_Coment le bouteillier de France fu assailli de Sarrasins._
Une fois avint que le conte d'Eu et messire Jehan d'Acre firent le guet par
nuit; si advint que trois chevaliers Sarrasins vindrent à messire Jehan, et
luy distrent qu'il vouloient estre crestiens; et en signe de paix misrent
les mains sus la teste et puis vindrent baisier les mains à ceux qui
illecques estoient en signe d'amour et de subjection; et se rendirent à
messire Jehan d'Acre. Et il les fist mener à sa tente, et demoura à son
guet: après tantost, cent autres vindrent à luy qui estoient Sarrasins, et
jectèrent leur lances jus et firent ainsi comme les autres et requistrent
baptême hastivement. Ainsi comme le bouteillier et sa gent entendoient aux
Sarrasins, se férirent ensemble, les lances droites, tout plein d'autres
Sarrasins en l'ost au bouteillier, si que il les reculèrent et firent
fouir. Lors commencièrent à crier aux armes, si que l'on fu tout esmeu;
mais ainsois qu'il feussent armés, les Sarrasins occistrent soixante
sergens, que à pié que à cheval, et puis s'enfouirent.
Quant le bouteillier ot fait son guet, il retourna à sa tente et araisonna
moult cruelment les Sarrasins et les reprist de traïson. Desquels l'un qui
ressembloit le greigneur maistre commença à plourer et soi à excuser. Ce
que le Sarrasin disoit entendi le bouteillier par un frère Prescheur qui
entendoit sarrasin. Et quant le bouteillier le vit si forment plourer, si
en ot moult grant pitié, et luy dist qu'il ne se doubtast, car puisqu'il
estoit venu en la fiance aux crestiens il trouveroit foy. «Sire,» dist le
Sarrasin, «je say bien que vous m'avez souspeçonneux de ce fait, jasoit ce
que je n'y aie coupe. Sachiés certainement que ce m'a fait un chevalier qui
me het pour moy grever. Nous sommes deux des greigneurs souldoiers au roy
de Tunes, et avons chascun dessoubs nous deux mille et cinq cens
chevaliers; et mon compaingnon qui a envie sur moy s'aperceut que je me
voulloie mettre en vostre garde de mon gré, si procura cest assaut que vous
avez eu, pour moy empeschier envers vous: et si say bien que l'un de mes
chevaliers fu en celle bataille; et que vous puissiez savoir que je vous di
voir, laissiez aler de mes compaingnons à mes gens qui vous amenront
vitaille, et vous seront en aide tant comme il pourront.» Quant le
bouteillier ot entendu le Sarrasin, si dist au roy ce que le Sarrasin luy
avoit conté; et le roy commanda que on le laissast aler, si pourroit-on
veoir leur loiauté[609].
Note 609: Nangis ajoute que le roi ne prit aucunement le change sur
la perfidie des Sarrasins, et qu'en effet ils ne revinrent pas le
lendemain.