_Coment le roy mena son ost en Poitou et conquist La Rochelle._
En l'an de l'Incarnacion mil deux cens vingt et quatre, ès nonnes du mois
de may, le roy Loys tint général parlement à Paris, auquel pape Honoré fist
rappeller la sentence qui estoit donnée contre les Albigois, qui estoient
tenus pour hérites; et leur donna indulgence de repentir et d'amender leur
vie, selon ce qui estoit contenu ès estatus du concile fait à Rome en
l'églyse Saint-Jehan-de-Latran. En ce meisme parlement fu denoncié et
esprouvé que Raymont, conte de Thoulouse, estoit bon crestien et vivoit
selon Dieu en la foy crestienne.
Ne demoura pas moult que après la feste saint Jehan-Baptiste, le roy Loys
ala à Tours, et assembla grant compaingnie d'évesques et de prélas, et
grant ost de barons, de chevaliers et de sergens; puis vint au chastel de
Monstereul[311], et prist trièves jusques à un an à Aimery, viconte de
Thouars; et d'illec ala au chastel de Niort et l'assist[312]. Illec estoit
Savari de Maulion, et les gens le roy Henry d'Angleterre, qui gardoient et
deffendoient le chastel. Le roy Loys fist drecier ses perrières et ses
engins, et tourmenta si ceux qui le chastel gardoient, qu'il se doubtèrent
forment et rendirent le chastel, saufs leur corps et leur avoir; par telle
condicion que il n'iroient ailleurs fors en la Rochelle; et ce jurèrent-il
sus sainctes évangiles.
Note 311: _Montreuil-Bellay_, entre Saumur et Thouars, sur
l'_Argenton_.
Note 312: Les manuscrits les plus anciens ajoutent: «La veille de
feste Saint-Martin-le-Boullant,» ou le Bouillant.
Après ce qu'il s'en furent partis, le roy fist garnir le chastel de Niort,
et mena son ost à Saint-Jehan-d'Angeli. Ceux de la ville, quant il sorent
la venue le roy, se doubtèrent moult et pristrent conseil et alèrent au
plus tost qu'il porent encontre luy, et se rendirent et receurent le roy
moult honnourablement en la ville. Le roy, qui fu moult lié de la
prospérité qui avenue luy estoit, se partist au plus tost qu'il peust
d'illec, et s'en tourna vers la Rochelle, et l'assist le jour des ydes de
juing. Il fist drecier ses engins devant les murs, et greva trop forment
ceux de la ville. Mais Savary de Maulion et trois cens chevaliers, et
pluseurs souldoiers qui dedens estoient, deffendirent et tindrent le
chastel forment et viguereusement contre le roy et sa gent.
Ainsi comme le siège et la guerre eut jà duré par dix-huit jours, il avint
que le clergié et les religions et le peuple de Paris s'esmurent et alèrent
solempnellement, nus piés et en langes, dès l'églyse Nostre-Dame jusques en
l'abbaye Saint-Antoine, pour que Dieu envoyast victoire au roy de France;
et furent à ceste procession trois roynes: ma dame Ingebour, jadis femme au
roy Phelippe, ma dame Blanche femme le roy Loys, ma dame Berengière femme
le roy Jehan de Jhérusalem. L'endemain de ceste procession avint, si comme
Dieu le voult, que contens et descort mut entre Savari de Maulion et autres
chevaliers qui le chastel de la Rochelle gardoient, pour ce qu'il
trouvèrent pierres et bran[313] en une huche au lieu d'argent que il
cuidoient que le roy d'Angleterre leur eust envoyé pour la guerre
maintenir. Et pour ce et pour la doubtance que il orent du roy Loys, qui,
de jour en jour, les faisoit assaillir forment, luy rendirent le chastel,
sauve leur vie, et s'en fouyrent en Angleterre. En ceste manière les
Anglois, qui longuement s'estoient atapis en la terre d'Acquitaine, se
départirent à envis ou volentiers du royaume de France.
Note 313: _Bran._ Son. Les manuscrits les plus anciens racontent tout
cela en d'autres termes.
Quant les Limosins, tuit ceux de Pierregort et tuit ceux de çà la Garonne
oïrent dire que la Rochelle estoit prise, il vindrent au roy et luy firent
hommage volentiers, et de gré luy jurèrent loyauté à tenir[314]. Le roy
Loys mist garde à la Rochelle, et si prist les seremens des bourgois de la
ville et repaira à moult grant léesce en France.
Note 314: «Exceptés les Gascoings qui sont entre la Guarone et le
fleuve courant.» (Msc. 8396.-2 et en général les plus anciens.)
_Incidence._--Dedens les octaves de l'Assumpcion Nostre-Dame, concile
général fu tenu à Montpellier, de l'auctorité et commandement le pape
Honoré, qui avoit mandé et donné en commandement à l'archevesque de
Nerbonne que la paix que le conte Raimont de Thoulouse et les autres barons
d'Albigois avoient promis à tenir à saincte églyse feust oïe diligemment,
et que l'archevesque le recommandast au pape dessoubs son seel enclose.
L'archevesque de Nerbonne assembla ses prélas, évesques, abbés et clers de
toute la diocèse de Nerbonne, et prist le serment du conte de Thoulouse et
de tous les barons de la terre d'entour que il tendroient la terre
paisiblement et seurement, et obéiroient à l'églyse de Rome; et
restabliroient aux clers et aux chanoines leur rentes entièrement, et
rendroient les dommages à quarante mille mars d'argent dedens trois ans, et
feroient justice sans demeure de ceux qui seroient attains et convaincus de
hérésie; et osteroient, selonc ce qu'il pourroient de tout leur province,
la mauvaistié de hérésie.
Es octaves de la Saint-Martin d'yver ensuivant, le roy Loys de France et le
roy Henry d'Alemaingne, fils Federic l'empereur, qui de la volenté son père
avoit esté nouvellement couronné en roy d'Alemaingne, assemblèrent à
Vaucoulour, pour traictier d'aucun prouffit pour les deux royaumes.