_Coment le roy de France se maria à madame Marguerite, fille au conte de
Provence._
L'an de grace mil deux cens trente et quatre eut le roy conseil de prendre
femme pour avoir hoir de son corps qui le royaume peust gouverner après son
décès. Si envoya l'archevesque de Sens et messire Jehan de Neele au conte
de Prouvence, et luy manda qu'il luy envoyast Marguerite sa fille, car il
la vouloit espouser et prendre à femme. De ces nouvelles fu le conte moult
lie et fist grant joie et grant feste aux messages et les honnoura moult,
et leur bailla sa fille sage et bien endoctrinée, dès le temps de son
enfance. Les messages receurent la pucelle et prisrent congié au conte et
errèrent tant qu'il vindrent au roy et luy baillièrent la pucelle. Le roy
la reçut liement, et la fist couronner à royne de France par la main
l'archevesque de Sens.