Reverendissime Pater etc.
Credimus R. D. V. adhuc memoriæ tenere quam gratum et nobis fuerit,
et universo huic populo, conventus Sancti Marci nostræ urbis, Sancti
Dominici Fesularum, ac Sanctæ Catharinæ Pisarum, omnes prædicatorum
ordinis, a Congregatione Lombardiæ separatos fuisse; quod etiam, opera
R. D. V. et obtinuisse nos, tum cognovimus, et illi retulimus acceptum.
Nunc vero, cum audierimus Lombardiæ Congregationes eos tentare velle
sibi adiungere atque unire, non minus cupimus separatos permanere,
quam tum optaremus seiungere; nec enim minus hoc vobis gratum futurum
est, quam illud tunc fuerit; quippe cum tueri parta non minoris sit
faciendum, quam nova acquirere. Rogamus igitur iterum atque iterum R.
D. V., non solum ut si quid in contrarium ab ea postularetur, id omnino
reiiciat atque refellat; sed quod iam factum est, et tueri velit et
corroborare, quod quidem hoc tempore nihil potest et nobis et universæ
civitati nostræ gratius præstari R. D. V.