_Coment le conte Thibaut de Champaigne fu couronné du royaume de Navarre._
Après ce, ne demoura guaires que le conte Thibaut de Champaigne fu mandé
des barons du royaume de Navarre pour estre couronné de la terre et du
pays; car son frère estoit mort sans hoir de son corps. Assez tost après
qu'il fust couronné, il prist la croix et promist que il iroit aidier aux
Crestiens de la terre d'Oultre mer à tout son povoir; et avoit en sa
compaignie le duc de Bretaigne, le conte de Bar et le conte de Montfort et
la greigneur partie des barons de France. Quant il orent fait leur
garnisons, si se mistrent à la voie et passèrent la grant mer et arrivèrent
au port d'Acre, à tout grant foison de chevaliers et de gens d'armes. Quant
il se furent reposés, messire Pierre le duc de Bretaigne et grant foison de
sa compaingne se départirent de l'ost sans le sceu du commun et sans le
congié au roy de Navarre qui estoit le maistre d'eux tous, et s'en alèrent
toute nuit vers une grosse ville de Sarrasins; et envoièrent leur espies
devant pour savoir la contenance des Sarrasins, qui leur raportèrent que
les Sarrasins ne se donnoient garde de leur venue; et ceux entrèrent en la
ville assez légièrement, car il ne trouvèrent qui la deffendist, et
prisrent tous les Sarrasins et les mistrent en chetivoison.
Amaury le conte de Montfort et le conte de Bar, Richart de Chaumont et
Anseau de Lisle et pluseurs autres de grant renom cuidièrent ainsi faire
comme le duc avoit fait, et orent grant envie de ce qu'il s'estoit jà tant
avanciés; si se mistrent à la voie sans le congié du roy. Et sans le
conseil du peuple commun chevauchièrent toute nuit armés, sur leurs
chevaux, tant qu'il vindrent au matin près de la cité de Gaze qui siet en
sablon. Ceux de la cité avoient envoié espies qui bien avoient apperceu que
les contes venoient, et qu'il avoient toute nuit chevauchiés; si s'armèrent
et leur vindrent au devant frès et nouviaux.
Ceux qui estoient travailliés et lassés de ce qu'il avoient toute nuit
chevauchié ne porent durer contre eux: si en occistrent les Sarrasins tant
comme il leur plut, et le demourant mistrent en liens et en fers. En celle
chevauchie et en celle compaingnie fu le conte de Bar ou mort ou pris, car
oncques puis ne pot estre trouvé. Le conte de Montfort et les autres barons
furent liés de cordes et menés en diverses prisons.
Aucuns commencièrent à murmurer et à dire parmi l'ost que Nostre-Seigneur
souffroit ceste perte pour ce que les contes tendoient plus à vaine gloire
de chevalerie que à faire le prouffit de la Saincte Terre. Sitost comme ce
dommage fu avenu en la terre d'Oultre mer, le conte Richart de Cornouaille
frère le roy d'Angleterre prist port à toute sa gent et à tout grant avoir,
pour venir en l'aide de la Terre saincte. Quant il sceut que l'ost des
pélerins du royaume de France estoit si desconforté pour la prise des
barons qui si grant avoit esté faite, et de l'occision, si en eut moult
grant pitié et pourchascia tant vers les Sarrasins, que les prisonniers
furent délivrés et rachetés d'or et d'argent. Et fit tant vers les
Sarrasins qu'il orent sauf conduit d'aler en Jhérusalem visiter le saint
sépulcre Nostre-Seigneur. A celle fois firent pou ou néant les barons de
France en la terre d'Oultre mer. Le conte de Montfort qui avoit esté en
prison s'en vint à Rome pour visiter les apostres; si le prist un flum de
ventre dont il mourut; enterré fu au moustier des apostres honourablement.