The next morning, Alec saw Mr Cupples in bed before he left. His
surprise therefore was great when, entering the library after morning
lectures, he found him seated in his usual place, hard at work on his
catalogue. Except that he was yet thinner and paler than before, the
only difference in his appearance was that his eyes were brighter and
his complexion was clearer.
"You here, Mr Cupples!" he exclaimed.
"What garred ye lock the press last nicht, ye deevil?" returned the
librarian, paying no attention to Alec's expression of surprise. "But I
say, bantam," he continued, not waiting for a reply, which indeed was
unnecessary, "ye hae dune yer wark weel--verra near as weel's I cud hae
dune't mysel'."
"I'm sure, Mr Cupples, it was the least thing I could do."
"Ye impident cock! It was the verra best you cud do, or ye wadna hae
come within sicht o' me. I mayna be muckle at thrashin' attoarneys, or
cuttin' up deid corpuses, but I defy ye to come up to me at onything
conneckit wi' buiks."
"Faith! Mr Cupples, ye may gang farther nor that. Efter what ye hae
dune for me, gin I war a general, ye sud lead the Forlorn Hope."
"Ay, ay. It's a forlorn hope, a' 'at I'm fit for, Alec Forbes,"
returned Cupples sadly.
This struck Alec so near his own grief that he could not reply with
even seeming cheerfulness. He said nothing. Mr Cupples resumed.
"I hae twa three words to say to you, Alec Forbes. Can ye believe in a
man as weel's ye can in a wumman?"
"I can believe in you, Mr Cupples. That I'll sweir till."
"Weel, jist sit doon there, and carry on frae whaur ye loot sit. Syne
efter the three o'clock lecture--wha is't ye're atten'in' this
session?--we'll gang doon to Luckie Cumstie's, and hae a moufu' o'
denner--she 'll do her best for me--an' I'll hae jist a tumler o'
toddy--but de'il a drap sall ye hae, bantam--and de'il a word will I
say to ye there. But we'll come back here, and i' the gloamin', I'll
gie ye a bit episode i' my life.--Episode did I ca' 'it? Faith it's my
life itsel', and no worth muckle, eyther. Ye'll be the first man that
ever I tell't it till. And ye may judge o' my regaird for ye frae that
fac'."
Alec worked away at his catalogue, and then attended the afternoon
lecture. The dinner at Luckie Cumstie's followed--of the plainest, but
good. Alec's trouble had not yet affected the region in which Paley
seats the organ of happiness. And while an appetite exists, a dinner
will be interesting. Just as the gloaming was fading into night, they
went back to the library.
"Will I rin ower to the sacrist's for a licht?" asked Alec.
"Na, na; lat be. The mirk's mercifu', whiles."
"I canna unnerstan' ye, Mr Cupples. Sin ever I kent ye i' this library,
I never kent ye bide the oncome o' the nicht. As sune's the gloamin'
began to fa', ye aye flew to yer hat, and oot at the door as gin there
had been a ghaist gettin' its banes thegither oot o' the dark to come
at ye."
"Maybe sae there was, bantam. Sae nane o' your jokin'."
"I didna mean to anger ye, Mr Cupples."
"Whaur naething's meant, naething's dune. I'm nae angert. And that
ye'll sune see. Sit ye doon there, and tak yer plaid aboot ye, or ye'll
be cauld."
"Ye hae nae plaid yersel. Ye're mair like to be cauld nor I am."
"I weir my plaid o' my inside. Ye haena had ony toddy. Deil's broo! It
may weel haud a body warm. It comes frae a het quarter."
The open oak ceiling overhead was getting very dark by this time; and
the room, divided and crowded with books in all directions, left little
free course to the light that struggled through the dusty windows. The
friends seated themselves on the lower steps of an open circular oak
staircase which wound up to a gallery running round the walls.
