_Coment le roy faisoit abstinence de son corps._
Le roy, du consentement la royne sa femme, se tenoit par tout l'avent et
par tout caresme, et par toutes les hautes vigiles, de couchier en son lit.
Et, après ce qu'il avoit receu le précieux corps Nostre-Seigneur
Jhésucrist, il s'en tenoit par trois jors. Il vouloit que ses enfans qui
estoient parcreus et en aage oïssent chacune journée matines, la messe et
vespres, et complie hautement à note, et vouloit qu'il fussent au sermon
pour entendre la parole de Dieu, et que il déissent chascun jour le service
Nostre-Dame, et qu'il scéussent lettres pour entendre les escriptures.
Quant il avoit souppé, il faisoit chanter complie, et puis retornoit en sa
chambre et faisoit ses enfans séoir devant luy, et leur monstroit bonnes
exemples des princes anciens qui par convoitise avoient esté décéus, et les
autres qui par luxure et par orgueil et par tels vices avoient perdu les
royaumes et leur seigneuries. Il faisoit porter à ses enfans chapeaux du
roses ou d'autres fleurs au vendredi, en remembrance de la saincte couronne
d'espines dont Jhésucrist fu couronné le jour de sa saincte passion.