_Coment le moustier de Saint-Denis fu renouvelé._
Heude, l'abbé de St-Denys en France, fu en moult grant pensée coment il
pourroit renouveller le moustier Saint-Denys; car il n'avoit esté de riens
amendé puis le temps au fort roy Dagobert, qui premièrement le fist faire
pour la grant amour qu'il avoit au glorieux martir et à ses compaignons: et
quant il l'ot fait faire tout nouvel, il le fist couvrir de fin argent pur,
sans autre métal; et demoura ainsi couvert jusques au temps Charles le
Chauve, qui prist tout l'or et l'argent qui estoit dedens l'églyse et la
fist découvrir, pour les grans guerres qui furent en son temps. Si estoient
les voultes si vieils et si corrompues que elles estoient comme au
tresbuchier. Né les abbés n'y osoient riens renouveller pour ce qu'il avoit
esté dédié, présentement et en appert, de par Nostre-Seigneur Jhésucrist:
né on n'osoit le moustier refaire né amender, pour ce que si hault sire
come est Nostre-Seigneur l'avoit visité. Si s'en conseilla au roy de France
et luy monstra coment la chose aloit. Le roy prist ses messages et les
envoya à la court de Rome, et manda à l'apostole coment il vouloit que
celle besoingne fust faite. Et l'apostole luy rescript: «Biau chier fils,
sé Nostre-Seigneur visita l'églyse pour l'amour du glorieux martir et de
ses compaignons, ne fu son entencion de parfaire le moustier perdurable et
sans nulle fin. Et devez savoir que toutes les choses qui sont soubs le
cercle de la lune encloses sont corrompables né ne peuvent demeurer en un
estat; pour quoy nous vous mandons que l'églyse soit refaite en telle
manière que on y puisse Nostre-Seigneur servir et honnourer.»