"Efter I had taen my degree," began Mr Cupples, "frae the han' o' this
same couthy auld mither, I heard o' a grit leebrary i' the north--I
winna say whaur--that wantit the han' o' a man that kenned what he was
aboot, to pit in dacent order, sae that a body cud lay his han's upon a
buik whan he wantit it, and no be i' the condition o' Tantalus, wi'
watter at the mou, but nane for the hause (throat). Dinna imaigin' it
was a public library. Na, na. It belonged to a grit an' gran'
hoose--the Lord hae respec till't, for it's no joke o' a hoose that--as
I weel kent afore a' was ower! Weel, I wrought awa', likin' the wark
weel, for a buik's the bonniest thing i' the warl' but ane, and there's
no dirl (thrill) in't whan ye lay han's upo' 't, as there is, guid
kens, in the ither. Man, ye had better lay han's upon a torpedo, or a
galvanic battery, nor upon a woman--I mean a woman that ye hae ony
attraction till--for she'll gar ye dirl till ye dinna ken yer thoomb
frae yer muckle tae. But I was speikin' aboot buiks an' no aboot women,
only somehoo whatever a man begins wi', he'll aye en' aff wi' the same
thing. The Lord hae a care o' them, for they're awfu' craters! They're
no like ither fowk a'thegither. Weel, ye see, I had a room till
mysel', forby the library an' my bedroom--an' a gran' place that was! I
didna see onything o' the family, for I had my denner and my wine and
'a thing human stammack cud desire served up till me i' my ain room.
But ae day, my denner was made up o' ae mess efter anither, vera fine
nae doot, but unco queer and ootlandish, and I had nae appeteet, and I
cudna eat it. Sae I rase, afore my ordinar' time, and gaed back to my
wark. I had taen twa or three glasses o' a dooms fine tipple they ca'
Madeira, an' a moufu' o' cheese--that was a'. Weel, I sat doon to my
catalogue there, as it micht be here; but I hadna sat copyin' the
teetles o' the buiks laid out upo' the muckle table afore me, for mair
nor twa minutes, whan I heard a kin' o' a reestlin', an' I thocht it
was mice, to whilk I'm a deidly enemy ever sin they ate half o' a first
edition o' the _Fairy Queen_, conteenin' only the first three buiks, ye
ken, o' whilk they consumed an' nae doot assimilated ae haill buik and
full a half o' anither. But whan I luikit up, what sud I see but a wee
leddy, in a goon the colour o' a clood that's takin' nae pairt i' the
sunset, but jist lookin' on like, stan'in afore the buik-shelves i' the
further en' o' the room. Noo I'm terrible lang-sichtit, and I had
pitten the buiks i' that pairt a' richt already wi' my ain han'--and I
saw her put her han' upon a buik that was no fit for her. I winna say
what it was. Some hermaphrodeet cratur had written't that had no respec
for man or woman, an' whase neck sud hae been thrawn by the midwife,
for that buik cam o' sparin' o' 'm!
"'Dinna touch that buik, my bonny leddy,' I cried. 'It's awfu' fu' o'
dist and stoor. It'll smore ye to open the twa brods o' 't. Yer rosy
goon'll be clean blaudit wi' the stew (dust) o' 't.'
"She startit and luikit roon some frichtit like, and I rase an' gaed
across the flure till her. And her face grew bonnier as I cam nearer
till her. Her nose an' her twa eebrees jist min'd ye upo' the picturs
o' the Holy Ghost comin' doon like a doo; and oot aneath ilka wing
there luikit a hert o' licht--that was her twa een, that gaed throu and
throu me as gin I had been a warp and they twa shuttles; and faith!
they made o' my life and o' me what it is and I am. They wove the wab
o' me.
"Ay. They gaed oot and in, and throu and throu, and back and fore, and
roon and aboot, till there wasna a nerve or a fibre o' my bein', but
they had twisted it up jist as a spither does a flee afore he sooks the
life oot o' 't. But that's a prolepsis."
"'Are you the librarian?' said she, saft and sma', like hersel'.
"'That I am, mem,' said I. 'My name's Cupples--at your service, mem.'
"'I was looking, Mr Cupples,' said she, 'for some book to help me to
learn Gaelic. I want very much to read Gaelic.'
