_Coment la guerre des deux roys commença, et coment le roy Phelippe laissa
la seur le roy Chanu de Danemarche, que il avoit espousée._
En l'an de l'Incarnacion mil cent quatre-vingt et treize, le roy Phelippe
qui se vouloit vengier de la traïson et de la desloyauté que le roy Richart
avoit faicte vers luy, assembla son ost pour assener aux fiefs qu'il tenoit
de luy et qu'il avoit meffais et perdus par droit. Le chastel de Gisors
prist en moult pou de temps, et tout Vouquecin le Normant que le roy
Richart tenoit à tort et sans raison. Car tout ce pays qui avoit esté livré
par douaire devoit retourner au royaume de France après le décès le jeune
roy Henry qui mort estoit sans hoir de son corps.
Quant le roy Phelippe ot prise toute celle marche de Normandie, il rendi à
l'églyse de Saint-Denys le Neuf Chastel sous Ethe[118] que le roy Henry et
son fils le roy Richart avoient tenu moult longuement à force et à tort.
Note 118: _Ethe._ Epte. Mais Neuf-Chatel, dont le surnom n'est pas
dans Rigord, est sur la _Bethune_, bien au-dessous de l'Epte.
En ce temps envoya le roy Phelippe au roy Chanu de Dannemarche homme
honnourable et honneste, Estienne, évesque de Noyon; et luy manda qu'il luy
envoyast une de ses soeurs pour espouser et pour couronner à royne de
France. Moult fu le roy Chanu lie quant il oï qu'il mandoit sa seur pour
tel honneur; aux messages livra sa seur qui avoit nom Ingebour, belle
pucelle, bonne et religieuse et aournée de bonnes graces et de bonnes
meurs. Les messages honnoura moult de dons et de présens. Congié prisrent
et puis se misrent au retour et si errèrent tant qu'il vindrent à Arras.
Le roy qui moult désiroit sa venue ala encontre à moult grant compaignie de
prelas et de barons: là fu espousée et couronnée à royne de France. Mais le
roy qui par sorcerie fu empeschié, si comme l'en disoit, la cueilli en
haine en celle journée meisme qu'il l'eut congneue. Et en pou de temps
après fu le mariage desjoint par l'esgart de saincte églyse, pour ce que
leur lignié fu nombrée, et prouchaineté de lignage trouvée par les prélas
et par les barons du royaume de France. Mais la bonne dame ne voult oncques
puis retourner en son pays; ains eut plus chier à garder continence, et
mettre sa cure en la saincte dévocion d'oroison et ès sains lieux d'oroison
et de religion tous les jours de sa vie, qu'estre jointe à autre personne
né aconchier les aliances de son premier mariage. Et pour ce que l'en
disoit que le devant dit mariage avoit esté desjoint contre droit et contre
raison, envoya l'apostole deux légas en France à la requeste des Danois;
l'un avoit nom Mieudres[119], prestre et cardinal, et l'autre Cencin,
soubs-diacre à Paris firent assembler concile général de tous les prélas et
abbés du royaume de France; là fu longuement traictié de la réformation du
mariage du roy et de la royne; mais il furent fais tout aussi mus[120]
comme chiens qui ne pevent abbayer: si ne menèrent point la besoingne à
perfection, pour ce qu'il se doubtoient de leur piaux.
Note 119 _Melior_.
Note 120: _Mus._ Mucis.
_Incidence_.--En ce temps mourut Salhadin le soudan de Babiloine en la cité
de Damas, qui estoit roy de deux royaumes d'Egypte et de Surie. En ces deux
royaumes régnèrent après luy deux fils qu'il avoit; Saphadin en Surie et
Meralice en Egypte.
_Incidence_.--En ce temps mouru un enfant de mort soudaine: le père et la
mère aportèrent le corps en l'églyse de Saint-Denys, droitement le jour de
sa grant feste; sur l'autel aux martirs le posèrent et commencièrent à
crier à l'armes et à souspirs: «Saint Denys! sire, aide nous!»
Nostre-Seigneur rendi tout maintenant au corps son esperit par les mérites
du glorieux martir et resuscita l'enfant, voiant tout le peuple qui là
estoit assemblé pour la solempnité de la feste.
_Incidence_.--En celle année en la quarte yde de novembre fu éclipse de
lune universel, en la première heure de la nuit et dura par trois heures.
_Incidence_.--En ce temps avint qu'un homme qui estoit tout hors du sens et
ravi de mal esperit revint en droicte mémoire en l'églyse de Saint-Denys en
France.