh waes me!
How happy pass'd my former days,
Wi' merry heartsome glee;
When smiling Fortune held the cup,
And Peace sat on my knee.
Nae wants had I but were supplied;
My heart wi' joy did knock,
When in the neuk I smiling saw
A gaucie, weel-fill'd pock.
And sing, Oh waes me!
Speak no ae word about reform,
Nor petition Parliament;
A wiser scheme I 'll now propose,
I 'm sure ye 'll gi'e consent:
Send up a chiel or twa like me,
As a sample o' the flock,
Whose hollow cheeks will be sure proof
O' a hinging, toom meal pock.
And sing, Oh waes me!
And should a sicht sae ghastly-like,
Wi' rags, and banes, and skin,
Hae nae impression on yon folks,
But tell ye 'll stand ahin';
O what a contrast will ye shaw,
To the glowrin' Lunnun folk,
When in St James' ye tak' your stand,
Wi' a hinging, toom meal pock.
And sing, Oh waes me!
Then rear your head, and glowr, and stare,
Before yon hills o' beef;
Tell them ye are frae Scotland come,
For Scotia's relief.
Tell them ye are the vera best,
Waled frae the fattest flock;
Then raise your arms, and oh! display
A hinging, toom meal pock.
And sing, Oh waes me!