"'Weel, mem,' said I, 'gin it had been ony o' the Romance languages, or
ony ane o' the Teutonic breed, I micht hae gien ye a lift. But I doot
ye maun bide till ye gang to Edinburgh, or Aberdeen, whaur ye'll easy
fa' in wi' some lang-leggit bejan that'll be prood to instruc' ye, and
coont himsel' ower weel paid wi' the sicht o' yer bonny face.'
"She turned some reid at that, and I was feared that I had angert her.
But she gied a sma' lauch, and oot at the door she gaed, wi' her 'rosy
fleece o' fire' lowin' and glimmerin' aboot her, jist like ane o' the
seraphims that auld Crashaw sings aboot. Only she was gey sma' for a
seraph, though they're nae ower big. Weel, ye see, that was the first
time I saw her. And I thochtna ower muckle mair aboot her. But in a day
or twa there she was again. And she had a hantle to speir at me aboot;
and it took a' the knowledge I had o' buiks in general to answer her
questions. In fac I was whiles compelled to confess my ignorance, which
is no pleesant whan a man wants to stan' weel wi' a bonny crater that
spiers questons. Whan she gaed, I gaed efter her, followin' aboot at
her--i' my thochts, I mean--like a hen efter her ae chucken. She was
bonnier this time than the last. She had tired o' the rosy clood, and
she had on a bonny goon o' black silk, sae modest and sae rich, wi'
diamond buttons up the front o' the briest o' 't. Weel, to mak a lang
story short, and the shorter the better, for it's nae a pleesant ane to
me, she cam aftener and aftener. And she had sae muckle to say and
speir aboot, that at last we had to tak doon buiks, and I had to clear
a neuk o' the table. At lenth I cam to luik for her as reglar as gin
she had been a ghaist, and the time that chappit upo' the auld clock
had belongt to the midnicht instead o' the mornin'. Ye'll be wonnerin'
what like she was. As I tell't ye, she was a wee body, wi' muckle black
een, that lay quaiet in her face and never cam oot till they war
wantit, an' a body gimp and sma', but roon' and weel proportioned
throughoot. Her hand and her fit war jist past expression bonny. And
she had a' her features conformin'--a' sma' but nane o' them ower sma'
in relation to ane anither. And she had a licht way wi' her, that was
jist dazin'. She seemed to touch ilka thing wi' the verra tips o' her
fingers, and syne ken a'thing aboot it, as gin she had a universal
insicht; or raither, I wad say, her natur, notwithstandin' its variety,
was sae homogeneous, that whan ae nerve o' her spiritual being cam in
contack wi' onything, the haill sowl o' her cam in contack wi' 't at
the same time and thereby; and ilka pairt read the report efter its ain
fashion, translatin' 't accordin' to 'ts ain experience: as the
different provinces and languages o' the Chinese Empire read the
universal written tongue. A heap o' pains I took that I micht never hae
to say _I dinna ken_ to sic a gleg-ee'd cratur as that. And ilka day
she cam to read wi' me, and we jist got on like a mail-coach--at least
I did--only the wrang road. An' she cam aye i' the efternoon and bade
till the gloamin' cam doon an' it grew ower mirk to ken the words frae
ane anither. And syne she wad gang and dress hersel' for denner, as she
said.
"Ye may say I was a muckle gowk. And ye may lauch at a bairn for
greitin' efter the mune; but I doot that same avarice o' the wee man
comes frae a something in him that he wad be ill aff wi'oot. Better
greit for the mune than no be cawpable o' greetin' for the mune. And
weel I wat, I grat for the mune, or a' was dune, and didna get it, ony
mair than the lave o' my greedy wee brithers."
The night had gathered thick about them. And for a few moments out of
the darkness came no sound. At length Mr Cupples resumed:
"I maun jist confess, cauf that I was--and yet I wad hae been a greater
cauf gin it hadna been sae--I cud hae lickit the verra dist aff o' the
flure whaur her fit had been. Man, I never saw onything like her, The
hypostasis o' her was jist perfection itsel'. Weel, ae nicht--for I
wrocht full late, my een war suddenly dazed wi' the glimmer o'
something white. I thocht the first minute that I had seen a ghost, and
the neist that I was a ghost mysel'. For there she was in a fluffy
cloud o' whiteness, wi' her bonny bare shouthers and airms, and jist ae
white rose in her black hair, and deil a diamond or ruby aboot her!
