_Du duc de Bretaigne._
Assez tost après, en cest an meisme, Pierre Mauclerc s'en ala au roy
d'Angleterre et luy fist entendant que, sé il vouloit, encore pourroit-il
recouvrer la duchié de Normandie que le roy Jehan son père avoit perdue.
«Coment,» dist le roy, «la pourrois-je recouvrer? sé ce povoit estre, moult
volentiers y metroie paine.»--«Je le vous dirai,» dist le duc: «le roy de
France est jeune enfant, né n'a point aage de porter couronne, né n'a point
esté couronné de l'accort des barons mais contre leur volenté; pourquoy, sé
vous aliez sur luy, nul ne luy vouldroit aidier; et ainsi pourriez
recouvrer la perte que vostre père fist.» Tant dist, tant sermonna que le
roy Henry s'en vint en Bretaigne à tout grant nombre d'Anglois. Le duc
assembla grant foison de Bretons. Quant il furent tous assemblés, si firent
grant ost et entrèrent en la terre au roy de France par force d'armes, et
la commencièrent à gaster, et à bouter le feu ès villes et ès chastiaux,
tant que le peuple fu si espoventé qu'il s'enfouirent ès forteresces et aux
villes deffensables; et mandèrent au roy coment il leur estoit[343].
Note 343: Cet alinéa occupe deux lignes dans le récit de Nangis.
Le roy fu moult eschauffé et enflambé de prendre vengence de tel fait;
grant ost assembla des communes et des bonnes villes de son royaume et fu
son propos d'aler premièrement sur le duc de Bretaigne qui estoit maistre
chevetaine de celle besoingne. Et chevaucha hastivement droit au chastel de
Belesme que le duc avoit receu en garde de par le père Saint Loys, quant il
ala sur les Albigois, né rendre ne le vouloit, ains le tenoit par force.
Le roy fist enclorre tout entour le chastel, et mist le siège tout environ
né oncques ne le laissa pour l'yver. Si fu-il si grant et si fort que trop
eust esté périlleux aux hommes et aux chevaux, sé ne fust la royne Blanche
qui estoit au siège devant le chastel, qui fist crier parmi l'ost que tous
ceux qui vouldroient guaignier alassent abatre arbres, noyers et pommiers,
et quanques il trouveroient de busche aportassent en l'ost.
Si tost comme elle l'eut commandé, les menus varlès de l'ost alèrent abatre
quanques il trouvèrent et envoièrent à charrettes et à chevaux en l'ost.
Et cil de l'ost firent grans feux par les tentes et par les paveillons, si
que la froidure ne peust emporter les hommes né les chevaux. Tantost comme
le siège fu environ le chastel, l'en courut à l'assaut, et cil de dedens se
deffendirent bien et viguereusement, si que, celle journée, la gent le roy
ne porent riens faire. L'endemain le mareschal de l'ost fist assembler ceux
qui savoient miner, et commanda que il minassent par dessoubs les fondemens
du chastel, et il les deffendroit luy et sa chevalerie. Lors fu crié parmi
l'ost que tuit alassent à l'assaut; et puis commencièrent à lancier à ceux
de dedens et à paleter. Et cil dedens se deffendirent qui firent les
mineurs reculer et fouir, et dura l'assaut sans cesser jusques à nones. Si
fu le chastel moult froissié et moult empirié dessoubs. L'endemain au matin
le mareschal fist drecier deux engins; l'un jectoit grosses pierres et
l'autre plus petites. Si jectèrent les maistres du grant engin une pierre
si grosse dedens le chastel que elle confondi tout le palais du chastel, et
furent mort tuit cil qui dedens estoient; et du grant hurt qu'elle donna,
elle estonna toute la maistre tour et la fist crosler.
Quant cil de dedens se virent si entrepris, si ne sorent que faire, car il
virent bien que le chastel estoit tout deffroissié et dessus et dessoubs;
et que il estoit tout ainsi comme au tresbuchier; et, avec ce, nul secours
ne leur venoit du duc où il avoient moult grant fiance; si se rendirent au
roy et vindrent à mercy.
Quant le roy d'Angleterre oï dire que Belesme estoit pris, si se doubta
moult forment et manda le duc et luy dist: «Vous me disiez et faisiez
entendant que ce jeune roy n'avoit nulle aide de ses hommes, et il m'est
advis que il a plus grant force de gent que moy et vous n'avons; sé il
vient sur moy, coment me pourrois-je deffendre? je n'ay pas gent pour
combatre à luy, et si ne fait pas temps pour mener guerre.» Quant il eut ce
dit, il se parti du duc, et se mist en mer et retourna en Angleterre dolent
et couroucié, pour ce qu'il n'avoit riens fait.