"'It's so hot,' said she, 'in the drawing-room! And they're talking
such nonsense there! There's nobody speaks sense to me but you, Mr
Cupples.'
"''Deed, mem,' says I, 'I dinna ken whaur it's to come frae the nicht.
For I hae nae sense left but ane, and that's nearhan' 'wi' excess o'
brightness blind.' Auld Spenser says something like that, doesna he,
mem?' I added, seein' that she luikit some grave. But what she micht
hae said or dune, I dinna ken; for I sweir to ye, bantam, I know
nothing that happent efter, till I cam' to mysel' at the soun' o' a
lauch frae outside the door. I kenned it weel eneuch, though it was a
licht flutterin' lauch. Maybe I heard it the better frae the conductin'
pooer o' timmer, for my broo was doon o' the buirds o' the flure. I
sprang to my feet, but the place reeled roon', and I fell. It was the
lauch that killed me. What for sud she lauch?--And sic a ane as her
that was no licht-heidit lassie, but cud read and unnerstan', wi the
best? I suppose I had gane upo' my knees till her, and syne like the
lave o' the celestials she tuik to her feathers and flew. But I ken nae
mair than this: that for endless ages I gaed followin' her through the
heavenly halls, aye kennin as sure's gospel that she was ahint the
neist door, and aye openin' that door upon an empty glory, to be
equally certain that she was ahint the neist. And sae on I gaed till,
ahint ane o' the thoosan' doors, I saw the reek-enamelled couples o' my
auld mither's bit hoosie upo' the mairgin o' the bog, and she was
hingin' ower me, sayin' her prayers as gin she wad gang efter them like
a balloon wi' verra fervour. And whan she saw my een open, she drappit
upo' her knees and gaed on prayin'. And I wonner that thae prayers
warna hearkent till. I never cud unnerstan' that."
"Hoo ken ye that they warna hearkent till?" asked Alec.
"Luik at me! Do ye ca' that hearkenin' till a prayer? Luik what she got
me back for. Ca' ye that an answer to prayers like my auld mither's?
Faith! I'll be forced to repent some day for her sake, though there
sudna be anither woman atween Venus and Mars but wad rive wi' lauchin
at a word frae Cosmo Cupples. But, man! I wad hae repentit lang syne
gin I cud hae gotten ae glimp o' a possible justice in pittin a hert as
grit's mine into sic a misgreein', scrimpit, contemptible body as this.
The verra sowl o' me has to draw up the legs o' 't to haud them inside
this coffin o' a corpus, and haud them ohn shot oot into the
everlastin' cauld. Man, the first thing I did, whan I cam' to mysel',
was to justify her afore God for lauchin at me. Hoo could onybody help
lauchin at me? It wasna her wyte. And eh! man, ye dinna ken hoo quaiet
and comfortable I was in my ain min', as sune's I had gotten her
justified to mysel' and had laid it doon that I was ane fit to be
lauchen at.--I winna lat you lauch at me, though, bantam. I tell ye
that."
"Mr Cupples! Laugh at you! I would rather be a doormat to the devil,'
exclaimed Alec.
"Thank you, bantam.--Weel, ye see, ance I had made up my min' aboot
that, I jist began followin' at her again like a hungry tyke that stops
the minute ye liuk roon efter him--I mean i' my thochts, ye ken--jist
as I had been followin' her, a' the time o' my fiver, throu the halls
o' heaven, as I thoucht them, whan they war only the sma'
crinkle-crankle convolutions o' my cerebral dome--a puir heaven for a
man to bide in! I hae learnt that waur and better than maist men, as
I'm gaein to tell ye; for it was for the sake o' that that I begud this
dismal story.--Whan I grew some better, and wan up--wad ye believe
't?--the kin'ness o' the auld, warpit, broon, wrinklet woman that
brocht me furth, me Cosmo Cupples, wi' the muckle hert and the sma'
body, began to console me a wee for the lauch o' that queen o'
white-skinned leddies. It was but a wee, ye ken; still it was
consolation. My mither thocht a heap o' me. Fowk thinks mair o' fowk,
the mair they are themsels. But I wat it was sma' honour I brocht her
hame, wi' my een brunt oot wi' greetin' for the mune.--I'll tell ye the
lave o' 't efter we win hame. I canna bide to be here i' the dark. It's
the quaiet beuks a' roon' me that I canna bide. It was i' the mids o'
beuks, i' the dark, that I heard that lauch. It jist blastit me and the
beuks and a' thing. They aye luik as gin they war hearin' 't. For the
first time I loot the gloamin come doon upo' me i' this same leebrary,
a' at ance I heard the sma' nicher o' a woman's lauch frae somewhaur in
or oot o' the warl'. I grew as het's hell, and was oot at the door in a
cat-loup. And as sure's death I'll hear't again, gin I bide ae minute
langer. Come oot wi' ye."
There was light in Mr Fraser's drawing-room, and a shadow flitted
across the blind. The frosty night, and the keenness of the stars, made
Mr Cupples shiver. Alec was in a feverous glow. When they reached home,
Mr Cupples went straight to the cupboard, swallowed a glass of the
_merum_, put coals on the fire, drew his chair close to it, and said:
"It's dooms cauld! Sit doon there, bantam. Pit on the kettle first.
It's an ac' o' the purest disinteresstitness, for deil a drap sall ye
drink! But I'll sing ye a sang, by way o' upmak'."
"I never heard ye sing, Mr Cupples. Ye can do a' thing, I think."
"I cudna gar a bonnie, high-born, white-handit leddy fa' in love wi' a
puir futteret (weasel) o' a crater--a shargar (scrag) like Cosmo
Cupples, bantam. But I can do twa or three things; an' ane o' them is,
I can mak' a sang; and anither is, I can mak' a tune till't; and a
third is, I can sing the tane to the tither, that is whan I haena had
either ower muckle or ower little o' the tappit hen. Noo, heark ye.
This ane's a' my ain:
GAEIN' AND COMIN'.
Whan Andrew frae Strathbogie gaed,
The lift was lowerin' dreary;
The sun he wadna lift his heid;
The win' blew laich and eerie.
In's pouch he had a plack or twa,
I vow he hadna mony;
Yet Andrew like a lintie sang,
For Lizzie was sae bonny!
O Lizzie, Lizzie, bonnie lassie!
Bonnie, saucy hizzie!
What richt had ye to luik at me,
And drive me daft and dizzy?
Whan Andrew to Strathbogie cam',
The sun was shinin' rarely;
He rade a horse that pranced and sprang--
I vow he sat him fairly.
And he had gowd to spend and spare,
And a heart as true as ony;
But's luik was doon, and his sigh was sair,
For Lizzie was sae bonny!
O Lizzie, Lizzie, bonny hizzie!
Ye've turned the daylicht dreary.
Ye're straucht and rare, ye're fause and fair--
Hech! auld John Armstrong's dearie!"
His voice was mellow, and ought to have been even. His expression was
perfect.
The kettle was boiling. Mr Cupples made his toddy, and resumed his
story.
"As sune's I was able, I left my mither greitin'--God bless her!--and
cam to this toon, for I wasna gaein' to be eaten up with idleset as
weel's wi' idolatry. The first thing I tuik till was teachin'. Noo
that's a braw thing, whan the laddies and lassies want to learn, and
hae questons o' their ain to speir. But whan they dinna care, it's the
verra deevil. Or lang, a'thing grew grey. I cared for naething and
naebody. My verra dreams gaed frae me, or cam only to torment me, wi'
the reid hert o' them changed to yallow and grey.
"Weel, ae nicht I had come hame worn oot wi' warstlin' to gar bairns
eat that had no hunger, I spied upo' the table a bottle o' whusky. A
frien' o' mine--a grocer he was--had sent it across the street to me,
for it was hard upo' Hogmanay. I rang the bell incontinent. Up comes
the lass, and says I, 'Bell, lat's hae a kettlefu' o' het water.' And
to mak' a lang story short, I could never want het water sin syne. For
I hadna drunken aboon a twa glaiss, afore the past began to revive as
gin ye had come ower't wi' a weet sponge. A' the colours cam' oot upo'
't again, as gin they had never turned wan and grey; and I said to
mysel' wi' pride: 'My leddy canna, wi' a' her breedin' and her bonnie
skin, haud Cosmo Cupples frae lo'ein' her.' And I followed aboot at her
again throu a' the oots and ins o' the story, and the past was restored
to me.--That's hoo it appeared to me that nicht.--Was't ony wonner that
the first thing I did whan I cam' hame the neist nicht was to ring for
the het water? I wantit naething frae Providence or Natur' but jist
that the colour michtna be a' ta'en oot o' my life. The muckle deevil
was in't, that I cudna stan' up to my fate like a man, and, gin my life
was to cast the colour, jist tak my auld cloak aboot me, and gang on
content. But I cudna. I bude to see things bonnie, or my strength gaed
frae me. But ye canna slink in at back doors that gait. I was pitten
oot, and oot I maun bide. It wasna that lang afore I began to discover
that it was a' a delusion and a snare. Whan I fell asleep, I wad dream
whiles that, openin' the door into ane o' thae halls o' licht, there
she was stan'in' lauchin' at me. And she micht hae gane on lauchin' to
a' eternity--for onything I cared. And--ten times waur--I wad whiles
come upon her greitin' and repentin', and haudin' oot her han' to me,
and me carin' no more for her than for the beard o' a barley-stalk. And
for makin' a sang--I jist steikit my lugs (stopped my ears) whan I
heard a puir misguidit canary singin' i' the sunshine. And I begud to
hear a laich lauch far awa', and it cam' nearer and nearer ilka week,
till it was ringin' i' my verra lug. But a' that was naething
compairateevely. I' the mids o' a quaiet contemplation, suddenly, wi'
an awfu' stoon, a ghaistly doobt pat it's heid up i' my breist, and
cried: 'It's a' fause. The grey luik o' life's the true ane, and the
only aspec' ye hae a richt to see.' And efter that, a' the whusky in
Glenlivat cudna console me.--Luik at me noo. Ye see what I am. I can
whiles sing an auld sang--but mak' a new ane!--Lord, man! I can hardly
believe 'at ever I made a sang i' my life. Luik at my han' hoo it
trimles. Luik at my hert. It's brunt oot. There's no a leevin' crater
but yersel' that I hae ony regaird for, sin my auld mither deid. Gin it
warna for buiks, I wad amaist cut my throat. And the senawtus disna
think me bye and aboon half a proper companion for buiks even; as gin
Cupples micht corrup' Milton himsel, although he was ten feet ower his
heid bottled in a buik. And whan I saw ye poor oot the whusky in that
mad-like mainner, as gin 't had been some sma' tipple o' penny ale, it
jist drave me mad wi' anger."
"Weel, Mr Cupples," Alec ventured to say, "what for dinna ye sen' the
bottle to the devil?"
"What, my ain auld tappit hen!" exclaimed Mr Cupples, with a sudden
reaction from the seriousness of his late mood; "Na, na, she shanna
gang to the deil till we gang thegither. Eh! but we'll baith hae dry
insides or we win frae him again, I doobt. That drouth's an awfu' thing
to contemplate. But speyk o' giein' ower the drink! The verra
attemp'--an' dinna ye think that I haena made it--aich! What for sud I
gang to hell afore my time? The deils themselves compleen o' that. Na,
na. Ance ye hae learned to drink, ye _canna_ do wantin' 't. Man, dinna
touch 't. For God's sake, for yer mither's sake, for _ony_ sake, dinna
lat a drap o' the hell-broth gang ower yer thrapple--or ye're damned
like me for ever and ever. It's as guid's signin' awa' yer sowl wi' yer
ain han' and yer ain blude."
Mr Cupples lifted his glass, emptied it, and, setting it down on the
table with a gesture of hatred, proceeded to fill it yet again.